Salmo 37
1 Bi illaa yic̱hjoꞌ ni c̱heyi daa chon beṉꞌ malkaꞌ,
ni bi iṉoꞌ ḻe wen chak c̱hegakeꞌ.
2 Ḻaꞌ shlollzan soagakeꞌ,
ka chak c̱he yixaꞌ,
naꞌ chde c̱hegakeꞌ ka chak c̱he to yix̱ꞌ kwan daa chkwed.
3 Bx̱enilalloo X̱ancho Chiozaꞌ naꞌ ben dii wennaꞌ.
Wzoa lo yell-lioni dga bc̱hebeꞌ goṉeꞌ c̱hecho naꞌ ben ka cheenileꞌ.
4 Biba bizaki daa nombiꞌo X̱ancho Chiozaꞌ,
naꞌ ḻeꞌ goneꞌ ka gak diikaꞌ zelalloo.
5 Ben lallꞌ naꞌ X̱ancho Chiozaꞌ yeḻꞌ mban c̱hoꞌnaꞌ.
Bx̱enilallee,
naꞌ ḻeꞌkzeꞌ gakleneꞌ liꞌ.
6 Naꞌ goneꞌ ka wliꞌlao yeḻꞌ beṉꞌ ḻi beṉꞌ shaoꞌ c̱hoꞌnaꞌ
ka beeniꞌ c̱he wbilldoꞌnaꞌ katꞌ chṉaꞌtitan.
7 Wdap yeḻꞌ chxenlallꞌ
naꞌ ben lez X̱ancho Chiozaꞌ gakleneꞌ liꞌ.
Bi illaa yic̱hjoꞌ daa chak wen c̱he beṉꞌkaꞌ
chgoo xṉezin gongakeꞌ dii malaꞌ.
8 Bi wiꞌo latj shep c̱haz yeḻꞌ chllaa chlok c̱hoꞌnaꞌ ni c̱he beṉꞌ malkaꞌ,
ḻaꞌ shi kaꞌ gonoꞌ,
ḻe nxoll gonoꞌ to dii mal.
9 Ḻaꞌ beṉꞌ malkaꞌ yiyol yinitgakeꞌ,
san beṉꞌkaꞌ nx̱enilallꞌ X̱ancho Chiozaꞌ
gaki c̱hegakeꞌ yell-lioni.
10 Aga chllach kochno beṉꞌ mal soa;
ḻaꞌkzi tlapḻoḻ yiyiljgakoꞌneꞌ,
kochno yen ileꞌiloꞌ.
11 San beṉꞌkaꞌ nak beṉꞌ gax̱jlallꞌ gaki c̱hegakeꞌ yell-lioni,
naꞌ soagakeꞌ mbalaz inlleb.
12 Beṉꞌ malaꞌ chgwee xṉezin wzoaziꞌyee beṉꞌ ḻi beṉꞌ shawaa,
naꞌ kon chwiaziꞌyeeneꞌ.
13 Per X̱ancho Chiozaꞌ chxill-lileꞌneꞌ
daa ṉezileꞌ ba zoa illin lla kwiayee.
14 Beṉꞌ malkaꞌ chṉiagakileꞌ yesya c̱heꞌkaꞌ naꞌ chkaadeejgakeꞌ xis wix̱itꞌ c̱heꞌkaꞌ
kwenc̱he witgakeꞌ beṉꞌ yeshꞌdoꞌkaꞌ chyallj chc̱hini,
naꞌ beṉꞌkaꞌ nsaꞌ c̱heyin wen.
15 Per yesya c̱heꞌkaꞌtezə yiyitgakan ḻegakeꞌ,
naꞌ xis wix̱itꞌ c̱heꞌkaꞌ goxj itingakan.
16 Zoachlə beṉꞌ wennaꞌ mbalazch ḻaꞌkzi latꞌzə dii de c̱heꞌ,
aga ka beṉꞌ malkaꞌ nap yeḻꞌ wniꞌanaꞌ.
17 Ḻaꞌ X̱ancho Chiozaꞌ wṉitloeꞌ yeḻꞌ wak c̱he beṉꞌ malkaꞌ,
per gap wwieꞌ beṉꞌ ḻi beṉꞌ shaoꞌkaꞌ.
18 X̱ancho Chiozaꞌ chap chwieꞌ beṉꞌkaꞌ zoa do yic̱hj do lallin,
naꞌ yell-lioni gakin c̱hegakeꞌ toshiizi.
19 Aga wziꞌgakeꞌ yeḻꞌ ztoꞌ llanaꞌ zaak dii lalljkaꞌ,
naꞌ katꞌ kweꞌ wbinnaꞌ,
ḻekzeꞌ wzesh wzeljileꞌ ḻegakeꞌ.
20 San beṉꞌ malkaꞌ,
beṉꞌkaꞌ chakziꞌ chakzbangakileꞌ X̱ancho Chiozaꞌ,
yiyol yinitgakeꞌ.
Kwiayiꞌgakeꞌ ka yix bill,
naꞌ yinitlogakeꞌ ka llennaꞌ.
21 Beṉꞌ malaꞌ chjaṉabeꞌ bi de c̱he beṉꞌ naꞌ bi chiyoꞌen;
san beṉꞌ wennaꞌ nakeꞌ beṉꞌ chiyeshꞌlallii naꞌ chzanileꞌ daa de c̱heꞌ.
22 Beṉꞌkaꞌ chonḻeey X̱ancho Chiozaꞌ,
gaki c̱hegakeꞌ yell-lioni;
san beṉꞌkaꞌ chyishjeꞌ biaꞌ blagꞌ c̱heyin,
kwiayiꞌgakeꞌ.
23 X̱ancho Chiozaꞌ chakleneꞌ beenaꞌ nsaꞌ c̱heyin wen,
naꞌ chzoac̱hec̱heꞌneꞌ lo nez wen c̱heꞌnaꞌ.
24 Naꞌ ḻaꞌkzi lljac̱hewee aga wgooṉeꞌ,
ḻaꞌ X̱ancho Chiozaꞌ nox̱ee neenaꞌ.
25 Nadꞌ gok biꞌ wewꞌ naꞌ ṉaa ba nak beṉꞌ gol,
naꞌ ni shlin biga bleꞌidꞌ wsanlallꞌ Chiozaꞌ beṉꞌ ḻi beṉꞌ shawaa,
ni biga bleꞌidꞌ xiiṉeꞌkaꞌ tazgakeꞌ iṉabgakeꞌ dii yeej gaogakeꞌ.
26 San tlizi chiyeshꞌlallꞌgakileꞌ beṉꞌ,
naꞌ chaklengakeꞌ beṉꞌ chyallj chc̱hini;
naꞌ ḻekzkaꞌ xiiṉeꞌkaꞌ chaklengakeꞌ beṉꞌ.
27 Biḻaalaꞌo dii malaꞌ naꞌ ben daa nak wen,
naꞌ toshiizi gaki c̱hoꞌ gani zoꞌ.
28 Ḻaꞌ X̱ancho Chiozaꞌ chazlallee daa nak dii ḻicha,
naꞌ bi chbej yic̱hjeꞌ beṉꞌkaꞌ chon ka cheenileꞌ.
Toshiizi gap wwieꞌ ḻegakeꞌ.
San chlliayee beṉꞌ malkaꞌ,
naꞌ chsol chṉiteꞌ dia c̱heꞌkaꞌ.
29 Beṉꞌ ḻi beṉꞌ shaoꞌkaꞌ gaki c̱hegakeꞌ yell-lioni,
naꞌ soagakeꞌ lawinnaꞌ toshiizi.
30 Beṉꞌ ḻi benꞌ shawaa choꞌe dillꞌ ḻega beṉꞌ sinꞌ,
naꞌ choꞌa ḻolleenaꞌ chchej daa nak dillꞌ ḻi.
31 Ḻoo yic̱hjlallꞌdoꞌenaꞌ ngooshawee daa nllia Chios c̱heꞌnaꞌ biaꞌ goneꞌ,
naꞌ biga wḻaalaween.
32 Beṉꞌ malaꞌ chinaḻꞌ chinoeꞌ beṉꞌ ḻi beṉꞌ shawaa
kwenc̱he witeꞌneꞌ;
33 per X̱ancho Chiozaꞌ bi wiꞌe latj idiḻ illagueꞌneꞌ,
ni bi wiꞌe latj wtobgakileꞌneꞌ daa bi nak kaꞌ.
34 Bx̱enilalloo X̱ancho Chiozaꞌ,
naꞌ bzoa xtilleenaꞌ,
naꞌ kwee liꞌ balaaṉ naꞌ gaki c̱hoꞌ yell-lioni gani zoꞌ.
Naꞌ ileꞌteiloꞌ katꞌ kwiayiꞌ beṉꞌ malkaꞌ.
35 Ba bleꞌidꞌ beṉꞌ malaꞌ,
beenaꞌ naklikzə beṉꞌ chaꞌsib,
naꞌ ḻaꞌkzi wlejlaweꞌ ka chbejlao to yag xen dii lliachga xozꞌ xkaꞌin,
36 xtitchga wzeyi c̱heꞌ naꞌ biyol biniteꞌ;
naꞌ biyiljee,
naꞌ bich billelidee.
37 Ḻi gakbeꞌi ka gak c̱he beenaꞌ zoa do yic̱hj do lallee naꞌ nakeꞌ beṉꞌ ḻi beṉꞌ shaoꞌ,
ḻaꞌ ḻe wen gak c̱heꞌ daa zoaleneꞌ beṉꞌ mbalaz.
38 San yogꞌ beṉꞌ malkaꞌ,
beṉꞌkaꞌ chx̱iṉj chḻen,
kwiayiꞌgakeꞌ
naꞌ yiyol yinitgakeꞌ.
39 X̱ancho Chiozaꞌ chakleneꞌ beṉꞌ ḻi beṉꞌ shaoꞌkaꞌ,
naꞌ chkweejeꞌ ḻegakeꞌ lao dii lalljkaꞌ.
40 X̱ancho Chiozaꞌ chakleneꞌ ḻegakeꞌ naꞌ chisleꞌ ḻegakeꞌ.
Chisleꞌ ḻegakeꞌ lo ṉiꞌa naꞌ beṉꞌ malkaꞌ
daa nx̱enlallꞌgakeꞌ gap wwieꞌ ḻegakeꞌ.