Salmo 48
1 Beṉꞌ choo beṉꞌ xen nak X̱ancho Chiozaꞌ,
naꞌ zeelo ḻenꞌ chidoḻee shajlawee
ganaꞌ nak yell c̱heꞌ,
lo yaanaꞌ ganaꞌ zoeꞌ.
2 Mbalaz inlleb nak yaa Siónnaꞌ
naꞌ ḻe chiba chizaki beṉꞌ ka nakan.
Nakan yell c̱he beenaꞌ zeelo chṉabiaꞌ
naꞌ zoan sibə ka yaa Safónnaꞌ.
3 Aga zeekaꞌ nec̱hj yellanꞌ chkweejan daa,
san Chiozaꞌ ba bliꞌe ḻenꞌ chkweejeꞌn.
4 Beṉꞌ wṉabiaꞌkaꞌ gokgakeꞌ toz
nan lljalliayiꞌgakeꞌ yellaꞌ.
5 Per ka bleꞌgakileꞌ yellaꞌ bibangakileꞌ,
naꞌ daa ḻe bllebgakeꞌ bixoṉjdogakeꞌ.
6 Naꞌ ax̱t chxiztitgakeꞌ daa ḻe bllebgakeꞌ,
naꞌ wyey wlagakeꞌ ka chey chla to noolə beṉꞌ chzan.
7 Naꞌ blliayoo ḻegakeꞌ ka chon to beꞌ wal daa chxoxj chtin barkw xenkaꞌ zaꞌ yell Társizaꞌ.
8 Kon ka nak dillꞌkaꞌ benintoꞌ,
kayeṉꞌ nak diikaꞌ ba bleꞌintoꞌ yell c̱he Chios c̱hechonaꞌ,
beenaꞌ zeelo nap yeḻꞌ wak choo yeḻꞌ wak xen,
naꞌ toshiizi zoeꞌ gap wwieꞌn.
9 Chios c̱haꞌ,
ganaꞌ nak lill xḻatjoꞌ
zentoꞌ wṉeyi yeḻꞌ chaki c̱hoꞌnaꞌ daa nak dii xen wal.
10 Doxente yell-lioni zeyi c̱hoꞌ
naꞌ kaꞌkzə doxente choeꞌlaꞌogakeꞌ liꞌ.
Naꞌ kon yeḻꞌ wṉabiaꞌ c̱hoꞌnaꞌ chc̱hogbiꞌo c̱he beṉꞌ kon ka chiyaḻꞌ.
11 Yiba yizaki beṉꞌkaꞌ lleꞌ yell Siónnaꞌ,
naꞌ ḻekzkaꞌ beṉꞌkaꞌ lleꞌ yelldoꞌkaꞌ llia Judánaꞌ,
daa chc̱hogbiꞌo c̱he beṉꞌ kon ka chiyaḻꞌ.
12 Ḻi shec̱hj ta choꞌa tlao yell Siónnaꞌ,
naꞌ ḻi wlab yoo sibkaꞌ llia lo zee yeḻkaꞌ nec̱hjan.
13 Ḻi wwiayeṉꞌ ka nak zee yeḻkaꞌ chkweejgakan ḻen,
naꞌ yoo yeḻkaꞌ ganaꞌ zoa beṉꞌ wṉabiaꞌkaꞌ,
kwenc̱he wx̱e willj weꞌlen dillꞌ lao xiiṉ dia c̱helekaꞌ ziꞌ zaak.
14 Ḻaꞌ Chios,
beeni choeꞌlaꞌocho,
nakeꞌ Chios c̱hecho zejḻi kaṉi.
Naꞌ ḻeꞌkzenꞌ kwee choꞌ lo xṉezeꞌnaꞌ toshiizi.