Salmo 52
1 Liꞌ beṉꞌ zeyi c̱heyin,
¿bic̱he chshalj chshonzoꞌ c̱heyi dii malaꞌ chonoꞌ?
Yeḻꞌ chiyeshꞌlallii c̱he Chiozaꞌ toshiizi den.
2 Choꞌa ḻolloonaꞌ nakan ka yesya dii nḻatit
daa chgoolenoꞌn xṉezin wlliayoo beṉꞌ,
naꞌ choolalloo siyeꞌlenoꞌn.
3 Chakchiloꞌ dii malaꞌ aga ka dii wennaꞌ,
naꞌ chakchiloꞌ yeḻꞌ wxiyeꞌnaꞌ aga ka dillꞌ ḻinaꞌ.
4 Ḻe chibailoꞌ yogꞌ dillꞌ wxiyeꞌnaꞌ,
naꞌ choꞌa ḻolloonaꞌ chchejan daa chlliayiꞌn beṉꞌ.
5 Daan,
Chiozaꞌ wlliayiꞌtekzeꞌ liꞌ.
Wzapeꞌ liꞌ,
naꞌ yibejeꞌ liꞌ ganaꞌ nak lill xḻatjoꞌ,
naꞌ wsi wc̱hogueꞌ yeḻꞌ mban c̱hoꞌnaꞌ.
6 Naꞌ beṉꞌkaꞌ chon daa zej shḻi ileꞌgakileꞌ ka gak c̱hoꞌ naꞌ illebgakeꞌ;
naꞌ wxillgakileꞌ liꞌ,
iṉagakeꞌ:
7 “Beenin bi bx̱enilallee Chiozaꞌ kwenc̱he gap wwieꞌneꞌ,
san bx̱enilallee yeḻꞌ wniꞌa xennaꞌ gotꞌ wcheꞌileꞌ,
naꞌ wzoayideꞌ beneꞌ dii malaꞌ.”
8 Per nadꞌ zoaꞌ mbalaz ka to yag olivo dii chakshaoꞌlallii,
daa zoa lill xḻatj Chiozaꞌ.
Naꞌ nx̱enilallaa yiyeshꞌlallii Chiozaꞌ nadꞌ toshiizi naꞌ zejḻi kaṉi.
9 Chios c̱haꞌ,
toshiizi weꞌlawaa liꞌ ni c̱heyi daa ba benoꞌ c̱haꞌ.
Wx̱enilallaa liꞌ daa nakoꞌ beṉꞌ wen,
naꞌ weꞌlawaa liꞌ ladj lkweꞌ beṉꞌkaꞌ nak lallꞌ noꞌ.