Salmo 71
1 Chios c̱haꞌ,
linꞌ nx̱enilallaa gap wwioꞌ nadꞌ;
bi weꞌgacho latj sia yeḻꞌ ztoꞌ.
2 Bislagach nadꞌ,
ḻaꞌ linꞌ chonoꞌ daa nak shḻi.
Bzenaggach c̱haꞌ naꞌ bisla nadꞌ.
3 Gokgach ka to yaj xen
ganaꞌ gak wkwashaa batꞌtez kwenc̱he kono bi goni nadꞌ.
Bislagach nadꞌ,
ḻaꞌ linꞌ nakoꞌ ka to yaj xen daa chkweejan nadꞌ,
naꞌ ka to yoo dii nak cha ganaꞌ kono gak shoꞌ bi goni nadꞌ.
4 Chios c̱haꞌ,
bisla nadꞌ lo ṉiꞌa naꞌ beṉꞌkaꞌ bi chall chlleb liꞌ,
beṉꞌkaꞌ nak beṉꞌ mal,
naꞌ naktegakeꞌ beṉꞌ zeshꞌ beṉꞌ zban.
5 Ḻaꞌ kanaꞌ naktiaꞌ beṉꞌ wewꞌ nonꞌ liꞌ lez,
Chios c̱haꞌ,
naꞌ linꞌ nx̱enilallaa.
6 Kanaꞌ ni yootiaꞌ ḻoo ḻee xṉaꞌnaꞌ,
ba chaklenoꞌ nadꞌ,
naꞌ liꞌkzan ba wdap bwioꞌ nadꞌ ka goljtiaꞌ.
Toshiizi weꞌlawaa liꞌ.
7 Beṉꞌ zan ba bibani ka diikaꞌ ba gok c̱haꞌ,
per liꞌ,
toshiizi ba bkwashꞌ bkweejoꞌ nadꞌ.
8 Kon ka chzoa xenaꞌ ax̱t ka chaḻ,
choeꞌlawaa liꞌ kon choꞌa ḻollaani,
naꞌ chgwaa liꞌ balaaṉ.
9 Bi c̱hooṉlalloo nadꞌ katꞌkaꞌ ba nakꞌ beṉ gol;
ni bi kwej yic̱hjoꞌ nadꞌ katꞌ bich bi gak gonꞌ.
10 Beṉꞌkaꞌ chakziꞌ chakzbani nadꞌ,
cheengakileꞌ gongakeꞌ mal c̱haꞌ,
ba nshagui ljwelleꞌ naꞌ chgoogakeꞌ xṉezin witgakeꞌ nadꞌ.
11 Naꞌ cheꞌgakeꞌ:
“Ḻi lljayeḻeꞌ naꞌ ḻi gox̱ee,
ḻaꞌ Chiozaꞌ ba wchooṉlalleeneꞌ
naꞌ kochno zoa yisla ḻeꞌ.”
12 ¡Bi wḻaalaꞌogachoꞌ nadꞌ,
Chios c̱haꞌ;
bi shagachiloꞌ yidyaklenoꞌ nadꞌ!
13 ¡Beṉꞌkaꞌ chakziꞌ chakzbani yeḻꞌ mban c̱haꞌni
siꞌgachꞌgakeꞌ yeḻꞌ ztoꞌ naꞌ kwiayiꞌtegakeꞌ!
¡Beṉꞌkaꞌ cheeni gak mal c̱haꞌ,
siꞌgachgakeꞌ yeḻꞌ ztoꞌ!
14 San nadꞌ toshiizi gon liꞌ lez
naꞌ zizikliꞌ weꞌlawaa liꞌ.
15 Kon ka chzoa xenaꞌ ax̱t ka chaḻ,
wiꞌa dillꞌ daa ba bisloꞌ netoꞌ,
naꞌ c̱he dii wenkaꞌ ba benoꞌ c̱hentoꞌ,
ḻaꞌkzi bi chbabgakidaꞌn.
16 Wiꞌa dillꞌ c̱he yeḻꞌ wak choo yeḻꞌ wak xenkaꞌ ba benoꞌ,
Chios c̱haꞌ;
naꞌ wiꞌa dillꞌ linꞌ nakoꞌ beṉꞌ ḻi beṉꞌ shaoꞌ.
17 Chios c̱haꞌ,
linꞌ ba bliꞌ bsediloꞌ nadꞌ kanaꞌ naktiaꞌ beṉꞌ wewꞌ,
naꞌ ax̱t ṉaa ni choꞌa dillꞌ c̱he yogꞌ diikaꞌ chonlenoꞌ yeḻꞌ wak c̱hoꞌnaꞌ diikaꞌ chon ka chibani beṉꞌ.
18 Chios c̱haꞌ,
bi c̱hooṉlalloo nadꞌ katꞌ ba nakꞌ beṉꞌ gol naꞌ ba wbezaa.
Ḻaꞌ ni de wiꞌa dillꞌ ka nak yeḻꞌ wak choo yeḻꞌ wak xen c̱hoꞌnaꞌ
lao beṉꞌki zoa ṉaa naꞌ lao dia c̱heꞌkaꞌ ziꞌ zaꞌ.
19 Naꞌ yeḻꞌ ḻi yeḻꞌ shaoꞌ c̱hoꞌnaꞌ,
Chios c̱haꞌ,
nakan dii choo dii xen ka yabanaꞌ.
Liꞌ ba benoꞌ yeḻꞌ wak choo yeḻꞌ wak xenkaꞌ,
naꞌ koch no zoa ka liꞌ.
20 Ḻaꞌkzi biꞌo latj wdiaꞌ lao dii zedkaꞌ diikaꞌ bi bzoa nadꞌ wen,
liꞌkz gonoꞌ ka yiyak wen c̱haꞌ sto shii,
naꞌ yisloꞌ nadꞌ lao yeḻꞌ witaꞌ.
21 Naꞌ gonoꞌ ka shoochꞌ balaaṉ xen
naꞌ yiyonxenlalloo nadꞌ sto shii.
22 Chios c̱haꞌ,
daa toshiizi chonoꞌ ka noꞌ,
weꞌlawaaꞌ liꞌ kon diikaꞌ llia kwerd c̱heyin.
Chios c̱haꞌ,
linꞌ nakoꞌ Chios c̱he netoꞌ beṉꞌ Israel.
23 Yiba yizakidꞌ weꞌlawaa liꞌ kon choꞌa ḻollaani
naꞌ do ka naktiaꞌ,
daa ba bisloꞌ nadꞌ.
24 Naꞌ ḻekzkaꞌ kon ka chzoa xenaꞌ ax̱t ka chaḻ,
wiꞌa dillꞌ daa nakoꞌ beṉꞌ ḻi beṉꞌ shaoꞌ,
ḻaꞌ beṉꞌkaꞌ goklallꞌ gak mal c̱haꞌ ba wxiꞌgakeꞌ yeḻꞌ ztoꞌ.