Salmo 64
1 Chios c̱haꞌ,
bzenaggach wiꞌa dillꞌ dga chak c̱haꞌ,
naꞌ bislagach nadꞌ lo ṉiꞌa naꞌ beṉꞌkaꞌ chakziꞌ chakzbani nadꞌ naꞌ ngooshebgakeꞌ nadꞌ.
2 Bkwashꞌgach nadꞌ lao beṉꞌkaꞌ do ngashꞌzə chgoogakeꞌ xṉezin gongakeꞌ mal c̱haꞌ;
bislagach nadꞌ lawi daa chwiagakeꞌ gongakeꞌ c̱haꞌ.
3 Dillꞌ zibiaꞌkaꞌ chchej choꞌa ḻolleekaꞌ
nakgakan ka yesya dii nḻaꞌtit daa chzoaziꞌyaa beṉꞌ,
naꞌ nakgakan ka xiskaꞌ chzaḻꞌ xis wix̱itaa diikaꞌ chaz zitj.
4 Daa chbell chṉegakeꞌ ka nḻaꞌ ka nte c̱he beṉꞌkaꞌ bibi doḻꞌ c̱heyin de,
chongakeꞌ ka beenaꞌ do ngashꞌzə chzaḻee xis c̱he xis wix̱itꞌ c̱heꞌnaꞌ chzoaziꞌyee beṉꞌ,
naꞌ tokonganzə chiteꞌneꞌ ni bi chall chllebeꞌ gakbeꞌi beṉꞌ daa choneꞌ.
5 Ganga chtip lallꞌ ljwellgakeꞌ chgoogakeꞌ xṉezi dii malaꞌ gongakeꞌ
naꞌ chgoogakeꞌ xṉezin wzegakeꞌ yaljaꞌ senan beṉꞌ tokonganz ga kono ileꞌi,
naꞌ nagakeꞌ niki no gakbeꞌzi.
6 Dii malaꞌ daa chgoogakeꞌ xṉezin chakgakileꞌ kono yiyiljniꞌan.
Per beenaꞌ nombiaꞌ yic̱hjlallꞌdoꞌ beṉec̱haꞌ,
ḻeꞌ goneꞌ ka yilaꞌlawi daa chongakeꞌ.
7 Chiozaꞌ wseḻee yeḻꞌ zakꞌziꞌ c̱heꞌkaꞌ,
naꞌ tokonganzə sakꞌziꞌgakeꞌ.
8 Dillꞌkaꞌ chchej choꞌa ḻolleekaꞌtezə wlliayiꞌn ḻegakeꞌ,
naꞌ yogꞌ beṉꞌkaꞌ ileꞌi ka gak c̱hegakeꞌ wxillgakileꞌ ḻegakeꞌ.
9 Naꞌ yogꞌḻoḻ beṉꞌ lleꞌ yell-lioni gall illebgakeꞌ Chiozaꞌ
naꞌ weꞌgakeꞌ dillꞌ ka nak diikaꞌ ba beneꞌ,
naꞌ segakeꞌn wṉeyi.
10 Yiba yizakchgayi beṉꞌkaꞌ chon daa nak shḻi lao X̱ancho Chiozaꞌ,
naꞌ gongakeꞌ lez gap wwieꞌ ḻegakeꞌ.
Yogꞌḻoḻ beṉꞌkaꞌ ngooshḻilallii weꞌlaꞌogakeꞌneꞌ.