Salmo 54
1 Chios c̱haꞌ,
bislagach nadꞌ daa nx̱enilallaa liꞌ,
naꞌ goklengach nadꞌ kon yeḻꞌ wak c̱hoꞌnaꞌ.
2 Chios c̱haꞌ,
bzenaggach dga chṉabidꞌ liꞌ,
bzegach nagoꞌ ka nak dillꞌki choeꞌlenꞌ liꞌ.
3 Ḻaꞌ beṉꞌ chaꞌsibkaꞌ,
beṉꞌkaꞌ nak beṉꞌ zeshꞌ beṉꞌ zban,
chdiḻ-lengakeꞌ nadꞌ
naꞌ cheengakileꞌ witgakeꞌ nadꞌ.
Naꞌ bi chjadin chjazaꞌlallꞌgakeꞌ Chiozaꞌ.
4 Per Chiozaꞌ chakleneꞌ nadꞌ;
X̱ancho Chiozaꞌ chap chwieꞌ yeḻꞌ mban c̱haꞌni.
5 Naꞌ ḻeꞌ yiziꞌe wzon c̱he beṉꞌkaꞌ chakziꞌ chakzbani nadꞌ.
¡Chios c̱haꞌ,
blliayiꞌgakeꞌ,
ḻaꞌ liꞌ chonoꞌ ka chc̱heboꞌ!
6 Do yic̱hj do lallaa witꞌ bayix̱ꞌkaꞌ goṉꞌ liꞌ,
naꞌ weꞌlawaa liꞌ daa nakoꞌ beṉꞌ wen.
7 Ḻaꞌ ba bisloꞌ nadꞌ lao yogꞌḻoḻte yeḻꞌ ziꞌkaꞌ ba gok c̱haꞌ,
naꞌ bleꞌteidꞌ blliayoo beṉꞌkaꞌ gokziꞌ gokzbani nadꞌ.