Salmo 63
1 Chios,
linꞌ nakoꞌ Chios c̱haꞌ.
Do yic̱hj do lallaa chiyiljꞌ liꞌ.
Do ka nakꞌ chzelallꞌchgaidꞌ liꞌ.
Chak c̱haꞌ ka chak c̱he to beṉꞌ chda to latj ga bibi nis de naꞌ chbiḻ chdechgaileꞌ.
2 Cheenidꞌ yileꞌidꞌ yeḻꞌ wak c̱hoꞌnaꞌ len balaaṉ xen c̱hoꞌnaꞌ,
ka ba bleꞌidaꞌn lill xḻatjoꞌnaꞌ.
3 Ḻaꞌ yeḻꞌ chiyeshꞌlallii c̱hoꞌnaꞌ zakꞌtechin ka yeḻꞌ mbannaꞌ,
daan goḻ iṉiaꞌ liꞌ kon choꞌa ḻollaani.
4 Shnon mbanꞌ weꞌlawaa liꞌ,
naꞌ wḻis naꞌki lawoꞌnaꞌ weꞌḻwillꞌ liꞌ.
5 Naꞌ yelj shaꞌi yic̱hjlallꞌdawaani,
ka beṉꞌ wdao to yeḻꞌ wao dii ḻiizeelo sia.
Naꞌ yiba yizakidꞌ weꞌlawaa liꞌ.
6 Ka ba dia lo blag c̱haꞌnaꞌ chjadinidꞌ liꞌ,
naꞌ yoo yic̱hjꞌ liꞌ do yel.
7 Ḻaꞌ linꞌ chaklenoꞌ nadꞌ,
naꞌ chiba chizakidꞌ daa chap chwioꞌ nadꞌ,
daa chonoꞌ c̱haꞌ ka chon banaꞌ zoa x̱ilin chyellb xiiṉbkaꞌ xan x̱ilbaꞌ.
8 Yic̱hjlallꞌdawaani daꞌchgan liꞌ,
naꞌ chaklenoꞌ nadꞌ kon yeḻꞌ wak c̱hoꞌnaꞌ.
9 Beṉꞌkaꞌ cheeni witgakeꞌ nadꞌ kwiayiꞌgakeꞌ
naꞌ yillingakeꞌ ganaꞌ lleꞌ beṉꞌ wetkaꞌ.
10 Naꞌ guetgakileꞌ yesyakaꞌ lo wdiḻaꞌ,
naꞌ ba zṉiakaꞌ gaogakb ḻegakeꞌ.
11 San nadꞌ,
nzoa Chiozaꞌ chṉabiꞌa,
yiba yizakidꞌ laweꞌnaꞌ,
naꞌ yogꞌ beṉꞌkaꞌ nx̱enilallꞌgakeꞌneꞌ,
weꞌlaꞌogakeꞌneꞌ.
Naꞌ yillodꞌ choꞌa ḻollꞌ beṉꞌ wxiyeꞌkaꞌ.