Salmo 56
1 Biyeshꞌlallꞌgachi nadꞌ,
Chios c̱haꞌ,
ḻaꞌ zoa beṉꞌ chinaḻꞌ chinoeꞌ nadꞌ,
naꞌ toshiizi zaꞌgakeꞌ chdiḻ-lengakeꞌ nadꞌ naꞌ chsakꞌziꞌgakeꞌ nadꞌ.
2 Beṉꞌkaꞌ chakziꞌ chakzbani nadꞌ toshiizi chinaḻꞌ chinogakeꞌ nadꞌ;
beṉꞌ zan beṉꞌkaꞌ zaꞌgakeꞌ chdiḻ-lengakeꞌ nadꞌ,
naꞌ nakgakeꞌ beṉꞌ chep chaꞌlallꞌ.
3 Katꞌkaꞌ chall chllebꞌ,
nonꞌ lez linꞌ gaklenoꞌ nadꞌ.
4 Nonꞌ lez Chiozaꞌ naꞌ choeꞌlawaaneꞌ daa ba bc̱hebeꞌ gakleneꞌ nadꞌ.
Nonꞌ lez Chiozaꞌ naꞌ bi gall illebꞌ
shi bi goni beṉꞌ yell-lioni nadꞌ.
5 Toshiizi chbell chṉegakeꞌ c̱haꞌ;
lillinzə cheengakileꞌ wzoaziꞌyaagakeꞌ nadꞌ.
6 Naꞌ chbeꞌnogakeꞌ nadꞌ,
naꞌ chwiagakeꞌ gan zyaa,
chbezgakeꞌ bat gatꞌ latj witgakeꞌ nadꞌ.
7 Bengach ka sakꞌziꞌgakeꞌ ni c̱he dii malaꞌ chongakeꞌ;
naꞌ blliayiꞌgach beṉꞌki chshaa liꞌ,
Chios c̱haꞌ.
8 Liꞌ ṉeziloꞌ baḻ shii ba gokshejlallaa,
naꞌ ṉeziloꞌ kaꞌkꞌ nis xc̱hell ba bxop jalawꞌki,
naꞌ ḻee libr c̱hoꞌnaꞌ nzejgakoꞌn.
9 Katꞌkaꞌ iṉabꞌ gaklenoꞌ nadꞌ,
beṉꞌkaꞌ chakziꞌ chakzbani nadꞌ yixoṉjgakeꞌ.
Ḻaꞌ kwasḻoḻ ṉezidꞌ liꞌ chaklenoꞌ nadꞌ,
Chios c̱haꞌ.
10 Nx̱enilallaa Chiozaꞌ,
naꞌ choeꞌlawaaneꞌ ka mba nak xtilleenaꞌ,
Nx̱enilallaa X̱ancho Chiozaꞌ,
naꞌ choeꞌlawaaneꞌ ka mba nak xtilleenaꞌ.
11 Nonꞌ lez Chiozaꞌ naꞌ bi chall chllebꞌ
shi bi goni beṉꞌ yell-lioni nadꞌ.
12 Gonꞌ diikaꞌ nc̱hebꞌ lawoꞌnaꞌ,
Chios c̱haꞌ,
naꞌ weꞌlawaa liꞌ,
13 ḻaꞌ ba bisloꞌ nadꞌ lao yeḻꞌ witaꞌ,
naꞌ bi biꞌo latj bi gak c̱haꞌ,
kwenc̱he soa kwezꞌ lawoꞌnaꞌ naꞌ lo beeniꞌ daa nsaꞌ yeḻꞌ mbannaꞌ.