Salmo 58
1 Ka leꞌ chṉabiaꞌle,
bi chonle yeḻꞌ josc̱his c̱he beṉꞌ ka chiyaḻꞌ gakan,
ni bi chc̱hoglole c̱he beṉꞌ kon ka nakan.
2 San chgooləle xṉezin gak mal c̱he beṉꞌ;
naꞌ yeḻꞌ zeshꞌ yeḻꞌ zban c̱helenaꞌ chwall chsheban beṉꞌ doxen ganaꞌ chṉabiaꞌle.
3 Beṉꞌ malkaꞌ ḻoo ḻee xṉeekaꞌte chḻaalaꞌogakeꞌ daa nak dii ḻicha,
naꞌ kate chaljgakeꞌ nogakeꞌ de wxiyeꞌnaꞌ.
4 Ka yierb c̱he beḻaꞌ nak dillꞌkaꞌ chchej choꞌa ḻolleekaꞌ.
Nakgakeꞌ ka beḻ zṉianaꞌ,
banaꞌ bi chzenag c̱he beenaꞌ choḻxileꞌb.
5 Ka beḻ zṉianaꞌ bi chzenag c̱he beenaꞌ choḻxileꞌb ḻaꞌkzi ḻe zeyi c̱heꞌ choḻxileꞌ beḻkaꞌ,
kaꞌkzan chon beṉꞌ wxiyeꞌkaꞌ,
bi chzenaggakeꞌ c̱he dii wennaꞌ.
6 Chios c̱haꞌ,
blej bshoshjgach beṉꞌ malkaꞌ,
beṉꞌkaꞌ nak ka bell zṉiakaꞌ,
kwenc̱he bich bi gak gongakileꞌ beṉꞌ.
7 Gakshga c̱hegakeꞌ ka nis daa chlalj lo yonaꞌ naꞌ chinitten,
naꞌ gashj goxjshga xiskaꞌ chzaḻꞌ xis wix̱itꞌ c̱heꞌkaꞌ.
8 Gakshga c̱hegakeꞌ ka chak bḻosjaꞌ katꞌ chiyomꞌ;
naꞌ ka bdoꞌnaꞌ net ka chaljbꞌ,
ni bi chleꞌibꞌ beeniꞌ c̱he wbillaꞌ.
9 Ax̱t bikz gakbeꞌgakileꞌ yiyoll yido yeḻꞌ mban c̱heꞌkaꞌ.
Ka chak c̱he to yag yeshꞌ dii lii chḻallꞌtieꞌ
naꞌ chde beꞌnaꞌ choaꞌn daa,
ka gakshga c̱hegakeꞌ.
10 Naꞌ beenaꞌ zej shḻi yiba yizakileꞌ katꞌ ileꞌileꞌ ba chgoo chyixj beṉꞌ malkanꞌ,
naꞌ ba lallee lo xc̱heneꞌkaꞌ.
11 Naꞌ iṉa beṉꞌ yell-lionaꞌ:
“Dii ḻicha de laxj beenaꞌ zej shḻi,
naꞌ dii ḻicha zoa to Chios,
beenaꞌ chc̱hoglo c̱he beṉꞌ yell-liokaꞌ.”