Salmo 55
1 Chios c̱haꞌ,
bzenaggach dga niaꞌ liꞌ,
naꞌ bi gongachoꞌ ka beṉꞌ bi cheni dga chatꞌyoidꞌ liꞌ.
2 Bzenaggach c̱haꞌ naꞌ goklengach nadꞌ.
Chṉabidꞌ liꞌ gaklenoꞌ nadꞌ,
ḻaꞌ ḻe chakshejlallaa
3 naꞌ chall chllebꞌ ka chṉe beṉꞌkaꞌ chakziꞌ chakzbani nadꞌ,
naꞌ daa chsakꞌziꞌ beṉꞌ malkaꞌ nadꞌ.
Ḻaꞌ chiya dii ba bengakeꞌ c̱haꞌ
naꞌ chinaḻꞌ chinogakeꞌ nadꞌ daa chllaa chlokgakeꞌ.
4 Ḻe chakyeshii ḻoo yic̱hjlallꞌdawaani
naꞌ dii nxollkaꞌ nsaꞌ yeḻꞌ witaꞌ ba wlooshebgakan nadꞌ.
5 Naꞌ ax̱t chxiztitaꞌ daa ḻe chllebꞌ,
naꞌ ḻe ba yooshebchgaꞌ.
6 Naꞌ niaꞌ:
“Sheḻꞌkaꞌ gak soaꞌ ka chzo palomaꞌ,
naꞌ soaꞌ shaa ganaꞌ bich bi gak c̱haꞌ.
7 Naꞌ soaꞌ shaa zitꞌ wal;
lljasoaꞌ ganaꞌ kono zoa.
8 Wtalallaa wxoṉjidꞌ dii zedkaꞌ chak c̱haꞌ,
diikaꞌ nak ka yejpeꞌ wal.”
9 Chios c̱haꞌ,
bi wiꞌo latj shoꞌ xṉezi daa cheeni beṉꞌ malkaꞌ gongakeꞌ.
Benllej bengaṉgakileꞌ.
Ḻaꞌ yell c̱haꞌni,
chen chleꞌidꞌ ka chsakꞌziꞌgakeꞌ beṉꞌ naꞌ ka chakdiḻ-lengakeꞌ beṉꞌ.
10 Ka tella ka waḻ nec̱hjyoll dii malkaꞌ yell c̱haꞌni,
naꞌ chiꞌchgan chiya dii mal.
11 Chonchgagakeꞌ daa chlliayiꞌn beṉꞌ wlall c̱haꞌki,
naꞌ toshiizi chsakꞌziꞌgakeꞌ naꞌ chziyeꞌgakeꞌ beṉꞌ.
12 Sheḻꞌ to beṉꞌ chakziꞌ chakzbani nadꞌ biz chon chneꞌ nadꞌ,
wzo wzakidꞌ daa biz chon chneꞌ,
sheḻꞌkaꞌ.
Wa sheḻꞌ chzoshyiꞌ to beṉꞌ chleꞌzbanileꞌ nadꞌ,
wak wkwashidee,
sheḻꞌkaꞌ.
13 Per liꞌ,
naktioꞌ bishꞌ ljwellꞌ
naꞌ ḻiizelozi nllaguicho,
benziloꞌ nadꞌ kaꞌ.
14 C̱hop c̱hopchon wdacho ladj beṉꞌkaꞌ lleꞌ choꞌa lill x̱latjə Chiozaꞌ,
naꞌ mbalaz billaguicho beꞌcho dillꞌ.
15 ¡Gox̱ꞌshga yeḻꞌ witaꞌ tokonganzə beṉꞌkaꞌ chakziꞌ chakzbani nadꞌ!
Naꞌ shiꞌa shbangakeꞌ shoꞌgakeꞌ ḻoo banaꞌ,
ḻaꞌ lillinzi dii malaꞌ yoo ḻoo yic̱hjlallꞌdoꞌekaꞌ.
16 San nadꞌ iṉabidꞌ Chiozaꞌ gakleneꞌ nadꞌ,
naꞌ ḻekzeꞌ yisleꞌ nadꞌ.
17 Ka shzil,
ka gobill,
ka shlleꞌ,
chatꞌyoidee gakleneꞌ nadꞌ,
naꞌ chzenagueꞌ c̱haꞌ.
18 Naꞌ yisleꞌ nadꞌ lo ṉiꞌa naꞌ beṉꞌkaꞌ chdiḻ-len nadꞌ,
ḻaꞌkzi beṉꞌ zan nakgakeꞌ.
19 Chios,
beenaꞌ chṉabiaꞌ zejḻi kaṉi,
wzenagueꞌ c̱haꞌ naꞌ wc̱hiꞌ wsakee ḻegakeꞌ,
ḻaꞌ bi chsangakeꞌ daa chongakeꞌ
ni bi chall chllebgakeꞌ Chiozaꞌ.
20 Chidiḻ-lentezgakeꞌ beṉꞌkaꞌ zoalengakeꞌ wen;
naꞌ bi chongakeꞌ daa chc̱hebgakeꞌ laweꞌkaꞌ.
21 Dillꞌkaꞌ choeꞌgakeꞌ nakgakan dillꞌ gull-lallꞌ,
per ḻoo yic̱hjlallꞌdoꞌekaꞌ chzaꞌlallꞌgakeꞌ tiḻ-lengakeꞌ beṉꞌ.
Ḻe gull-lallꞌ chshaljgakeꞌ,
per choꞌa dillꞌkaꞌ choeꞌgakeꞌ nakan ka to yesya daa nḻatit,
daa chlliayiꞌn beṉꞌ.
22 Ben lo naꞌ X̱ancho Chiozaꞌ yogꞌ dii zed c̱hoꞌkaꞌ,
naꞌ ḻekzeꞌ gakleneꞌ liꞌ.
Biga kwej yic̱hjeꞌ beenaꞌ chzoa xtilleenaꞌ.
23 Liꞌ,
Chios c̱haꞌ,
gonoꞌ kwenc̱he beṉꞌ wen xyakaꞌ naꞌ beṉꞌ wxiyeꞌkaꞌ bi idiagakeꞌ,
naꞌ wsi wc̱hogoꞌ yeḻꞌ mban c̱heꞌkaꞌ.
San nadꞌ,
linꞌ nx̱enilallaa.