Salmo 69
1 Bislagach nadꞌ,
Chios c̱haꞌ,
ḻaꞌ ba chak c̱haꞌ ka beṉꞌ kweꞌ yel,
2 ka beṉꞌ chaz ḻoo guullꞌ ganaꞌ zitj,
naꞌ bi ga de yizoac̱hec̱h ṉiꞌenaꞌ.
Naꞌ chak c̱haꞌ ka chak c̱he beenaꞌ ba bllin gchoḻ yawaꞌ ganaꞌ nak zitj naꞌ ba choaꞌn ḻeꞌ.
3 Ba chidolallaa chosyaadiaꞌ,
naꞌ ax̱t ba nej yenꞌni;
ba chetyaa jalawꞌki daa chwiaꞌ galə zaꞌ Chios c̱haꞌnaꞌ gakleneꞌ nadꞌ.
4 Zanchlə beṉꞌkaꞌ chakziꞌ chakzbani nadꞌ aga ka yishꞌ yic̱hjꞌki.
Beṉꞌ zan chakziꞌ chakzbani nadꞌ naꞌ cheengakileꞌ wlliayiꞌgakeꞌ nadꞌ ḻaꞌkzi bibi benꞌ c̱hegakeꞌ.
Naꞌ chongakeꞌ byen c̱hixjꞌ daa bi wxiꞌ wlanꞌ c̱hegakeꞌ.
5 Chios c̱haꞌ,
liꞌ ṉeziloꞌ ba gokꞌ to beṉꞌ bi nteyi naꞌ biya dii benꞌ,
naꞌ aga wak wkwashidꞌ liꞌ saaxyakaꞌ benꞌ.
6 Chios c̱haꞌ,
beṉꞌ yeḻꞌ wak choo yeḻꞌ wak xen,
bi igaaṉgach beṉꞌkaꞌ nx̱enilallꞌ liꞌ yeḻꞌ ztoꞌ ni c̱haꞌ nadꞌ.
Chios,
beṉꞌ nak lallꞌ naꞌyi netoꞌ beṉꞌ Israel,
aga ni c̱haꞌ nadꞌ gak yeḻꞌ ztoꞌ c̱he beṉꞌkaꞌ chiyilj liꞌ do yic̱hj do lallꞌgakeꞌ.
7 Daa nonḻilallaa liꞌ,
dii zan ba ben wna beṉꞌ c̱haꞌ;
naꞌ ba bsiꞌgakeꞌ nadꞌ yeḻꞌ ztoꞌ.
8 Naꞌ nakꞌ ka beṉꞌ zitꞌ lao beṉꞌ bishꞌ goljꞌkaꞌ,
naꞌ chongakileꞌ nadꞌ ka beṉꞌ bi nombiaꞌgakeꞌ.
9 Daa ḻe chakidꞌ lill xḻatjoꞌnaꞌ ḻen wlliayiꞌn nadꞌ;
naꞌ daa wchell wṉe beṉꞌ c̱hoꞌ bzoan nadꞌ zibiaꞌ.
10 Katꞌkaꞌ chbellꞌ naꞌ zoaꞌ wbasꞌ,
chtitjgakileꞌ nadꞌ;
11 naꞌ shi chakwꞌ lechꞌ daa chakw beenaꞌ chet to bishꞌ ljwellin,
naꞌ chxilli yogꞌ beṉꞌ nadꞌ.
12 Kon to choꞌa xtillaanaꞌ xoa choꞌa ḻollꞌ beṉꞌ,
naꞌ beṉꞌ weezokaꞌ choḻigakeꞌ daa chak c̱haꞌ.
13 Per nadꞌ,
Chios c̱haꞌ,
linꞌ chṉabidꞌ gaklenoꞌ nadꞌ.
Chios c̱haꞌ,
¡goklen nadꞌ ṉaa!
Daa naklikzoꞌ beṉꞌ chiyeshlallii,
¡bengach dga chṉabidꞌ liꞌ!
Naꞌ daa toshiizi chonoꞌ ka noꞌ,
¡bislagach nadꞌ!
14 Bi wsanlalloo nadꞌ lawi daa chak c̱haꞌ.
Bislagach nadꞌ lao beṉꞌkaꞌ chwiyi nadꞌ
naꞌ lawi dii nxollkaꞌ chak c̱haꞌ.
15 Bi wiꞌo latj gak c̱haꞌ ka beṉꞌ ba noaꞌ yao.
Ni bi wiꞌo latj gak c̱haꞌ ka beṉꞌ chxop ganaꞌ chdob nisaꞌ naꞌ cheban ḻeꞌ,
ni bi wiꞌo latj wwakwgakeꞌ nadꞌ yonaꞌ ḻoo banaꞌ.
16 Chios c̱haꞌ,
bengach dga chṉabidꞌ liꞌ,
daa nakoꞌ beṉꞌ wen naꞌ napoꞌ yeḻꞌ chaki.
Daa naklikzoꞌ beṉꞌ chiyeshlallii,
bwiagach nadꞌ.
17 Bi kwejyic̱hjoꞌ nadꞌ.
Btagach lalloo gaklenoꞌ nadꞌ,
daa zoaꞌ lao dii nxollaꞌ.
18 Da diyaklengach nadꞌ,
naꞌ bisla nadꞌ.
¡Bisla nadꞌ lao beṉꞌkaꞌ chakziꞌ chakzbani nadꞌ!
19 Liꞌ ṉeziloꞌ ka ba wṉegakeꞌ c̱haꞌ,
ka yeḻꞌ ztoꞌnaꞌ ba bsiꞌgakeꞌ nadꞌ,
naꞌ ka bṉit bdegakeꞌ nadꞌ.
Liꞌkz ṉeziloꞌ no beṉꞌkaꞌ chakziꞌ chakzbani nadꞌ.
20 Diikaꞌ chbell chṉegakeꞌ c̱haꞌ ba bzoaziꞌyaan yic̱hjꞌlallꞌdawaani;
naꞌ bich bi nan gonꞌ daa ḻe nyeshꞌ zoaꞌ.
Ni tlishꞌga beṉꞌ bi bchej yiyeshꞌlallileꞌ nadꞌ,
ni togagakeꞌ bi biyonxenlallꞌgakeꞌ nadꞌ.
21 Bwaogakeꞌ nadꞌ yeḻꞌ wawaꞌ nc̱hix̱gakeꞌ yierbaꞌ
naꞌ ka wbiḻidꞌ bweejgakeꞌ nadꞌ daa nak zic̱hjꞌ zḻaꞌ.
22 Yiyakshga lṉi c̱heꞌkaꞌ daa chakgakileꞌ wen
ka to yalj dii wzapan ḻegakeꞌ naꞌ wlliayiꞌn ḻegakeꞌ.
23 Bengach ka ic̱hoḻgakeꞌ
naꞌ isis ṉiꞌekaꞌ toshiizi.
24 Bsakꞌziꞌgachgakeꞌ daa chllaagakoꞌneꞌ;
naꞌ yeḻꞌ chllaa c̱hoꞌnaꞌ yidoḻin ḻegakeꞌ.
25 Yidesh yiloashgaꞌ lill xḻatjeꞌkaꞌ,
naꞌ ni stogakeꞌ bich soan
26 daa chlagdogakeꞌ beenaꞌ ba bsakꞌziꞌo,
naꞌ chxillgakileꞌneꞌ daa ba bsakꞌziꞌoneꞌ.
27 Bsakꞌziꞌgachgakeꞌ ka ba bsakꞌziꞌgakeꞌ beṉꞌ,
naꞌ bi siꞌxenoꞌ c̱hegakeꞌ.
28 ¡Bsol bṉit lieꞌkaꞌ ḻee libr c̱hoꞌnaꞌ ganaꞌ daꞌ le beṉꞌkaꞌ de yeḻꞌ mban c̱heyin!
Naꞌ bi taꞌ lieꞌkaꞌ ganaꞌ daꞌ le beṉꞌkaꞌ nak beṉꞌ ḻi beṉꞌ shaoꞌ.
29 Naꞌ nadꞌ,
bi zoaꞌ wen naꞌ zoaꞌ nyeshꞌ,
goklengach nadꞌ,
Chios c̱haꞌ,
naꞌ bisla nadꞌ.
30 Goḻ iṉiaꞌ weꞌlawaa Chiozaꞌ;
naꞌ weꞌlawaaneꞌ wiꞌaneꞌ yeḻꞌ chox̱ken.
31 Naꞌ X̱ancho Chiozaꞌ wibachilen
aga ka daa wiꞌaneꞌ to gooṉ wa to meꞌdoꞌ do ka nakb.
32 Naꞌ beṉꞌkaꞌ zoa nyeshꞌ yiba yizakgakileꞌ ka ileꞌgakileꞌ ba goklen Chiozaꞌ nadꞌ,
naꞌ wtiplallꞌ beṉꞌkaꞌ choeꞌlaꞌo ḻeꞌ.
33 Ḻaꞌ X̱ancho Chiozaꞌ chzenagueꞌ c̱he beṉꞌ yeshꞌdoꞌkaꞌ
naꞌ bi chonileꞌ nakzi beṉꞌkaꞌ nak lallꞌ nee,
beṉꞌkaꞌ zoa nyeshꞌ.
34 Yaba,
yell-lio naꞌ nisdoꞌ,
naꞌ yogꞌḻoḻ-le leꞌ lleꞌ llaꞌle lawinkaꞌ,
ḻi weꞌlaꞌo X̱ancho Chiozaꞌ.
35 Ḻaꞌ Chiozaꞌ yisleꞌ beṉꞌkaꞌ lleꞌ Jerusalénnaꞌ daa llia lo yaa Siónnaꞌ,
naꞌ yiliseꞌ yellkaꞌ mbani Judánaꞌ,
naꞌ soagakeꞌ naꞌ,
naꞌ gakin c̱hegakeꞌ.
36 Xiiṉ dia c̱he beṉꞌkaꞌ benḻilallꞌgakeꞌneꞌ gakin c̱hegakeꞌ,
naꞌ beṉꞌkaꞌ chakgakileꞌneꞌ soagakeꞌ lawinnaꞌ.