Salmo 47
1 Ka leꞌ lleꞌle yogꞌḻoḻ yellkaꞌ llia doxen yell-lioni,
¡ḻi kapꞌ naꞌlekaꞌ!
¡Ḻi goḻ iṉe X̱ancho Chiozaꞌ ḻega beṉꞌ chiba chizaki!
2 Ḻaꞌ X̱ancho Chiozaꞌ,
beenaꞌ nak ḻiizelozi beṉꞌ choo beṉꞌ xen,
nakeꞌ beṉꞌ gall illebcho,
naꞌ zeelo ḻenꞌ chṉabiꞌe doxen lo yell-lioni.
3 Beneꞌ lallꞌ naꞌcho yell zitꞌkaꞌ
naꞌ wṉabiaꞌchogakan.
4 Naꞌ wlejeꞌ to yell-lio dii nak mbalaz wal,
naꞌ nakin c̱hecho,
choꞌ nakcho xiiṉ dia c̱he dii Jacobaꞌ,
daa ḻe chakileꞌ choꞌ.
5 Naꞌ daa ḻe chiba chizakicho,
choꞌ nakcho beṉꞌ Israel,
ax̱t chosyaꞌicho naꞌ chkwellcho trompetkaꞌ
shlak zejcho lill xḻatj Chiozaꞌ lljasancho yiiṉaꞌ ganaꞌ yoo daa chonḻi daa bc̱hebeꞌ goneꞌ c̱hecho.
6 ¡Ḻi goḻ iṉe Chios c̱hechonaꞌ!
¡Ḻi goḻ iṉe beenaꞌ chṉabiaꞌ choꞌ!
7 Ḻaꞌ Chios c̱hechonaꞌ chṉabiꞌe doxen yell-lioni.
¡Ḻi goḻ to dii weꞌlawaꞌn ḻeꞌ!
8 Toz Chios c̱hechonanꞌ chṉabiꞌe doxen yell-lioni,
naꞌ llieꞌ ganaꞌ chṉabiꞌe.
9 Beṉꞌkaꞌ chṉabiaꞌ yogꞌ yellkaꞌ chidop chillaglengakeꞌ
beṉꞌkaꞌ nak yell c̱he Chiozaꞌ,
beenaꞌ beꞌlaꞌo dii Abrahamaꞌ.
10 Ḻaꞌ X̱ancho Chiozaꞌ nzoeꞌ beṉꞌkaꞌ chṉabiaꞌ lo yell-lioni;
naꞌ ḻeꞌ nakeꞌ ḻiizelozi beṉꞌ choo beṉꞌ xen.