Salmo 35
1 Chios c̱haꞌ,
wzoshyiꞌgach beṉꞌkaꞌ cheeni wit nadꞌ;
wdiḻ-lengach beṉꞌkaꞌ chdiḻ-len nadꞌ.
2 Bex̱ꞌgach daa wkweejiloꞌ nadꞌ lo wdiḻaꞌ
naꞌ da,
gaklenoꞌ nadꞌ.
3 Bex̱ꞌgach yanaꞌ ntoshꞌ lawinnaꞌ
naꞌ btiḻgach beṉꞌkaꞌ chino nadꞌ.
Wnagach nadꞌ nan liꞌkzan yisloꞌ nadꞌ.
4 Beṉꞌkaꞌ cheeni witgakeꞌ nadꞌ
siꞌshgagakeꞌ yeḻꞌ ztoꞌ naꞌ gakllej gakgaṉgakileꞌ;
beṉꞌkaꞌ cheeni wlliayiꞌ nadꞌ yiyii yidogakileꞌ
naꞌ yixoṉjdogakeꞌ.
5 Gakshga c̱hegakeꞌ ka yix bebaꞌ daa choaꞌ beꞌnaꞌ,
naꞌ anjl c̱he X̱ancho Chiozaꞌ wlagdoeꞌ ḻegakeꞌ.
6 Gakshga xṉezeꞌkaꞌ shgasj shc̱hoḻ naꞌ kwil saꞌshgagakeꞌ lawinnaꞌ,
naꞌ wlagdo anjl c̱he X̱ancho Chiozaꞌ ḻegakeꞌ.
7 Ḻaꞌkzi aga bi benꞌ c̱hegakeꞌ chgoogakeꞌ xṉezin gongakeꞌ mal c̱haꞌ,
naꞌ wdengakeꞌ to yech ganaꞌ cheengakileꞌ ixopꞌ.
8 ¡Kwiayiꞌshgagakeꞌ tokonganzi!
Ixopshgagakeꞌ ḻoo yechaꞌ wdengakeꞌ daa nan senan nadꞌ,
naꞌ kwiayiꞌtegakeꞌ.
9 Naꞌch yiba yizakidꞌ lao X̱ancho Chiozaꞌ
daa ba bisleꞌ nadꞌ laweꞌkaꞌ.
10 Do yic̱hj do lallaa iṉiaꞌ:
“Kochno zoa sto ka liꞌ,
Chios c̱haꞌ.”
Ḻaꞌ linꞌ chisloꞌ beṉꞌ yeshꞌkaꞌ,
beṉꞌkaꞌ chyallj chc̱hini
lo ṉiꞌa naꞌ beṉꞌkaꞌ chc̱hiꞌ chsakꞌ ḻegakeꞌ,
beṉꞌkaꞌ chziꞌ chkaa bi de c̱hegakeꞌ.
11 Chas chda beṉꞌ wxiyeꞌkaꞌ chyilj chzangakeꞌ choꞌa xtillaa,
naꞌ chtobgakileꞌ nadꞌ dii bi nak kaꞌ.
12 Lwaayi dii nan yiyongakileꞌ nadꞌ wen ka ba benꞌ c̱hegakeꞌ,
chc̱hiꞌ chsakꞌləgakeꞌ nadꞌ,
naꞌ ḻe chakyeshidꞌ daa chongakileꞌ nadꞌ kaꞌ.
13 Kanaꞌ bi shaoꞌgakeꞌ,
nadꞌ gokyeshidꞌ
naꞌ gokwꞌ lechꞌ zeshꞌkaꞌ daa chliꞌn chakyeshidꞌ naꞌ wzoaꞌ wbasꞌ,
naꞌ ḻoo yic̱hjlallꞌdawaani beꞌḻwillꞌ Chiozaꞌ ni c̱hegakeꞌ.
14 Wzoaꞌ nyeshꞌ naꞌ bibi wnan gonꞌ,
gok c̱haꞌ ka iṉacho xṉaꞌnanꞌ wit,
wa to beṉꞌ nllaguidꞌ,
wa to beṉꞌ bishaan.
15 San ḻegakeꞌ,
ka bleꞌgakileꞌ bi chak wen c̱haꞌ,
naꞌ gokgakeꞌ toz bibagakileꞌ.
Bengakileꞌ nadꞌ ka beṉꞌ zitꞌ beṉꞌ bi nombiaꞌgakeꞌ,
naꞌ toshiizi bzoaziꞌyaagakeꞌ nadꞌ.
16 Bsakꞌziꞌgakeꞌ nadꞌ naꞌ btitjgakileꞌ nadꞌ,
naꞌ ax̱t chaoyaax̱ax̱j ḻeyeꞌkaꞌ chwiaziꞌyaagakeꞌ nadꞌ.
17 Chios c̱haꞌ,
¿zi kaꞌkꞌ siꞌxenoꞌ naꞌ wwiazoꞌ ka chak c̱haꞌ?
Bislagach nadꞌ lo ṉiꞌa naꞌ beṉꞌki nak ka bell zṉia kwenc̱he bi witgakeꞌ nadꞌ.
18 Naꞌ goṉꞌ liꞌ yeḻꞌ chox̱ken lao lkweꞌ beṉꞌ be beṉꞌ zilkaꞌ choeꞌlaꞌo liꞌ.
Naꞌ weꞌlawaa liꞌ ladjeꞌkaꞌ.
19 Bi wiꞌo choꞌa xba beṉꞌkaꞌ chakziꞌ chakzbani nadꞌ,
beṉꞌkaꞌ chwiyi nadꞌ ḻaꞌkzi bibi benꞌ c̱hegakeꞌ.
Bat wxillgakileꞌ nadꞌ.
20 Ḻaꞌ ḻegakeꞌ bi cheengakileꞌ no soalengakeꞌ mbalaz,
san choeꞌgakeꞌ dillꞌ wxiyeꞌ c̱he beṉꞌkaꞌ bi nak wishagdiḻ.
21 Kadezi chx̱aꞌ choꞌekaꞌ chṉegakeꞌ c̱haꞌ,
nagakeꞌ:
“Asi ṉaa,
ba bleꞌteintoꞌ ka beneꞌ.”
22 Liꞌkz ṉez nḻeꞌiloꞌ dga chak c̱haꞌ,
Chios c̱haꞌ,
naꞌ bi soagachoꞌ llizə.
Chios c̱haꞌ,
bi wkwaaṉoꞌ nadꞌ tozꞌ.
23 Chios c̱haꞌ,
bwiagach ka chak c̱haꞌ,
naꞌ goklengach nadꞌ,
ḻaꞌ linꞌ nakoꞌ X̱anꞌ.
Wzoagach c̱haꞌ naꞌ bengach yeḻꞌ josc̱his c̱haꞌ.
24 Chios c̱haꞌ,
liꞌ nakoꞌ X̱anꞌ,
beꞌgach dillꞌ bibi xtoḻaa de daa nakoꞌ beṉꞌ ḻi beṉꞌ shaoꞌ.
Bi wiꞌo latj wxillzgakileꞌ nadꞌ.
25 Bi wiꞌo latj saꞌlallꞌgakeꞌ c̱haꞌ,
iṉagakeꞌ:
“Bachga gok c̱heꞌ ka cheenintoꞌ.
Bachga bsol bṉitntoꞌ ḻeꞌ.”
26 Yogꞌ beṉꞌkaꞌ chiba chizaki bin chak c̱haꞌ,
siꞌshgagakeꞌ yeḻꞌ ztoꞌ naꞌ gakllej gakgaṉgakileꞌ,
naꞌ ax̱t ga zeelo yiyii yidoꞌshgagakileꞌ
daa chon kwingakeꞌ beṉꞌ choo beṉꞌ xen lawaꞌni.
27 Naꞌ yiba yizakshgayi beṉꞌkaꞌ nongakeꞌ nadꞌ txen,
naꞌ ax̱t gosyaayigakeꞌ daa ḻe chibagakileꞌ benꞌ gan.
Naꞌ toshiizi iṉagakeꞌ:
“Shoꞌshga X̱ancho Chiozaꞌ balaaṉ,
beenaꞌ chazlallꞌ gak wen c̱he beenaꞌ chon ka cheenileꞌ.”
28 Naꞌ wiꞌa dillꞌ nakoꞌ beṉꞌ ḻi beṉꞌ shaoꞌ;
naꞌ toshiizi weꞌlawaa liꞌ.