Salmo 46
1 Chiozaꞌ chap chwieꞌ choꞌ lao bittezə dii nxoll,
naꞌ choneꞌ choꞌ wal;
naꞌ chakleneꞌ choꞌ katꞌ bi chak c̱hecho.
2 Naꞌ daan bi illebcho ḻaꞌkzi yinitlo yell-lioni,
wa ḻaꞌkzi yaakaꞌ iyishꞌgakan gchoḻ nisdoꞌnaꞌ,
3 wa ḻaꞌkzi chon nisdoꞌnaꞌ sshag wal naꞌ chas chatꞌ bḻi c̱heyinnaꞌ,
naꞌ ixoꞌ iṉib yaa yaokaꞌ ni c̱heyin.
4 Ka to yao dii chde to lo yell-lio naꞌ chyilan daa,
kanꞌ nak yeḻꞌ xaba daa de yellaꞌ ganaꞌ choeꞌlaꞌogakeꞌ Chiozaꞌ,
ganaꞌ non lill xḻatjə Chiozaꞌ,
beenaꞌ ḻiizelozi chṉabiaꞌ.
5 Chiozaꞌ zoeꞌ yell c̱heꞌnaꞌ,
naꞌ biga kwiayiꞌn.
Chiozaꞌ gakleneꞌn ka solo sheeniꞌ.
6 Beṉꞌkaꞌ lleꞌ yell zitꞌkaꞌ chosyaagakeꞌ daa chllebgakeꞌ
yinit yeḻꞌ wṉabiaꞌ c̱heꞌkaꞌ.
Naꞌ yell-lioni chyiṉj chyellan katꞌ chṉe Chiozaꞌ.
7 ¡X̱ancho Chiozaꞌ,
beenaꞌ ḻiizelozi nap yeḻꞌ wak choo yeḻꞌ wak xen,
zoaleneꞌ choꞌ!
¡Chiozaꞌ,
beenaꞌ bx̱enilallꞌ dii x̱ozxtoꞌcho Jacobaꞌ,
chkwashꞌ chkweejeꞌ choꞌ!
8 Ḻi da,
naꞌ ḻi wwia ka naklikz diikaꞌ ba ben X̱ancho Chiozaꞌ yell-lioni,
diikaꞌ chon ka chibanicho.
9 Ba bkwezeꞌ wdiḻkaꞌ chak doxen lo yell-lioni;
ba wdishjeꞌ xis wix̱itꞌkaꞌ,
naꞌ bxoxj btineꞌ ya lo toshꞌkaꞌ,
naꞌ bzey btieꞌ karretkaꞌ chc̱heꞌgakeꞌ lo wdiḻaꞌ.
Naꞌ wneꞌ:
10 “Ba gokkzə to kaꞌtꞌ ṉaa;
bich tiḻ-le.
Ḻi yiyakbeꞌi nadaan nakꞌ Chios.
Nadaan zeelo chṉabiaꞌ doxen lo yell-lioni,
naꞌ zeelo nadaan chidoḻaa shoꞌa balaaṉ doxen lo yell-lioni daa nakꞌ beṉꞌ choo beṉꞌ xen.”
11 Chiozaꞌ,
beenaꞌ nak ḻiizelozi beṉꞌ yeḻꞌ wak choo yeḻꞌ xen,
zoaleneꞌ choꞌ.
¡Chiozaꞌ,
beenaꞌ bx̱enilallꞌ dii x̱ozxtoꞌcho Jacobaꞌ,
chkwashꞌ chkweejeꞌ choꞌ!