Salmo 50
1 X̱ancho Chiozaꞌ,
beenaꞌ zeelo nak beṉꞌ choo beṉꞌ xen,
ba wṉieꞌ,
naꞌ chaxeꞌ beṉꞌkaꞌ lleꞌ doxen lo yell-lioni,
ka beṉꞌkaꞌ lleꞌ ganaꞌ chlaꞌlə wbillaꞌ naꞌ ka beṉꞌkaꞌ lleꞌ ganaꞌ chxoalan.
2 Chiozaꞌ zoeꞌ yell Siónnaꞌ,
ganaꞌ zeelo nak xochi,
naꞌ naꞌ chliꞌe balaaṉ xen c̱heꞌnaꞌ daa nak ka beeniꞌ dii chzeeniꞌ doxen.
3 Ba zaꞌ Chios c̱hechonaꞌ naꞌ zee zṉia,
nkwialoeꞌ yeḻꞌ chllaa c̱heꞌnaꞌ daa nak ka to yiꞌ daa wlliayiꞌ wlliaden,
naꞌ ḻekzkaꞌ nakan ka to yejpeꞌ xen wal nec̱hjyoban ḻeꞌ.
4 Naꞌ iṉieꞌ yabanaꞌ len yell-lioni
kwenc̱he soagakan de tasc̱hiw katꞌ wc̱hogloeꞌ c̱he beṉꞌkaꞌ nak yell c̱heꞌ.
Naꞌ iṉeꞌ:
5 “Yidiꞌa yillag beṉꞌkaꞌ chzoa xtillaanaꞌ,
beṉꞌkaꞌ bc̱heb gongakeꞌ ka nlliaꞌ biaꞌ,
naꞌ betgakeꞌ bayix̱ꞌkaꞌ lawaꞌ kwenc̱he benḻigakeꞌ daa bc̱hebgakeꞌ.”
6 Yabanaꞌ choꞌen dillꞌ c̱he Chiozaꞌ nakeꞌ beṉꞌ ḻi beṉꞌ shaoꞌ,
naꞌ kwineꞌ wc̱hogbiꞌe c̱he beṉꞌ ka chiyaḻꞌ.
7 “Ḻi wzenag,
leꞌ beṉꞌ Israel,
leꞌ nakle lallꞌ naꞌ,
ni wiꞌa dillꞌ ka nakle.
Nadꞌ Chios,
nakꞌ Chios c̱hele.
8 Aga niaꞌ bi chonle wen daa toshiizi chzanileꞌ bayix̱ꞌkaꞌ chitle lawaꞌ,
naꞌ bakaꞌ chzeyle lawaꞌ katꞌ choeꞌlaꞌole nadꞌ.
9 Per aga chyalljidꞌ goṉle nadꞌ meꞌdoꞌ c̱helekaꞌ,
ni shib ba mash c̱helekaꞌ,
bakaꞌ nllaꞌle ḻoo leej c̱helekaꞌ.
10 Ḻaꞌ ba c̱haꞌ nak yogꞌḻoḻ bayix̱ꞌ,
ka ba lleꞌ yaa yao ka ba chisgol beṉꞌ.
11 Ba c̱haꞌ nak bakaꞌ chzo,
bakaꞌ lleꞌ yaa yaokaꞌ,
naꞌ yogꞌ bakaꞌ chda lyix̱aa.
12 Sheḻꞌ nadꞌ chbiḻ chdonꞌ,
aga liꞌ iṉabidaꞌn,
ḻaꞌ yell-lioni nakan c̱haꞌ len yogꞌḻoḻ dii de lawinnaꞌ.
13 ¿Achakiloꞌ chawꞌ xpelꞌ gooṉkaꞌ,
wa cheejꞌ xc̱hen shib mashkanꞌ?
14 Daa llialo gonoꞌ,
goṉoꞌ nadꞌ yeḻꞌ chox̱ken;
naꞌ ben daa nc̱heboꞌ gonoꞌ lawaꞌ daa nakꞌ ḻiizelozi beṉꞌ choo beṉꞌ xen.
15 Beꞌḻwill nadꞌ katꞌ zoꞌ lo yeḻꞌ zakꞌziꞌnaꞌ,
naꞌ nadꞌ yislaꞌ liꞌ,
naꞌ liꞌ koo nadꞌ balaaṉ.”
16 Per Chiozaꞌ chiꞌe beṉꞌ malaꞌ:
“Bi chidoḻoo goni c̱hoꞌ ley c̱haꞌkaꞌ,
wa wzetjoꞌgakan.
17 Ḻaꞌ chakzbaniloꞌ dii wennaꞌ daa cheenidꞌ gonoꞌ,
naꞌ chzoꞌ choꞌa xtillaanaꞌ kaꞌlə.
18 Chibailoꞌ gonoꞌ txen beenaꞌ chziꞌ chban,
naꞌ beṉꞌkaꞌ zoate xoolin naꞌ chṉelengakeꞌ nool yoblə.
19 Choꞌa ḻolloonaꞌ chbell chṉelenoꞌn mal,
naꞌ chchejan dillꞌ wxiyeꞌ.
20 Naꞌ chyiljlalloo choꞌa xtillꞌ beṉꞌ bishꞌ goljoꞌnaꞌ,
naꞌ chbell chṉioꞌ c̱heꞌ.
21 Daa bwialozꞌ yogꞌḻoḻ diiki ba benoꞌ,
naꞌ gokiloꞌ nakꞌ ka liꞌ.
Per ṉaa wiꞌa dillꞌ ka nakoꞌ.
22 “Leꞌ bi chzenagle c̱haꞌ,
ḻi shajnii dga,
kwenc̱he ki soloaꞌ wxoxj wtinꞌ leꞌ,
naꞌ kono gak yisla leꞌ.
23 Beenaꞌ choṉeꞌ nadꞌ yeḻꞌ chox̱ken,
ḻenꞌ chgwee nadꞌ balaaṉ.
Naꞌ chislaꞌ beenaꞌ nsaꞌ c̱heyin wen.”