Salmo 42
Libr wchopi
(Salmos 42—72)
1 Ka chak c̱he bllinꞌyix̱aa chbiḻ chdeyi
naꞌ chdab chyiljb nisaꞌ yeejb tyaokaꞌ,
kanꞌ chak c̱haꞌ,
Chios c̱haꞌ,
daa chzelallꞌchgaidꞌ weꞌlawaa liꞌ.
2 Chaklikz c̱haꞌ ka beṉꞌ chbiḻ chdeyi daa chyalljchgaidꞌ Chiozaꞌ,
beenaꞌ nak Chios yaa Chios ban.
¿Batra lljayeꞌlawaaneꞌ ḻoo lill xḻatjeꞌnaꞌ,
lla?
3 Lwaa dii nan yeej gawꞌ,
chbell-lꞌ ka tella ka waḻ,
naꞌ toshiizi nagakeꞌ nadꞌ:
“¿Gaṉ Chios c̱hoꞌnaꞌ,
ṉaa chyalljiloꞌneꞌ?”
4 Katꞌ chjadinidꞌ diiki,
naꞌ chzolochoklə chbellꞌ daa ḻe chakyeshidꞌ.
Chjadinidꞌ kanaꞌ llialoaꞌ lao beṉꞌ be beṉꞌ zilkaꞌ zejntoꞌ ganaꞌ zoa lill xḻatj Chiozaꞌ.
Chyitj chxillntoꞌ daa ḻe chibaintoꞌ naꞌ choeꞌntoꞌ Chiozaꞌ yeḻꞌ chox̱ken.
¡Mbalaz inlleb wzoantoꞌ lṉinaꞌ!
5 Naꞌ niaꞌ:
¿Berac̱hekzə chakyeshꞌzidꞌ?
Naꞌ ¿Berac̱hekzə chakshejlallꞌzidꞌ?
Chiyaḻꞌ gonchꞌ lez Chiozaꞌ,
naꞌ chiyaḻꞌ weꞌlawaaneꞌ,
ḻaꞌ ḻenꞌ nakeꞌ Chios c̱haꞌ,
naꞌ ḻenꞌ chisleꞌ nadꞌ.
6 Chios c̱haꞌ,
chakyeshꞌchgaidꞌ.
Naꞌ daan,
chjadinchgaidꞌ liꞌ
gani zoatiaꞌ lo yell-lio dga mbani yao Jordánnaꞌ,
naꞌ yaa Hermónnaꞌ len yaa Mizaraꞌ.
7 Yeḻꞌ zakꞌziꞌkaꞌ ba bseḻoo lawaꞌni
chchix̱ chḻoḻgakan nadꞌ ka chon bḻi c̱he nisdoꞌnaꞌ katꞌ chas chataan,
naꞌ ka chon yao xennaꞌ daa chxop choꞌa bnaṉjaꞌ naꞌ chṉiṉchga katꞌ chjc̱hazan.
8 Tellanaꞌ chakbeꞌidꞌ chiyeshꞌlallii Chiozaꞌ nadꞌ,
naꞌ waḻaꞌ chx̱oeꞌ dillꞌ choꞌa ḻollaani kwenc̱he choḻ chṉiaꞌneꞌ,
naꞌ choeꞌḻwillee daa nakeꞌ X̱an yeḻꞌ mban c̱haꞌni.
9 Naꞌ yepꞌ Chios c̱haꞌnaꞌ,
beenaꞌ nak ka to yaj xen dii chkweej nadꞌ:
“¿Bic̱he ba wlej yic̱hjzoꞌ nadꞌ?
¿Bic̱he chakz c̱haꞌ ki,
naꞌ zoalzꞌ nyeshꞌ ni c̱he beṉꞌkaꞌ chsakꞌziꞌ nadꞌ?”
10 Ax̱t llitki yoꞌa ba chey chlagakan ni c̱he beṉꞌkaꞌ chakzbani nadꞌ,
naꞌ toshiizi nagakeꞌ nadꞌ:
“¿Gaṉ Chios c̱hoꞌnaꞌ,
ṉaa chyalljiloꞌneꞌ?”
11 Naꞌ niaꞌ:
¿Berac̱hekzə chakyeshꞌzidꞌ?
Naꞌ ¿berac̱hekzə chakshejlallꞌzidꞌ?
Chiyaḻꞌ gonchꞌ lez Chiozaꞌ,
naꞌ chiyaḻꞌ weꞌlawaaneꞌ,
ḻaꞌ ḻenꞌ nakeꞌ Chios c̱haꞌ naꞌ ḻenꞌ chisleꞌ nadꞌ.