Salmo 57
1 Biyeshꞌlallꞌgachi nadꞌ,
Chios c̱haꞌ.
Biyeshꞌlallꞌgachi nadꞌ,
ḻaꞌ linꞌ nx̱enilallaa.
Bengach c̱haꞌ ka chon banaꞌ zoa x̱ilin chyellb xiiṉbkaꞌ xan x̱ilbaꞌ,
ḻaꞌ nonꞌ lez wkweejoꞌ nadꞌ
ax̱t ka yiyoll yido te dii nxollkaꞌ zoaꞌ.
2 Chṉabꞌ yeḻꞌ goklen lao Chiozaꞌ,
beenaꞌ nak ḻiizelozi beṉꞌ choo beṉꞌ xen,
beenaꞌ chakleneꞌ nadꞌ lao yogꞌḻoḻte dii chak c̱haꞌ.
3 Naꞌ yabanaꞌ ganaꞌ lliatieꞌ wseḻee yeḻꞌ goklen c̱heꞌnaꞌ
naꞌ yisleꞌ nadꞌ lao beṉꞌkaꞌ chinaḻꞌ chino nadꞌ.
Chiozaꞌ wliꞌe chakileꞌ nadꞌ naꞌ choneꞌ ka neꞌ.
4 Zoaꞌ ladj beṉꞌkaꞌ nak ka bell zṉia,
bakaꞌ chxoxj chtin beṉꞌ.
Naꞌ kon ya lo toshꞌkaꞌ,
naꞌ xis wix̱itꞌ c̱heꞌkaꞌ,
naꞌ yesya c̱hekaꞌ daa nḻatitə chlliayiꞌgakeꞌ beṉꞌ.
5 ¡Shajlaꞌoshgoꞌ yabanaꞌ ganaꞌ zoꞌ,
Chios c̱haꞌ,
naꞌ doxen zbii zkaaṉ yell-lioni kooshgagakeꞌ liꞌ balaaṉ!
6 Beṉꞌkaꞌ chakziꞌ chakzbani nadꞌ ba chinogakeꞌ kwenc̱he wzapgakeꞌ nadꞌ,
naꞌ chakyeshidꞌ ka chongakileꞌ nadꞌ.
Ba wdengakeꞌ to yech zitj lo nez c̱haꞌnaꞌ daa cheengakileꞌ ixopꞌ ḻoꞌinnaꞌ,
per ḻekzgakeꞌ ba bxopgakeꞌ ḻoꞌinnaꞌ.
7 Chios c̱haꞌ,
toshiizi zoac̱hec̱hꞌ nx̱enilallaa liꞌ,
naꞌ do yic̱hj do lallaa goḻ iṉiaꞌ liꞌ.
8 Chiyaḻꞌ se kwaslenꞌ diikaꞌ llia kwerd c̱heyin,
naꞌ ka ba chzoan xe soloaꞌ goḻ iṉelenꞌgakan liꞌ.
9 Chios c̱haꞌ,
weꞌlawaa liꞌ naꞌ goḻ iṉiaꞌ liꞌ
lao beṉꞌkaꞌ zaꞌ wde wdeli yell naꞌ yogꞌ nación.
10 Ḻaꞌ yeḻꞌ chaki c̱hoꞌnaꞌ,
Chios c̱haꞌ,
nakan dii xen wal inlleb ka yabanaꞌ daa bi nakbiaꞌ gate chiyoll chidon,
naꞌ toshiizi chonoꞌ yogꞌ diikaꞌ chc̱heboꞌ.
11 ¡Shajlaꞌoshgoꞌ yabanaꞌ ganaꞌ zoꞌ,
Chios c̱haꞌ,
naꞌ doxen zbii zkaaṉ yell-lioni shoꞌshgoꞌ balaaṉ!