Salmo 39
1 Nadꞌ wniaꞌ:
“Gonꞌ to dii byen wsaꞌ c̱haꞌ wen,
naꞌ bi wx̱iṉj wḻenlenꞌ choꞌa ḻollaani,
naꞌ wsakaa bibi gon iṉiaꞌ shlak chec̱hj chda beṉꞌ malkaꞌ lawaꞌni.”
2 Naꞌ wzoaꞌ llizə,
bibi wniaꞌ,
ni dillꞌ daa nak wen bi biꞌa.
Per shlak bibi dillꞌ biꞌa zizikchli bi wzoaꞌ wen.
3 Naꞌ wdao bdian ḻoo lallꞌdawaani.
Shlak ziaꞌn wṉeyi,
gokan ka to yiꞌ xen ḻoo lallꞌdawaani
naꞌ benan byen wṉeshazꞌ wniaꞌ:
4 “Chios c̱haꞌ,
bzajnii nadꞌ aga toshiizin soaꞌ lo yell-lioni,
kwenc̱he gakbeꞌidꞌ yeḻꞌ mban c̱haꞌni nakan de xtit shlollzə.
5 Noṉoꞌ nadꞌ to yeḻꞌ mban dii nak toldezə;
yizkaꞌ beṉoꞌ ibanꞌ,
biz daa lawoꞌnaꞌ.
Dii ḻicha,
yeḻꞌ mban c̱he beṉꞌ yell-lioni nakan ka to beꞌḻesdoꞌ dii chde toldezə.
6 Yogꞌḻoḻ beṉꞌ yell-lioki nakgakeꞌ ka to xol dii chde toldezə;
naꞌ bibi zjanayin chkwaa chtiꞌagakeꞌ yeḻꞌ wniꞌa c̱heꞌkaꞌ,
ni bi ṉezgakileꞌ no yigaaṉlengakan.
7 Naꞌ ṉaa,
Chios c̱haꞌ,
bich bi de dii gonꞌ lez.
Tozoꞌ linꞌ ba nonꞌ lez.
8 Bislagach nadꞌ lao yeḻꞌ zakꞌziꞌnaꞌ nsaꞌ saaxyakaꞌ ba benꞌ.
Bi wiꞌo latj wxilli beṉꞌkaꞌ bi nteyi nadꞌ.
9 “Wzoaꞌ llizə,
bibi wniaꞌ,
ḻaꞌ linꞌ chonoꞌ ka chzakꞌziꞌa ni c̱he saaxya c̱haꞌkaꞌ.
10 Bich wsakꞌziꞌgachoꞌ nadꞌ;
bich soidꞌ yeḻꞌ zakꞌziꞌ c̱hoꞌnaꞌ.
11 Liꞌ chzakꞌziꞌo beṉꞌ yell-lioni ni c̱he saaxyakaꞌ ba beneꞌ,
naꞌ chlliayoo yogꞌ daa ḻe chakileꞌ,
ka chon beḻ zidaa chlliayiꞌb bi dii ngooshaoꞌ beṉꞌ.
Dii ḻicha,
yeḻꞌ mban c̱he beṉꞌ yell-lioni nakan ka beꞌḻesaꞌ chde toldezə.
12 “Chios c̱haꞌ,
bzenaggach ṉaa choeꞌḻwillꞌ liꞌ,
bzenaggach daa chṉabꞌ yeḻꞌ goklen c̱hoꞌnaꞌ.
Bi gongachoꞌ kaꞌz yeḻꞌ chbellyeshꞌ c̱haꞌni.
Ḻaꞌ ṉezkziloꞌ toldezan zaa lo yell-lioni,
ka to beṉꞌ zoa lall lill beṉꞌ xtit shloll,
ka gok c̱he dii beṉꞌ gol c̱haꞌkaꞌ.
13 Bich illaagachoꞌ nadꞌ,
beꞌgach latj yiyakshaoꞌlallaa
shlak ṉaa biṉꞌ guetꞌ naꞌ biṉꞌ yiyol yinitꞌ lo yell-lioni.”