Salmo 51
1 Chios c̱haꞌ,
biyeshꞌlallꞌgachi nadꞌ,
kon ka nak yeḻꞌ chaki c̱hoꞌnaꞌ;
naꞌ kon ka nak yeḻꞌ chiyeshꞌlallii c̱hoꞌnaꞌ,
bisol biṉitgach saaxya c̱haꞌkaꞌ.
2 Bix̱is biyibgach diikaꞌ ndaꞌ nchen yic̱hjlallꞌdawaani,
naꞌ bikwasgach saaxyakaꞌ benꞌ.
3 Chiyakbeꞌidꞌ nakꞌ beṉꞌ widenag,
naꞌ dii malkaꞌ benꞌ toshiizi chao chdian nadꞌ.
4 Ba bx̱iṉj bḻenꞌ lawoꞌnaꞌ;
ba benꞌ daa chakzbaniloꞌ.
Daa nc̱hogbiꞌo gak c̱he beṉꞌ saaxyanaꞌ nakbiaꞌcha zejan shḻi,
naꞌ chonoꞌ yeḻꞌ josc̱his kon ka chiyaḻꞌ gakan.
5 Dii ḻicha kon ka goljtiaꞌ ba nakꞌ beṉꞌ mal;
ba nakkzꞌ beṉꞌ saaxya ka wyaꞌ wbiṉꞌ ḻoo ḻee xṉaꞌnaꞌ.
6 Ṉezidꞌ cheeniloꞌ soaꞌ do yic̱hj do lallaa,
naꞌ ḻoo yic̱hjlallꞌdawaani chzajniiloꞌ nadꞌ yeḻꞌ sinꞌ c̱hoꞌnaꞌ.
7 Bikwasgach diikaꞌ ndaꞌ nchen yic̱hjlallꞌdawaani,
naꞌ yiyakꞌ beṉꞌ nxi nyech.
Bix̱is biyib yic̱hjlallꞌdawaani,
naꞌ yiyakan xtil walch aga ka beyaa.
8 Ben ka yizoa yeḻꞌ xabanaꞌ ḻoo yic̱hjlallꞌdawaani,
naꞌ yiba yizakidꞌ;
naꞌ yiyakshaoꞌlallidꞌ daa ba bdioꞌ nadꞌ lo yeḻꞌ zakꞌziꞌnaꞌ.
9 Bisol biṉitgach saaxyakaꞌ chonꞌ lawoꞌnaꞌ,
naꞌ bixigach yogꞌḻoḻ dii malkaꞌ benꞌ.
10 Chios c̱haꞌ,
bix̱is biyib yic̱hjlallꞌdawaani,
naꞌ bikob yeḻꞌ mban c̱haꞌni,
naꞌ ben nadꞌ to beṉꞌ zec̱hec̱h zetip lawoꞌnaꞌ.
11 Bi wzoꞌ nadꞌ kaꞌlə,
ni bi yiḻaalaꞌogachoꞌ nadꞌ Espíritu Sánto c̱hoꞌnaꞌ.
12 Bengach ka yiba yizakidꞌ sto shii daa ba bisloꞌ nadꞌ;
naꞌ bengach ka gakꞌ beṉꞌ wizoa dillꞌ.
13 Naꞌ wliidꞌ beṉꞌ widenagkaꞌ nez ḻi c̱hoꞌnaꞌ
naꞌ beṉꞌ saaxyakaꞌ yiyaj yilengakileꞌ lawoꞌnaꞌ.
14 Chios c̱haꞌ,
bisla nadꞌ kwenc̱he bi ileꞌidꞌ yeḻꞌ zakꞌziꞌ c̱he xyanaꞌ benꞌ,
ḻaꞌ linꞌ chisloꞌ nadꞌ.
Naꞌ goḻ iṉiaꞌ wiꞌa dillꞌ nan liꞌ nakoꞌ beṉꞌ ḻi beṉꞌ shaoꞌ.
15 Chios c̱haꞌ,
goklen nadꞌ weꞌlawaa liꞌ.
16 Aga chṉaboꞌ witꞌ bayix̱ꞌ naꞌ wzeyꞌb lawoꞌnaꞌ;
sheḻꞌ nakan kaꞌ,
naꞌ gonaꞌn,
per aga ḻennanꞌ chazlalloo.
17 Daa llialote chazlalloo,
Chios c̱haꞌ,
daa gakyeshii beṉꞌ do yic̱hj do lallee c̱he dii malaꞌ ba beneꞌ.
Naꞌ bi choniloꞌ nakzi beenaꞌ chiyaj chileni do yic̱hj do lallee.
18 Bengach ka gak wen c̱he yell Jerusalénnaꞌ,
bengach ka yiḻisgakeꞌ zeenaꞌ nec̱hjan.
19 Naꞌch yidwaꞌntoꞌ lawoꞌnaꞌ yogꞌ diikaꞌ chiyaḻꞌ goṉntoꞌ liꞌ,
naꞌ witntoꞌ bayix̱ꞌkaꞌ naꞌ wzeyꞌntoꞌgakb lawoꞌnaꞌ.