Salmo 36
1 Ḻoo yic̱hjlallꞌdoꞌ beṉꞌ malaꞌ chzaꞌlallee goneꞌ dii malaꞌ.
Naꞌ bi chall chllebeꞌ gon Chiozaꞌ xya c̱heꞌ.
2 Naꞌ daa chleꞌi kwineꞌ beṉꞌ wen,
bi chakbeꞌileꞌ choneꞌ dii malaꞌ ni bi chakzbanileꞌn.
3 Naꞌ choꞌa dillꞌ c̱heꞌnaꞌ nakan dillꞌ wxiyeꞌ naꞌ dii bi yejniꞌalallii,
naꞌ bich nteyileꞌ ni bich choneꞌ daa nak wen.
4 Katꞌ dieꞌ lo daa lo blag c̱heꞌnaꞌ chyiljlallee naklə shoꞌ xṉezi dii malaꞌ chzaꞌlallee;
naꞌ daa toshiizi yoon yic̱hjeꞌ,
bikzə chichejlalleen.
5 Per yeḻꞌ chaki c̱hoꞌnaꞌ,
Chios c̱haꞌ,
nakan dii xen wal inlleb ka yabanaꞌ daa bi nakbiaꞌ gate chiyoll chido;
naꞌ toshiizi chonoꞌ yogꞌ diikaꞌ chc̱heboꞌ.
6 Naꞌ yeḻꞌ ḻi yeḻꞌ shaoꞌ c̱hoꞌnaꞌ nakan dii xen wal
ka yaa yeḻkaꞌ diikaꞌ zeelo nak dii xen.
Naꞌ yeḻꞌ sinnaꞌ daa napoꞌ kwenc̱he chc̱hogbiꞌo c̱he beṉꞌ nakan dii xen inlleb,
ka nisdoꞌnaꞌ daa nak dii xen naꞌ zitjan nall inlleb.
Chios c̱haꞌ,
liꞌ chap chwioꞌ beṉꞌ yell-lioni naꞌ yogꞌ bayix̱ꞌdoꞌ.
7 ¡Ḻe mbalaz inlleb nak yeḻꞌ chaki c̱hoꞌnaꞌ,
Chios c̱haꞌ!
Ka chon badoꞌkaꞌ chkwashꞌgakb xan x̱il xṉaꞌbkaꞌ,
kanꞌ chon beṉꞌ yell-lioki nongakeꞌ liꞌ lez gap wwioꞌ ḻegakeꞌ.
8 Naꞌ nesh neljgakileꞌ daa chonoꞌ choc̱hj chlalj daa choeꞌgakoꞌneꞌ.
Naꞌ dii wen dii shaoꞌ c̱hoꞌnaꞌ nakan ka to yao xen dii cheejgakeꞌ naꞌ nis c̱heyinnaꞌ nakan zix̱ sia.
9 Ḻaꞌ liꞌ choo yeḻꞌ mban c̱he yogꞌḻoḻ dii yoo bishbe,
naꞌ beeniꞌ c̱hoꞌnaꞌ chzeeniꞌn lo yeḻꞌ mban c̱hentoꞌni.
10 Bliꞌgachi yeḻꞌ chiyeshꞌlallii c̱hoꞌnaꞌ naꞌ yeḻꞌ ḻi yeḻꞌ shaoꞌ c̱hoꞌnaꞌ beṉꞌkaꞌ nombiaꞌ liꞌ naꞌ ngooshḻilallꞌgakeꞌ.
11 Bi wiꞌo latj wlej wshoshj beṉꞌ chaꞌsibkaꞌ nadꞌ,
ni bi goni beṉꞌ malkaꞌ nadꞌ ka to cheengakileꞌ.
12 Ḻi wwiakachi ka ba gok c̱he beṉꞌ malkaꞌ,
ba wlliayiꞌgakeꞌ naꞌ bichga yillia yilengakeꞌ.