Salmo 66
1 Ḻi goḻ iṉe X̱ancho Chiozaꞌ,
naꞌ ḻi yiba yizaki laweꞌnaꞌ
yogꞌle leꞌ zoale doxen yell-lioni.
2 ¡Ḻi goḻ iṉieꞌ daa nakeꞌ beṉꞌ zakii nlleb!
¡Ḻi weꞌlawee,
ḻi kwee balaaṉ choo balaaṉ xen.
3 Ḻi yee Chiozaꞌ:
“¡Diikaꞌ chonoꞌ,
chonan ka chibanchgaintoꞌ!
Naꞌ daa napoꞌ yeḻꞌ wak choo yeḻꞌ wak xen,
ax̱t chall chlleb beṉꞌkaꞌ chakziꞌ chakzbani liꞌ.
4 Yogꞌḻoḻ beṉꞌkaꞌ lleꞌ doxen zbii zkaaṉ yell-lioni choeꞌlaꞌogakeꞌ liꞌ,
naꞌ choḻ chṉegakeꞌ liꞌ.”
5 Ḻi da,
naꞌ ḻi wwia ka nak diikaꞌ ba ben Chiozaꞌ,
ḻaꞌ dii chon ka yibanicho nak yeḻꞌ wakkaꞌ ba beneꞌ kwenc̱he gokleneꞌ choꞌ beṉꞌ yell-lio.
6 Bsaljeꞌ nezaꞌ ḻoo nisdoꞌnaꞌ naꞌ ḻoo yawaꞌ
naꞌ wdegakeꞌ lo yo billaꞌ.
Yiba yizakshgaicho ka nak daa choneꞌ.
7 Chṉabiaꞌleneꞌ yeḻꞌ wak xen c̱heꞌnaꞌ toshiizi;
naꞌ chwieꞌ yellkaꞌ ganaꞌ lleꞌ beṉꞌkaꞌ bi nombiaꞌ ḻeꞌ kwenc̱he ki ichej beṉꞌ yizoshyiꞌeneꞌ.
8 Ḻi weꞌlaꞌo Chiozaꞌ,
ka leꞌ lleꞌle yogꞌ yellkaꞌ,
ḻi gon ka yeni yogꞌḻoḻ beṉꞌ daa cheꞌleneꞌ katꞌ choeꞌlaꞌoleneꞌ.
9 Ḻaꞌ ba wdapshiꞌe yeḻꞌ mban c̱hechoki,
naꞌ bi biꞌe latj biz gak c̱hecho.
10 Chios c̱haꞌ,
ba bdioꞌ netoꞌ lo yeḻꞌ ziꞌnaꞌ,
naꞌ ba biyonshawoꞌ netoꞌ ka plataꞌ daa chde lo yiꞌnaꞌ kwenc̱he chakan dowalj.
11 Benoꞌ ka btiḻntoꞌ dii lalljaꞌ,
naꞌ benoꞌ c̱hentoꞌ ka to beṉꞌ noaꞌ to dii zii dii zshab.
12 Biꞌo latj blej bshoshj beṉꞌ netoꞌ;
btiḻntoꞌ dii nxollkaꞌ,
gok c̱hentoꞌ ka beṉꞌ wde lo yiꞌ naꞌ ka beṉꞌ wde to yao xen,
per ṉaa ba benoꞌ ka ba chiyak wen c̱hentoꞌ.
13 Naꞌ shoꞌa leshꞌ lill xḻatjoꞌnaꞌ,
wzeyꞌ bayix̱ꞌdoꞌkaꞌ lawoꞌnaꞌ,
naꞌ gonꞌ yogꞌ diikaꞌ ba bc̱hebꞌ,
14 diikaꞌ bc̱hebꞌ lawoꞌnaꞌ
kanaꞌ chdaꞌ lao dii nxollaꞌ.
15 Naꞌ wzeyꞌ lawoꞌnaꞌ bayix̱ꞌdoꞌkaꞌ chakshaoꞌlallii,
naꞌ witꞌ lawoꞌnaꞌ xilꞌ mashkaꞌ len gooṉkaꞌ naꞌ shib mashkaꞌ.
16 Ḻi da,
ka le chall chlleble X̱ancho Chiozaꞌ
naꞌ ḻi wzenag ka nak diiki ba beneꞌ c̱haꞌ.
17 Kon choꞌa ḻollaani beꞌḻwillee naꞌ beꞌlawaaneꞌ.
18 Sheḻꞌ ḻoo yic̱hjlallꞌdawaani chzelallaan dii malkaꞌ,
aga bzenag X̱ancho Chiozaꞌ c̱haꞌ sheḻꞌkaꞌ.
19 Per ba bzenagueꞌ c̱haꞌ naꞌ ba beneꞌ diikaꞌ wṉabidee.
20 Choeꞌlawaa Chios c̱haꞌnaꞌ
daa bi bdegoneꞌ daa goshee,
ni bi bllonileꞌ nadꞌ yeḻꞌ chaki c̱heꞌnaꞌ.