Salmo 62
1 Toz Chios c̱haꞌnaꞌ nzoeꞌ nadꞌ mbalaz;
naꞌ ḻekzenꞌ chisleꞌ nadꞌ lao dii nxollkaꞌ.
2 Tozeꞌ ḻeꞌ nakeꞌ ka to yaj xen dii chkweejan nadꞌ naꞌ chisleꞌ nadꞌ.
Naꞌ ḻenꞌ chap chwieꞌ nadꞌ naꞌ biga wiꞌe latj ibix̱ꞌ.
3 ¿Bat yiyoll yido tiḻ-lenle nadꞌ?
Daa cheenile wlliayiꞌle nadꞌ
chonle ka chon beṉꞌ chlliayee to zee dii ba chyiṉj wa to leej dii ba zoa yillee.
4 Cheenzile yikwasle yeḻꞌ wṉabiaꞌ c̱haꞌnaꞌ.
Ḻe chibaile weꞌle dillꞌ wxiyeꞌ;
kon choꞌa ḻollꞌlenaꞌ chṉable gak wen c̱haꞌ,
per ḻoo yic̱hjlallꞌdoꞌlekaꞌ chzaꞌlallꞌle biz gak c̱haꞌ.
5 Toz Chios c̱haꞌnanꞌ nzoeꞌ nadꞌ mbalaz;
naꞌ ḻekzenꞌ chisleꞌ nadꞌ lao dii nxollkaꞌ.
6 Tozeꞌ ḻeꞌ nakeꞌ ka to yaj xen daa chkweejan nadꞌ naꞌ chisleꞌ nadꞌ.
Naꞌ ḻenꞌ chap chwieꞌ nadꞌ naꞌ bi wiꞌe latj ibix̱ꞌ.
7 Chios c̱haꞌnaꞌ chisleꞌ nadꞌ naꞌ ḻenꞌ choneꞌ ka shoꞌa balaaṉ.
Ḻeꞌ nakeꞌ ka to yaj xen daa chkweejan nadꞌ,
naꞌ ka to latj ganaꞌ wkwashaa kwenc̱he kono bi goni nadꞌ.
8 Leꞌ beṉꞌ yell c̱haꞌ,
ḻi gon Chiozaꞌ lez toshiizi.
Ḻi yee yogꞌḻoḻ diikaꞌ chak c̱hele,
ḻaꞌ ḻenꞌ chap chwieꞌ choꞌ.
9 Beṉꞌ yell-lioki aga bi zakꞌgakeꞌ,
ḻaa beṉꞌ wniꞌa ḻaa beṉꞌ yeshꞌ.
Shi yogꞌḻoḻgakeꞌ kwiagakeꞌ to lo xigꞌ libr
ni bi nakbiaꞌ shi bi llia lawinnaꞌ.
10 Bi gakzile wziꞌle banez diikaꞌ chziꞌ chkaale c̱he beṉꞌkaꞌ chsakꞌziꞌle,
ni bi yibaile diikaꞌ chbanle c̱he beṉꞌ.
Ḻaꞌkzi shi gakchle beṉꞌ wniꞌa,
bi gonle yeḻꞌ wniꞌanaꞌ lez.
11 To daa wna Chiozaꞌ,
ba gok c̱hop shii benidaꞌn,
naꞌ ba ṉezidꞌ
liꞌ Chios c̱haꞌ,
nakoꞌ beṉꞌ yeḻꞌ wak choo yeḻꞌ wak xen,
12 naꞌ linꞌ napchgoꞌ yeḻꞌ chakinaꞌ.
Naꞌ linꞌ goniloꞌ beṉꞌ yell-lioni kon ka nak daa ben to toeꞌ.