Salmo 45
1 To llaꞌcha nak ḻoo lallꞌdawaani dillꞌ xochikaꞌ
naꞌ wiꞌan dillꞌ lao beenaꞌ chṉabiaꞌ.
Choꞌa ḻollaani zaklebin daa chc̱hin beenaꞌ chzej,
naꞌ chzejleneꞌn dillꞌ dii nak mbalaz.
2 ¡Liꞌ nakoꞌ ḻiizelozi beṉꞌ mbejlawin ladj beṉꞌ yell-lioki!
Dillꞌ goll-lallꞌ chchej choꞌa ḻolloonaꞌ.
Daan,
gon Chiozaꞌ wen c̱hoꞌ toshiizi.
3 Liꞌ bi chall chlleboꞌ shajoꞌ lo wdiḻaꞌ,
bc̱heḻ yesya c̱hoꞌnaꞌ kwit ḻiꞌonaꞌ,
kwenc̱he wliꞌn nakoꞌ beṉꞌ choo beṉꞌ xen.
4 Wyajlen yeḻꞌ wak choo yeḻꞌ wak xen c̱hoꞌnaꞌ naꞌ jalliayiꞌ beṉꞌkaꞌ chdiḻ-len liꞌ,
beṉꞌkaꞌ bi choolallꞌ daa nak dii ḻi naꞌ chc̱hiꞌ chsakꞌgakeꞌ beṉꞌ yeshꞌdoꞌkaꞌ.
Naꞌ gonlenoꞌ yeḻꞌ wak c̱hoꞌnaꞌ dii gonan ka yibani beṉꞌ.
5 Xiskaꞌ chzaḻꞌ xis wix̱itꞌ c̱hoꞌkaꞌ witgakan beṉꞌkaꞌ chakziꞌ chakzbani liꞌ
ka c̱hazgakan ḻoo lallꞌdoꞌekaꞌ.
6 Chios c̱haꞌ,
zejḻi kaṉi chṉabiꞌo,
naꞌ yeḻꞌ wṉabiaꞌ c̱hoꞌnaꞌ nakan dii zej shḻi.
7 Choolalloo daa nak dii ḻi dii shaoꞌ naꞌ chwiiloꞌ dii malaꞌ.
Daan,
Chios c̱hoꞌnaꞌ ba wlejeꞌ liꞌ
naꞌ ba beneꞌ ka soachoꞌ mbalaz aga ka beṉꞌkaꞌ nakoꞌ txen.
8 Do ka nak xoꞌnaꞌ yoon shii xḻaꞌ diikaꞌ chḻaꞌ zix̱ sia;
naꞌ ḻoo yoonaꞌ ganaꞌ chiꞌo chṉabiꞌo daa nongakeꞌ xochi kon daa le marfil,
lleꞌ beṉꞌkaꞌ chsill diikaꞌ llia kwerd c̱heyin kwenc̱he chonan ka yiba yizakiloꞌ.
9 Ladj noolkaꞌ zakii,
beṉꞌkaꞌ lleꞌ lill xḻatjoꞌnaꞌ ganaꞌ chṉabiꞌo,
lleꞌ noolkaꞌ nak xiiṉ beṉꞌ wṉabiaꞌkaꞌ;
naꞌ kwitoꞌnaꞌ ganaꞌ chiꞌo chṉabiꞌo ze noolaꞌ ikoo naꞌ non kwineꞌ xochi daa nc̱hineꞌ or daa zeelo nak wen.
10 Bzenag,
xiiṉdawaa,
bzenagyeṉꞌ ka nak dga iṉiaꞌ liꞌ:
Wlejyic̱hjoꞌ beṉꞌkaꞌ nakoꞌ txen ḻoo yoo lilloꞌnaꞌ naꞌ beṉꞌkaꞌ nak beṉꞌ wlall c̱hoꞌ.
11 Ḻaꞌ beenaꞌ chṉabiaꞌ chibaileꞌ ka xochi nakoꞌ;
naꞌ ḻenꞌ nakeꞌ x̱anoꞌ,
naꞌ chiyaḻꞌ wzoꞌ xtilleenaꞌ.
12 Naꞌ beṉꞌ Tírokaꞌ yidwaꞌgakeꞌ lawoꞌnaꞌ daa chzangakileꞌ,
naꞌ beṉꞌ wniꞌakaꞌ yidṉabgakeꞌ gaklenoꞌ ḻegakeꞌ.
13 Noolaꞌ ikaa beṉꞌ wṉabiaꞌnaꞌ
nakweꞌ xeꞌnaꞌ daa nak xochi daa nḻengakeꞌ do de or.
14 Xochi nlleb nak xeꞌnaꞌ nakweꞌ zjwaꞌgakeꞌneꞌ lao beṉꞌ wṉabiaꞌnaꞌ,
naꞌ ljwell nool weweekaꞌ nogakeꞌneꞌ.
15 Naꞌ chiba chizakꞌgakileꞌ zejgakeꞌ
ganaꞌ chiꞌ beenaꞌ chṉabiaꞌ.
16 Naꞌ liꞌ ṉaa,
beṉꞌ wṉabiaꞌ,
xiiṉoꞌkaꞌ iṉabiaꞌgakbꞌ ka wṉabiaꞌ dii x̱ozxtoꞌkaꞌ,
naꞌ gonoꞌ ka iṉabiaꞌgakbꞌ doxen ganaꞌ mbaniloꞌ.
17 Nadꞌ gonꞌ kwenc̱he yogꞌ dia dii ziꞌ zaꞌ lljadingakileꞌ liꞌ,
naꞌ yogꞌḻoḻ beṉꞌ lleꞌ yell-lioni weꞌlaꞌogakeꞌ liꞌ toshiizi.