Salmo 49
1 Ḻi wzekachi nagle,
ka leꞌ lleꞌle yogꞌḻoḻ yellkaꞌ llia doxen yell-lioni,
2 ka beṉꞌ wen llin,
ka beṉꞌ chṉabiaꞌ,
ka beṉꞌ wniꞌa naꞌ ka beṉꞌ yeshꞌ.
3 Ni wiꞌa dillꞌ dii nak dillꞌ sinꞌ,
dillꞌ daa chalj ḻoo yic̱hjlallꞌdawaani daa wzajniin leꞌ.
4 Naꞌ siaꞌ wṉeyi c̱he ka nak dillaa de,
naꞌ goḻ-lenꞌ arpa c̱haꞌni kwenc̱he wzajniidꞌ bi zejin.
5 ¿Bic̱he gall illebzꞌ katꞌkaꞌ biz chak c̱haꞌ,
katꞌkaꞌ nec̱hjyob beṉꞌ malkaꞌ nadꞌ?
6 Ḻegakeꞌ nongakeꞌ lez yeḻꞌ wniꞌa c̱heꞌkaꞌ
naꞌ chshalj chshongakeꞌ c̱he yogꞌ daa napgakeꞌ.
7 Per bi gak yisla ljwellgakeꞌ,
ni bi gak c̱hixjgakeꞌ lao Chiozaꞌ kwenc̱he yisleꞌ yeḻꞌ mban c̱heꞌkaꞌ.
8 Ḻaꞌ dii xen wal inlleb zakꞌ yeḻꞌ mbannaꞌ,
naꞌ kono so saki c̱hixjan
9 kwenc̱he ibaneꞌ toshiizi
naꞌ bi goollꞌ iteb beli chen c̱heꞌnaꞌ.
10 Ṉezicho kwasḻoḻ nan yogꞌḻoḻz beṉꞌ chet,
ka beṉꞌ sinꞌ,
naꞌ ka beṉꞌ bi nteyi,
naꞌ yeḻꞌ wniꞌa c̱heꞌkaꞌ chgaaṉlen beṉꞌ yoblan.
11 Ḻaꞌkzi wdapgakeꞌ yell-liokaꞌ naꞌ bsiꞌgakeꞌn ka legakeꞌ,
katꞌ guetgakeꞌ,
ḻoo banaꞌchokzan gak lill xḻatjgakeꞌ toshiizi.
12 Beṉec̱haꞌ,
ḻaꞌkzi naptieꞌ yeḻꞌ wniꞌanaꞌ,
bi soeꞌ zejḻi kaṉi.
Ka chetchokzə bayix̱aan gueteꞌ.
13 Kanꞌ gak c̱he beṉꞌkaꞌ nx̱enilallꞌ kwingakeꞌ;
naꞌ kaꞌkzan gak c̱he beṉꞌkaꞌ chon kwingakeꞌ beṉꞌ choo beṉꞌ xen.
14 Ka beṉꞌ zinc̱heꞌ xilꞌdoꞌ c̱heyin,
kanꞌ yic̱heꞌ yeḻꞌ witaꞌ ḻegakeꞌ ḻoo banaꞌ.
Naꞌ goollꞌ iteb beli chen c̱heꞌkaꞌ,
naꞌ ḻoo banaꞌ gak lill xḻatjgakeꞌ.
Naꞌ illin to lla iṉabiaꞌ beṉꞌ ḻi beṉꞌ shaoꞌkaꞌ ḻegakeꞌ.
15 Per Chiozaꞌ yisleꞌ nadꞌ;
bi wiꞌe latj yigaaṉaꞌ lo ṉiꞌa naꞌ yeḻꞌ witaꞌ toshiizi,
san yiziꞌ yikee nadꞌ.
16 Bi gakshejlalloo katꞌ chatꞌ chbeꞌchga yeḻꞌ wniꞌa c̱he beṉꞌ,
naꞌ chgolch yeḻꞌ shaoꞌ c̱heꞌnaꞌ ḻoo yoo lilleꞌnaꞌ.
17 Ḻaꞌ katꞌkaꞌ gueteꞌ aga bi zinoaꞌ zinzieꞌ,
ni aga wizjano yeḻꞌ shaoꞌ c̱heꞌnaꞌ ḻeꞌ.
18 Ḻaꞌkzi shnon mbaneꞌ chakileꞌ ḻe mbalaz chak c̱heꞌ,
naꞌ choeꞌ beṉꞌ xtillee daa ḻe wen chak c̱heꞌ,
19 wllin lla yiyakeꞌ toz dii x̱ozxtoeꞌkaꞌ,
naꞌ bichga ileꞌileꞌ beeniꞌnaꞌ de yell-lioni.
20 Beṉec̱haꞌ,
ḻaꞌkzi nakeꞌ beṉꞌ wniꞌa,
aga wbaneꞌ toshiizi,
ka chetchokzə bayix̱aan gueteꞌ.