Salmo 60
1 Chios c̱haꞌ,
ba wchooṉlalloo netoꞌ,
naꞌ ba biꞌo latj bṉitntoꞌ lo wdiḻaꞌ daa chlloo netoꞌ.
¡Bileꞌshiꞌgachi netoꞌ!
2 Ba bta bṉiboꞌ yell-lioni naꞌ ba benoꞌ ka bxaꞌ btinan.
Biyongach ganaꞌ ba nxaꞌ ntin,
ḻaꞌ ba chyiṉj chyellan.
3 Ba bdioꞌ netoꞌ nakntoꞌ yell c̱hoꞌ lo yelꞌ zakꞌziꞌkaꞌ.
Naꞌ yeḻꞌ zakꞌziꞌkaꞌ daa ba bdioꞌ netoꞌ nakgakan ka daa chsoll chṉiti beṉꞌ.
4 Bsiꞌniloꞌ beṉꞌkaꞌ chall chlleb liꞌ
kwenc̱he lljakwashꞌgakeꞌ naꞌ yilagakeꞌ lao beṉꞌkaꞌ nox̱ꞌ xis wix̱itꞌkaꞌ.
5 Bislagach netoꞌ kon yeḻꞌ wak choo yeḻꞌ wak xen c̱hoꞌnaꞌ
daa nakntoꞌ yell c̱hoꞌ,
beṉꞌ ḻe chakiloꞌ.
6 Chiozaꞌ wṉieꞌ ganaꞌ nak lill xḻatjeꞌ,
wneꞌ:
“Yiba yizakidꞌ gonꞌ lallꞌ naꞌle yell-lionaꞌ mbani Siquemaꞌ,
naꞌ ḻekzkaꞌ gonꞌ lallꞌ naꞌle leshaa le Sucot.
7 Yell-lio Galaadaꞌ nakan c̱haꞌ,
naꞌ ḻekzkaꞌ yell-lio c̱he Manasézaꞌ.
Yell-lio c̱he Efraínnaꞌ zaklebin to daa chdosaa yic̱hjaa naꞌ chkweejan daa;
naꞌ yell-lio c̱he Judánaꞌ zaklebin yag bar c̱haꞌnaꞌ daa chṉabiaꞌlenꞌ.
8 Yell-lio c̱he beṉꞌ Moabkaꞌ zaklebin shaꞌnaꞌ ganaꞌ yoll nisaꞌ chyib chx̱isꞌ naꞌnaꞌ;
naꞌ lo yell-lio c̱he beṉꞌ Edomkaꞌ wzaḻaa xelꞌkaꞌ,
naꞌ yiba yizakidꞌ daa benꞌ gan lao beṉꞌ filisteokaꞌ.”
9 ¿Non lljwaꞌ nadꞌ tiḻ-lenꞌ beṉꞌkaꞌ lleꞌ yellaꞌ nec̱hj zee walaꞌ?
¿Non lljwaꞌ nadꞌ shaꞌ Edomaꞌ?
10 Chios c̱haꞌ,
linꞌ lljoo netoꞌ sheḻꞌkaꞌ,
per ba wchooṉlalloo netoꞌ,
naꞌ bich chaklenoꞌ wen wdiḻ c̱hentoꞌkaꞌ.
11 Bislagach netoꞌ lao beṉꞌkaꞌ chdiḻ-len netoꞌ,
ḻaꞌ aga bi de gon yeḻꞌ goklen c̱he beṉꞌ yell-lioni.
12 Daa gaklen Chiozaꞌ choꞌ,
dii xen dii gak goncho,
naꞌ ḻeꞌ wlej wshoshjeꞌ beṉꞌkaꞌ chdiḻ-lencho.