Salmo 40
1 Wdapꞌ yeḻꞌ chxenlallꞌ naꞌ benꞌ lez X̱ancho Chiozaꞌ,
naꞌ bzenagueꞌ ka benyeshaa laweꞌnaꞌ.
2 Naꞌ bisleꞌ nadꞌ kanaꞌ gok c̱haꞌ ka beṉꞌ bxop to ḻoo yech
naꞌ ka beṉꞌ wyaz to ḻoo guullꞌ ga bich nak lez yeḻꞌ mbannaꞌ.
Naꞌ bizoac̱hec̱heꞌ nadꞌ ka to beṉꞌ ze to lo yaj.
3 Naꞌ bx̱oeꞌ choꞌa ḻollaani to dii kob dii goḻ iṉiaꞌ,
to dii weꞌlawidꞌ Chios c̱hechonaꞌ.
Beṉꞌ zan ileꞌgakileꞌ ka goḻ iṉiaꞌneꞌ ni c̱heyi daa beneꞌ c̱haꞌ,
naꞌ koogakeꞌ balaaṉ X̱ancho Chiozaꞌ
naꞌ wx̱enilallꞌgakeꞌneꞌ.
4 Chakomba beenaꞌ nx̱enilallee X̱ancho Chiozaꞌ,
naꞌ bi choneꞌ txen beṉꞌkaꞌ chep chaꞌlallꞌ
ni bi choeꞌlawee diikaꞌ bi nak dowalj chios.
5 Chios c̱haꞌ,
ba benoꞌ dii zan dii chon ka chibani beṉꞌ,
naꞌ diikaꞌ ngoo xṉezin gonoꞌ c̱hentoꞌ.
Aga wzakintoꞌ weꞌntoꞌ dillꞌ lawoꞌnaꞌ c̱he yogꞌ daa chonoꞌ c̱hentoꞌ.
Ḻaꞌkzi cheenidꞌ wiꞌa dillꞌ c̱heyi diikaꞌ chonoꞌ,
aga wiyan wiꞌa dillꞌ.
6 Ka nak daa chitꞌ bayix̱ꞌkaꞌ lawoꞌnaꞌ,
naꞌ daa choṉꞌ diikaꞌ chiziꞌ chilapꞌ,
naꞌ daa chzeyꞌ bayix̱ꞌkaꞌ lawoꞌnaꞌ ni c̱he saaxya c̱haꞌkaꞌ,
aga ḻennanꞌ chazlalloo,
san llialotech wzenagꞌ c̱hoꞌ naꞌ gonꞌ ka cheeniloꞌ.
7 Naꞌ niaꞌ:
Ni zoaꞌ,
naꞌ ḻee libraꞌ choꞌen dillꞌ c̱haꞌ.
8 Chazlallaa gonꞌ ka cheeniloꞌ,
Chios c̱haꞌ;
naꞌ ḻoo yic̱hjlallꞌdawaani ngooshawaa ley c̱hoꞌnaꞌ.
9 Ladj lkweꞌ beṉꞌ be beṉꞌ zilkaꞌ choeꞌlaꞌo liꞌ ba biꞌa dillꞌ nakoꞌ beṉꞌ ḻi beṉꞌ shaoꞌ.
¡Naꞌ ṉezkziloꞌ bi wzoaꞌ llizə,
Chios c̱haꞌ!
10 Biga chsanꞌ wiꞌa dillꞌ nakoꞌ beṉꞌ ḻi beṉꞌ shaoꞌ.
Ba biꞌa dillꞌ nakoꞌ beṉꞌ chon ka noꞌ
naꞌ nakoꞌ beṉꞌ chisla netoꞌ lao dii malaꞌ.
Naꞌ ladj lkweꞌ beṉꞌ be beṉꞌ zilkaꞌ choeꞌlaꞌo liꞌ;
toshiizi choꞌa dillꞌ nakoꞌ beṉꞌ chiyeshꞌlallii naꞌ wak wx̱enilallꞌntoꞌ xtilloonaꞌ.
11 Chios c̱haꞌ,
bi wlloniloꞌ nadꞌ yeḻꞌ chiyeshꞌlallii c̱hoꞌnaꞌ.
Yeḻꞌ chaki c̱hoꞌnaꞌ naꞌ dillꞌ ḻi c̱hoꞌnaꞌ soalenshgagakan nadꞌ toshiizi.
12 Ḻaꞌ dii zan dii ba ben bleꞌidꞌ,
ni bich chbabidꞌgakan.
Dii malkaꞌ ba benꞌ nakgakan zii zshab naꞌ ntakw nc̱hejgakan nadꞌ,
ni bich chak wḻis yic̱hjii ileꞌidꞌ ganaꞌ zyaa.
Ax̱t nyanchləgakan aga ka yishꞌ yic̱hjꞌki,
naꞌ bich nonꞌ lez gak wen c̱haꞌ.
13 Chios c̱haꞌ,
¡bislagach nadꞌ lao diiki chak c̱haꞌ!
Bi shagachiloꞌ yidyaklenoꞌ nadꞌ,
Chios c̱haꞌ.
14 Beṉꞌkaꞌ cheeni wsol wṉitgakeꞌ yeḻꞌ mban c̱haꞌni siꞌgachgakeꞌ yeḻꞌ ztoꞌ.
Beṉꞌkaꞌ cheeni wlliayiꞌ nadꞌ,
bengach ka yixoṉjgakeꞌ do chiyii chidoꞌzgakileꞌ.
15 Beṉꞌki chtitji nadꞌ siꞌshgagakeꞌ yeḻꞌ ztoꞌ.
16 Per yogꞌ beṉꞌkaꞌ chiyilj liꞌ,
yiba yizakshgagakileꞌ;
naꞌ yogꞌ beṉꞌkaꞌ cheengakileꞌ yislagakoꞌneꞌ,
toshiizi iṉagakeꞌ:
“Beṉꞌ choo beṉꞌ xen nak X̱ancho Chiozaꞌ.”
17 Ḻaꞌkzi nakꞌ beṉꞌ yeshꞌ,
naꞌ bi chak wen c̱haꞌ,
bi kwejyic̱hjgachoꞌ nadꞌ,
Chios c̱haꞌ.
Linꞌ chaklenoꞌ nadꞌ naꞌ chisloꞌ nadꞌ;
bi shaꞌgachiloꞌ gaklenoꞌ nadꞌ,
Chios c̱haꞌ.