Salmo 44
1 Chios c̱haꞌ,
ba benintoꞌ dillꞌkaꞌ beꞌ dii x̱ozxtoꞌntoꞌkaꞌ
c̱heyi diikaꞌ benoꞌ kanaꞌ wzoagakeꞌ.
2 Kon yeḻꞌ wak c̱hoꞌnaꞌ bsheshoꞌ beṉꞌkaꞌ wlleꞌ wllaꞌ yellkaꞌ gani mbanintoꞌ ṉaa,
beṉꞌkaꞌ bi bembiaꞌ liꞌ.
Bsakꞌziꞌgakoꞌneꞌ naꞌ bsheshgakoꞌneꞌ naꞌ benoꞌ yell-lio c̱heꞌkaꞌ lallꞌ naꞌ dii x̱ozxtoꞌntoꞌkaꞌ.
3 Aga daa bṉiagakileꞌ yesya c̱heꞌkanꞌ goki c̱hegakeꞌ yell-lioni,
ni aga kon ṉiꞌa neekanꞌ bengakeꞌn gan.
San daa gokiloꞌ ḻegakenꞌ,
wzoalengakoꞌneꞌ naꞌ goklengakoꞌneꞌ kon yeḻꞌ wak choo yeḻꞌ wak xen c̱hoꞌnaꞌ kwenc̱he gokin c̱hegakeꞌ.
4 Liꞌ nakoꞌ Chios c̱haꞌ naꞌ beṉꞌ wṉabiaꞌ c̱haꞌ,
linꞌ chonoꞌ kwenc̱he netoꞌ,
nakntoꞌ xiiṉ dia c̱he dii Jacobaꞌ,
chzakintoꞌ beṉꞌkaꞌ chdiḻ-len netoꞌ.
5 Daa chaklenoꞌ netonꞌ,
chlliayiꞌntoꞌ beṉꞌkaꞌ chakziꞌ chakzbani netoꞌ;
naꞌ kon yeḻꞌ wak c̱hoꞌnaꞌ chlej chshoshjntoꞌ beṉꞌkaꞌ chdiḻ-len netoꞌ.
6 Bi gonꞌ lez xis wix̱itꞌ c̱haꞌni,
ni yesya c̱haꞌni yislagakan nadꞌ lo wdiḻaꞌ.
7 Ḻaꞌ linꞌ goklenoꞌ netoꞌ kwenc̱he wxakintoꞌ beṉꞌkaꞌ wdiḻ-len netoꞌ,
naꞌ bsiꞌo yeḻꞌ ztoꞌ beṉꞌkaꞌ gokziꞌ gokzbani netoꞌ.
8 Toshiizi weꞌntoꞌ dillꞌ ka beṉꞌ choo beṉꞌ xen nakoꞌ,
Chios c̱haꞌ,
naꞌ toshiizi weꞌlaꞌontoꞌ liꞌ.
9 Per ṉaa,
ba wchooṉlalloo netoꞌ;
naꞌ ba bsiꞌo netoꞌ yeḻꞌ ztoꞌ.
Bich chaklenoꞌ beṉꞌ wen wdiḻꞌ c̱hentoꞌkaꞌ.
10 Naꞌ biꞌo latj kwenc̱he beṉꞌkaꞌ chdiḻ-len netoꞌ blagdogakeꞌ netoꞌ,
naꞌ wxiꞌ wkaagakeꞌ bi de c̱hentoꞌ.
11 Naꞌ benoꞌ netoꞌ lallꞌ naꞌgakeꞌ ka xilꞌdoꞌkaꞌ ba nzoagakeꞌ witgakeꞌ;
naꞌ bshesh bc̱heeṉoꞌ beṉꞌ wlall c̱haꞌkaꞌ jsoagakeꞌ ladj beṉꞌ zitꞌkaꞌ.
12 Beꞌtekzoꞌ kaꞌzə beṉꞌkaꞌ nak yell c̱hoꞌ,
naꞌ bikz bi laxjgakeꞌ wxiꞌo.
13 Ba bsiꞌo netoꞌ yeḻꞌ ztoꞌ lao yellkaꞌ ndiḻ nllagntoꞌ,
naꞌ chtitj chtangakileꞌ netoꞌ.
14 Ba benoꞌ kwenc̱he ka wzetjgakeꞌ le yell c̱hentoꞌnaꞌ wxillgakileꞌ netoꞌ.
Naꞌ ka chleꞌi nottezə beṉꞌ netoꞌ,
chonḻegakileꞌ netoꞌ.
15 Biga zoa lla bi chiyii chidoꞌidꞌ,
ax̱t chizaꞌ chinit choꞌalawaani daa ḻe chidoꞌchgaidꞌ
16 daa chtitj chtani beṉꞌkaꞌ chakziꞌ chakzbani nadꞌ
naꞌ ze kwasgakeꞌ chiziꞌgakeꞌ wzonnaꞌ.
17 Yogꞌ diikin ba ben bleꞌintoꞌ ḻaꞌkzi bigaṉꞌ gaḻ-lallꞌntoꞌ liꞌ
ni bi wdishjntoꞌ diikaꞌ bllioꞌ biaꞌ gonntoꞌ.
18 Ḻaꞌkzi biga wlej yic̱hjntoꞌ liꞌ
ni bigaṉꞌ yiḻaalaꞌontoꞌ xṉezoꞌnaꞌ,
19 ba bzaḻoo netoꞌ ganaꞌ sakꞌziꞌntoꞌ,
ganaꞌ bi nak lez yeḻꞌ mban c̱hentoꞌni.
20 Sheḻꞌ netoꞌ goḻ-lallꞌntoꞌ liꞌ,
Chios c̱haꞌ,
wa beꞌlaꞌozntoꞌ diikaꞌ choeꞌlaꞌo beṉꞌ zitꞌkaꞌ,
21 zakbeꞌkziloꞌ sheḻꞌkaꞌ.
Ḻaꞌ liꞌ nombiꞌo ax̱t daa zeelo chzaꞌlallꞌntoꞌ ḻoo yic̱hjlallꞌdoꞌntoꞌni.
22 Daa chzoantoꞌ xtilloonaꞌ,
toshiizi zoantoꞌ dii nxoll witgakeꞌ netoꞌ.
Chongakileꞌ netoꞌ ka xilꞌdoꞌkaꞌ ba nzoagakeꞌ witgakeꞌ.
23 Bliꞌgach yeḻꞌ wak c̱hoꞌnaꞌ,
Chios c̱haꞌ.
¿Berac̱he bi chaklenoꞌ netoꞌ?
Bliꞌgach yeḻꞌ wak c̱hoꞌnaꞌ.
Bi kwej yic̱hjoꞌ netoꞌ toshiizi.
24 ¿Bic̱he chllonziloꞌ netoꞌ yeḻꞌ goklen c̱hoꞌnaꞌ?
Naꞌ ¿Bic̱he naḻ-lallꞌzoꞌ netoꞌ ṉaa chen chleꞌintoꞌ yeḻꞌ zakꞌziꞌni?
25 Ba gokzə to katꞌ ṉaa,
bich so sakintoꞌn.
Bichkz zoantoꞌ yell-lio.
26 Bi shaꞌgachiloꞌ gaklenoꞌ netoꞌ.
Naꞌ bislagach netoꞌ daa ḻe chakiloꞌ netoꞌ.