Salmo 38
1 Chios c̱haꞌ,
bi wsheshlengachoꞌ nadꞌ lo yeḻꞌ chllaa c̱hoꞌnaꞌ
ni bi wsakꞌziꞌgachoꞌ nadꞌ daa bshaa liꞌ.
2 Yeḻꞌ zakꞌziꞌkaꞌ bseḻoo lawaꞌ gokan ka xiskaꞌ chchooṉ xis wix̱itaa,
diikaꞌ chaz zibiaꞌ;
naꞌ dii wal ba bzoaziꞌyoo nadꞌ.
3 Daa ḻe chlloo nadꞌ bikzə gayidꞌ zoaꞌ shiꞌa shaoꞌ,
naꞌ do ka naktiaꞌ bi zoa wen daa bx̱iṉj bḻenꞌ lawoꞌnaꞌ.
4 Dii malkaꞌ ba benꞌ ba bidop billaggakan lawii;
naꞌ nakgakan to dii zii zshab dii bi so sakidꞌ.
5 Daa bi bzenagꞌ c̱hoꞌ,
weꞌkaꞌ llia beli chen c̱haꞌni ba chaḻj chḻeban.
6 Toshiizi zoaꞌ nyeshꞌ,
bikz bi nan gonꞌ naꞌ bikz zoaꞌ yell-lio.
7 Ḻoo lsinaani chey chlachgan,
naꞌ bikzə gayidꞌ zoaꞌ shiꞌa shaoꞌ.
8 Dii wal inlleb ba bsisꞌ naꞌ nashj noxjchgaꞌ;
naꞌ chbellyeshaa daa chjeḻi ḻoo yic̱hjlallꞌdawaani.
9 Chios c̱haꞌ,
liꞌ ṉez nḻeꞌiloꞌ daa chzelallaa,
naꞌ aga ngashiloꞌ dga chak c̱haꞌ.
10 Nall inlleb chxitꞌ chda lallꞌdawaani,
naꞌ ba chiyoll chido chde c̱haꞌ,
naꞌ ax̱t jalawꞌki ba chde c̱hegakin.
11 Beṉꞌkaꞌ nllaguidꞌ ba wchooṉlallꞌgakeꞌ nadꞌ ni c̱he yillweꞌ dga cheꞌidꞌ;
ni beṉꞌ dialla c̱haꞌkaꞌ bi chidwiagakeꞌ nadꞌ.
12 Beṉꞌkaꞌ cheeni guetꞌ chiyiljlallꞌgakeꞌ nak gongakeꞌ wzapgakeꞌ nadꞌ.
Beṉꞌkaꞌ chinaḻꞌ chino nadꞌ chgoogakeꞌ xṉezin nak gak wlliayiꞌgakeꞌ nadꞌ,
naꞌ bi chbeꞌlligakeꞌ chiyiljlallꞌgakeꞌ naklə gongakeꞌ witgakeꞌ nadꞌ.
13 Per chonꞌ ka beenaꞌ bi cheni
naꞌ bi chzenagꞌ dillꞌkaꞌ choeꞌgakeꞌ;
chonꞌ ka beenaꞌ bi chak iṉe,
naꞌ bi chilliꞌa xtilleekaꞌ.
14 Chak c̱haꞌ ka chak c̱he beenaꞌ bi cheni,
ni bi chak yilliꞌe dillꞌ.
15 Linꞌ,
Chios c̱haꞌ,
nonꞌ lez gaklenoꞌ nadꞌ,
naꞌ linꞌ,
yilliꞌo xtilleekaꞌ.
16 Toz dii chṉabidꞌ liꞌ:
“Bi wiꞌo latj wxillgakileꞌ nadꞌ,
ni bi yiba yizakgakileꞌ shi ba gok mal c̱haꞌ.”
17 Ba zoa yiyoll yido bishbe c̱haꞌni,
naꞌ ni ziꞌ shloll bich chbez daa chey chlaꞌ.
18 Yix̱oadoḻaa saaxya c̱haꞌkaꞌ,
daa chao chdiagakan nadꞌ.
19 Ba wyanlikzə beṉꞌkaꞌ chakziꞌ chakzbani nadꞌ.
Beṉꞌ zan chwiyi nadꞌ ḻaꞌkzi aga bi benꞌ c̱hegakeꞌ.
20 Lwaayi dii nan yiyongakileꞌ nadꞌ wen ka ba benꞌ c̱hegakeꞌ,
chc̱hiꞌ chsakꞌləgakeꞌ nadꞌ,
naꞌ chṉit chdeləgakeꞌ nadꞌ daa cheenidꞌ gonꞌ daa nak wen.
21 Chios c̱haꞌ,
bi c̱hooṉlallꞌgachoꞌ nadꞌ.
Bi wḻaalaꞌogachoꞌ nadꞌ,
Chios c̱haꞌ.
22 Bi shagachiloꞌ yidyaklenoꞌ nadꞌ,
Chios c̱haꞌ,
ḻaꞌ linꞌ chisloꞌ nadꞌ.