Salmo 41
1 Chakomba beenaꞌ yoo yic̱hjeꞌ gakleneꞌ beṉꞌ yeshꞌkaꞌ,
beṉꞌkaꞌ kono zoa gaklen ḻegakeꞌ,
ḻaꞌ katꞌ bi gak c̱heꞌ Chiozaꞌ yisleꞌneꞌ.
2 X̱ancho Chiozaꞌ gap wwieꞌneꞌ,
naꞌ wiꞌeneꞌ yeḻꞌ mban xen,
naꞌ goneꞌ ka soeꞌ mbalaz lo yell-lioni.
Naꞌ bi wiꞌe latj goni beṉꞌkaꞌ chakziꞌ chakzbangakileꞌneꞌ kon daa nazan c̱hegakeꞌ.
3 X̱ancho Chiozaꞌ gakleneꞌneꞌ katꞌ dieꞌ cheꞌileꞌ,
naꞌ goneꞌ ka yiyakshaoꞌlallee.
4 Nadꞌ wniaꞌ:
“Chios c̱haꞌ,
biyeshꞌlallꞌgachi nadꞌ.
Bengach ka yishaꞌlallaa,
ḻaꞌkzi ba bx̱iṉj bḻenꞌ lawoꞌnaꞌ.”
5 Beṉꞌkaꞌ chakziꞌ chakzbani nadꞌ chṉegakeꞌ zban c̱haꞌ naꞌ nagakeꞌ:
“¿Batra gueteꞌ,
lla,
naꞌ kochno lljadini ḻeꞌ?”
6 Naꞌ katꞌ chidwiagakeꞌ nadꞌ,
aga do lallꞌgakenꞌ chshaljlengakeꞌ nadꞌ,
san kwenc̱hez chṉezgakileꞌ bi chak wen c̱hanꞌ
naꞌ chjadagakeꞌ gan yoblə chjayeꞌgakeꞌn dillꞌ.
7 Naꞌ katꞌ chidiꞌa chillag beṉꞌkaꞌ chakziꞌ chakzbani nadꞌ
cheꞌ ljwellgakeꞌ nan ni c̱he doḻꞌ c̱haꞌnanꞌ chzakꞌziꞌa,
naꞌ nagakeꞌ:
8 “Yillweꞌnaꞌ chakeꞌ nakan to yillweꞌ wal,
naꞌ bich nak lez yiyakileꞌ.”
9 Ax̱t beenaꞌ wzoalenꞌ wen,
naꞌ bx̱enilallaaneꞌ,
naꞌ weej wdaolentieꞌ nadꞌ txen,
ba biyec̱hjeꞌ choneꞌ mal c̱haꞌ.
10 San liꞌ,
Chios c̱haꞌ,
biyeshꞌlallꞌgachi nadꞌ,
naꞌ ben ka yiyakidꞌ
kwenc̱he iṉezgakileꞌ ka gonꞌ c̱hegakeꞌ.
11 Naꞌ gakbeꞌidꞌ nan chleꞌshiiloꞌ nadꞌ
daa bi wiꞌo latj c̱he beṉꞌkaꞌ chakziꞌ chakzbani nadꞌ yiba yizakgakileꞌ c̱haꞌ.
12 Daa zoaꞌ do yic̱hj do lallaa biga chsanlalloo nadꞌ,
naꞌ ba benoꞌ ka soaꞌ toshiizi lawoꞌnaꞌ.
13 Shajlaoshga X̱ancho Chiozaꞌ toshiizi,
beenaꞌ nak Chios c̱hecho,
choꞌ beṉꞌ Israel.
Kaꞌ gakshgan.