Salmo 65
1 Chios c̱haꞌ,
chidoḻoo shajlawoo yell Siónnaꞌ,
naꞌ gonntoꞌ yogꞌ daa ba bc̱hebntoꞌ lawoꞌnaꞌ.
2 Liꞌ chzenagoꞌ katꞌ choeꞌḻwillntoꞌ liꞌ,
naꞌ yogꞌḻoḻ beṉꞌ yidgakeꞌ lawoꞌni.
3 Dii malkaꞌ benntoꞌ btakw bc̱hejan netoꞌ,
per liꞌ ba biziꞌxenoꞌ saaxya c̱hentoꞌkaꞌ.
4 Chakomba beenaꞌ ba gox wṉaboꞌ kwenc̱he soeꞌ leshꞌ lill xḻatjoꞌnaꞌ.
Gakshga ḻoo yic̱hjlallꞌdoꞌntoꞌki to llaꞌ dii wenkaꞌ de lill xḻatjoꞌnaꞌ.
5 Chios c̱haꞌ,
linꞌ chisloꞌ netoꞌ.
Liꞌ chzenagoꞌ c̱hentoꞌ naꞌ chaklenoꞌ netoꞌ kon yeḻꞌ wak c̱hoꞌnaꞌ daa chon ka chibani beṉꞌ.
Naꞌ linꞌ nx̱enilallꞌ yogꞌḻoḻ beṉꞌ lleꞌ zbii zkaaṉ yell-lioni.
6 Linꞌ nzoac̱hec̱hoꞌ yaa yeḻkaꞌ
kon yeḻꞌ wak choo yeḻꞌ wak xen c̱hoꞌnaꞌ.
7 Chbekllioꞌ nisdoꞌnaꞌ daa chas chatꞌ
len sshag daa chon bḻi c̱heyinnaꞌ,
naꞌ yeḻꞌ chaklleshii c̱he beṉꞌ yell-liokaꞌ.
8 Naꞌ beṉꞌkaꞌ lleꞌ ax̱t ganaꞌ nak zitꞌ wal chall chllebgakeꞌ
ka nak yeḻꞌ wak choo yeḻꞌ wak xenkaꞌ chonoꞌ.
Liꞌ chonoꞌ ka chiba chizaki yogꞌḻoḻ beṉꞌ,
ka beṉꞌ lleꞌ ganaꞌ chlaꞌ wbilldoꞌnaꞌ naꞌ ka beṉꞌ lleꞌ ganaꞌ chxoalan.
9 Liꞌ chap chwioꞌ yell-lioni naꞌ chyililoꞌn nis yej c̱hoꞌnaꞌ;
naꞌ chonoꞌ ka chiya dii chashj chḻeban.
Yogꞌḻoḻ yao c̱hoꞌkaꞌ chonoꞌn choc̱hj chlalj nisaꞌ,
kwenc̱he gatꞌ kweꞌ daa yeej gao beṉꞌ.
Naꞌ kaꞌ chonshawoꞌ lo yell-lioni.
10 Chonoꞌ ka chiyaalli lo nanaꞌ,
naꞌ chiyonoꞌn tlap.
Chzaalliloꞌn nis yej c̱hoꞌnaꞌ,
naꞌ chonḻeeyoꞌ diikaꞌ chaz chbekgakeꞌ lawinnaꞌ.
11 Linꞌ chzioꞌ bejkaꞌ chon choc̱hj chlalj nis yejaꞌ,
naꞌ chatꞌ chbeꞌchga daa chiziꞌ chilap beṉꞌ,
12 naꞌ chashj chḻeb yix gaꞌkaꞌ ganaꞌ nak latj llib,
naꞌ yaa yaokaꞌ chakgakan shiꞌa shgaꞌ.
13 Leshꞌkaꞌ llia lo yaakaꞌ,
tollaꞌ chakan bayix̱ꞌkaꞌ,
naꞌ tleshꞌkaꞌ xoapapan daa naz beṉꞌ.
Naꞌ daa chiba chizakgakin ax̱t choḻ chṉegakan.