Salmo 59
1 Chios c̱haꞌ,
bislagach nadꞌ lo ṉiꞌa naꞌ beṉꞌkaꞌ chakziꞌ chakzbani nadꞌ,
naꞌ chdiḻ-lengakeꞌ nadꞌ.
2 Bislagach nadꞌ lo ṉiꞌa naꞌ beṉꞌ malkaꞌ,
beṉꞌkaꞌ cheeni witgakeꞌ nadꞌ.
3 Bwiagach ka chinogakeꞌ nadꞌ kwenc̱he witgakeꞌ nadꞌ.
Ba nshagui ljwell beṉꞌkaꞌ chbayi chsakꞌziꞌ beṉꞌ kwenc̱he witgakeꞌ nadꞌ,
ḻaꞌkzi aga bi dii mal benꞌ,
Chios c̱haꞌ.
4 Ḻaꞌkzi aga bi dii mal benꞌ,
ba zaꞌgakeꞌ kwenc̱he tiḻ-lengakeꞌ nadꞌ.
Bi shagachiloꞌ yidyaklenoꞌ nadꞌ.
Bwiagach ka chak c̱haꞌ.
5 Chios c̱haꞌ,
linꞌ nakoꞌ ḻiizelozi beṉꞌ yeḻꞌ wak choo yeḻꞌ wak xen,
linꞌ nakoꞌ Chios c̱he netoꞌ beṉꞌ Israel.
Bi shagachiloꞌ wsakꞌziꞌo yogꞌḻoḻ beṉꞌkaꞌ bi chall chlleb liꞌ,
bi yiyeshꞌgachiloꞌ beṉꞌkaꞌ ba chidiḻ-lengakeꞌ nadꞌ daa nakgakeꞌ beṉꞌ mal.
6 Ḻegakeꞌ chiyoogakeꞌ waḻkaꞌ,
naꞌ chongakeꞌ sshag ka bekwꞌ ba chxia,
naꞌ choshꞌ chlallꞌgakeꞌ yellaꞌ.
7 Daa chbell chṉegakeꞌ ka nḻaꞌ ka nte
nakan ka yesya daa chzoaziꞌyaan beṉꞌ.
Naꞌ nazgakeꞌ:
“Aga no cheni bin nacho.”
8 Per liꞌ,
Chios c̱haꞌ,
chxill-liloꞌ ḻegakeꞌ,
naꞌ chxilliloꞌ yogꞌte beṉꞌkaꞌ bi nombiaꞌ liꞌ.
9 Chios c̱haꞌ,
linꞌ nonꞌ lez gap wwioꞌ nadꞌ,
ḻaꞌ linꞌ chkwashꞌ chkweejoꞌ nadꞌ kwenc̱he kono bi goni nadꞌ.
10 Chios c̱haꞌ,
liꞌ chakiloꞌ nadꞌ.
Da gaklengachoꞌ nadꞌ,
naꞌ ben ka ileꞌidꞌ yillinoꞌ xṉez beṉꞌkaꞌ chdiḻ-len nadꞌ.
11 Bi wlliayiꞌgakoꞌneꞌ,
san kon yeḻꞌ wak c̱hoꞌnaꞌ ben ka tagakeꞌ lall lill beṉꞌ,
naꞌ bṉit bdegakeꞌ,
kwenc̱he bi gaḻꞌlallꞌ beṉꞌ yell c̱haꞌki ka chonoꞌ c̱he beṉꞌkaꞌ bi chzenag c̱hoꞌ.
Chios c̱haꞌ,
linꞌ chkwashꞌ chkweejoꞌ netoꞌ.
12 Daa bibi dillꞌ wen chchej choꞌa ḻolleekaꞌ,
yeḻꞌ chep chaꞌlallꞌ c̱heꞌkaꞌ yidobshgagakilenꞌ.
Naꞌ daa chyishjgakeꞌ biaꞌ blagꞌ c̱he beṉꞌ naꞌ daa choeꞌgakeꞌ dillꞌ wxiyeꞌkaꞌ,
13 bisya bisḻengachgakeꞌ daa chshaagakeꞌ liꞌ.
¡Btesh bḻoagachgakeꞌ naꞌ ni stoeꞌ bich igaaṉ!
Naꞌ iṉezi beṉꞌ Chiozaꞌ chṉabiꞌe xiiṉ dia c̱he dii Jacobaꞌ
lente yogꞌ beṉꞌ lleꞌ zbii zkaaṉ yell-lioni.
14 Ḻegakeꞌ chiyoogakeꞌ waḻkaꞌ,
naꞌ chongakeꞌ sshag ka bekwꞌ ba chxia,
naꞌ choshꞌ chlallꞌgakeꞌ yellaꞌ.
15 Tagakeꞌ c̱hiljgakeꞌ daa gaogakeꞌ,
naꞌ gonyeshꞌgakeꞌ do yel daa bi nelj nllaꞌgakileꞌ.
16 Per nadꞌ goḻ iṉiaꞌ liꞌ,
daa nakoꞌ beṉꞌ yeḻꞌ wak choo yeḻꞌ wak xen,
naꞌ shzil weꞌlawaa liꞌ daa nakoꞌ beṉꞌ chiyeshꞌlallii,
ḻaꞌ linꞌ chaklenoꞌ nadꞌ,
naꞌ chap chwioꞌ nadꞌ lao diikaꞌ chak c̱haꞌ.
17 Goḻ iṉiaꞌ liꞌ,
Chios c̱haꞌ,
daa chonoꞌ nadꞌ wal naꞌ chkweejoꞌ nadꞌ kwenc̱he kono bi goni nadꞌ.
Linꞌ ḻe chakiloꞌ nadꞌ,
Chios c̱haꞌ.