Salmo 53
1 Beenaꞌ bi nteyi neꞌ ḻoo yic̱hjlallꞌdoꞌenaꞌ:
“Aga no Chios zoa.”
Yogꞌzə beṉꞌ ba wxiṉj yic̱hjlallꞌdoꞌekaꞌ,
naꞌ dii zban inlleb chongakeꞌ.
¡Ni sto kochno chon wen!
2 X̱ancho Chiozaꞌ zoeꞌ yabanaꞌ chwieꞌ beṉꞌ yell-lioni,
kwenc̱he shi ga zoa beṉꞌ nteyi,
beṉꞌ cheenileꞌ gombiꞌeneꞌ.
3 Per yogꞌzgakeꞌ ba wlaagakeꞌ lo nez wennaꞌ,
naꞌ ba chx̱iṉj chḻengakeꞌ.
¡Kochkzno zoa chon daa nak wen,
niga zi tlishee!
4 Beṉꞌkaꞌ chon dii malaꞌ nakgakeꞌ beṉꞌ bi nteyi.
Ka beṉꞌ chisbill chisto to yeḻꞌ waw,
chisya chislengakeꞌ bi de c̱he beṉꞌ yell c̱haꞌkaꞌ,
naꞌ bi choeꞌḻwillgakeꞌ Chiozaꞌ.
5 Ḻaꞌkzi bibi gotꞌ dii gonan ka gall illebgakeꞌ,
ḻe bxiztitgakeꞌ daa bllebgakeꞌ.
Ḻaꞌ Chiozaꞌ ba bzoles bzollineꞌ llit wet c̱he beṉꞌkaꞌ wdiḻ-len liꞌ.
Naꞌ ba wxiꞌgakeꞌ yeḻꞌ ztoꞌ lawoꞌnaꞌ,
daa bleꞌzbani Chiozaꞌ ḻegakeꞌ.
6 ¡Sheḻꞌ yidgach Chiozaꞌ,
beenaꞌ zoa yaa Siónnaꞌ,
yisleꞌ choꞌ,
beṉꞌ Israel,
lo naꞌ beṉꞌ malkaꞌ!
Naꞌ katꞌkaꞌ gon Chiozaꞌ ka yiyak wen c̱hecho sto shii
yibachgaicho choꞌ nakcho beṉꞌ Israel,
choꞌ nakcho xiiṉ dia c̱he dii Jacobaꞌ.