Salmo 34
1 Toshiizi weꞌlawaa X̱ancho Chiozaꞌ,
naꞌ toshiizi goḻ iṉiaꞌneꞌ kon choꞌa ḻollaani.
2 Wiꞌa dillꞌ ka beṉꞌ wen nak X̱ancho Chiozaꞌ,
naꞌ yeni beṉꞌkaꞌ kono zoa gaklen ḻegakeꞌ naꞌ yiba yizakgakileꞌ.
3 Ḻi da,
gakcho toz weꞌlaꞌocho X̱ancho Chiozaꞌ,
naꞌ weꞌcho dillꞌ ka beṉꞌ choo beṉꞌ xen nakeꞌ.
4 Wṉabidꞌ X̱ancho Chiozaꞌ gakleneꞌ nadꞌ,
naꞌ bzenagueꞌ c̱haꞌ,
naꞌ bisleꞌ nadꞌ lao yogꞌḻoḻ diikaꞌ chall chllebꞌ.
5 Beṉꞌkaꞌ nx̱enilallꞌ X̱ancho Chiozaꞌ dii xen chiba chizakꞌgakileꞌ,
naꞌ biga igaaṉgakeꞌ yeḻꞌ ztoꞌ.
6 Nadꞌ ka bi gok wen c̱haꞌ,
wṉabꞌ to yeḻꞌ goklen lao X̱ancho Chiozaꞌ naꞌ bzenagueꞌ c̱haꞌ,
naꞌ bisleꞌ nadꞌ lao yogꞌḻoḻ diikaꞌ gok c̱haꞌ.
7 Anjl c̱he X̱ancho Chiozaꞌ chkweejeꞌ beṉꞌkaꞌ chall chlleb ḻeꞌ naꞌ chisleꞌ ḻegakeꞌ.
8 Ḻi wnix̱ wllia ka nak X̱ancho Chiozaꞌ,
naꞌ gakbeꞌile ka beṉꞌ wen nakeꞌ.
¡Chakomba beenaꞌ nx̱enilalleeneꞌ!
9 Ḻi gall illeb X̱ancho Chiozaꞌ,
leꞌ nakle lallꞌ nee,
ḻaꞌ aga bi chyallj chc̱hini beṉꞌkaꞌ chall chlleb ḻeꞌ.
10 Bellkaꞌ chbiḻ chdongakb daa bi chllel dii gaogakb,
san beṉꞌkaꞌ chṉabgakeꞌ yeḻꞌ goklen c̱he X̱ancho Chiozaꞌ
aga bi iyallj ic̱hingakileꞌ.
11 Ḻi da,
xiiṉdawaa,
naꞌ ḻi wzenag dga iṉiaꞌ leꞌ,
naꞌ wliꞌ wsedidꞌ leꞌ gall illeble X̱ancho Chiozaꞌ.
12 Beenaꞌ cheeni idieꞌ lo yell-lioni naꞌ gakte wen c̱heꞌ,
13 chiyaḻꞌ wsakee kwell iṉieꞌ,
naꞌ bi wiꞌe latj ichej dillꞌ wxiyeꞌ choꞌa ḻolleenaꞌ.
14 Chiyaḻꞌ yiḻaalawee dii malaꞌ,
naꞌ goneꞌ daa nak wen.
Chiyaḻꞌ sieꞌ wṉeyi soaleneꞌ beṉꞌ mbalaz.
15 X̱ancho Chiozaꞌ chap chwieꞌ beṉꞌkaꞌ nak beṉꞌ ḻi beṉꞌ shaoꞌ,
naꞌ chzenagueꞌ katꞌ chṉabgakeꞌ yeḻꞌ goklen c̱heꞌnaꞌ.
16 Per bi chleꞌshiileꞌ beṉꞌkaꞌ chon mal,
san chsol chṉiteꞌ ḻegakeꞌ yell-lioni.
17 X̱ancho Chiozaꞌ chzenagueꞌ katꞌ beṉꞌkaꞌ nak beṉꞌ ḻi beṉꞌ shaoꞌ chṉabgakeꞌ yeḻꞌ goklen c̱heꞌnaꞌ,
naꞌ chisleꞌ ḻegakeꞌ lao yogꞌḻoḻ diikaꞌ chak c̱hegakeꞌ.
18 X̱ancho Chiozaꞌ zoaleneꞌ beṉꞌkaꞌ chakyeshii,
beṉꞌkaꞌ bich nongakeꞌ lez gak wen c̱hegakeꞌ,
naꞌ chisleꞌ ḻegakeꞌ lawi daa chak c̱hegakeꞌ.
19 Ḻaꞌkzi dii zan dii chen chleꞌi beenaꞌ nak beṉꞌ ḻi beṉꞌ shaoꞌ,
X̱ancho Chiozaꞌ chisleꞌneꞌ ladj yogꞌ diikaꞌ chak c̱heꞌ.
20 Chap chwieꞌ do ka nakeꞌ,
naꞌ bi gaileꞌ bi gaki.
21 Beṉꞌ malkaꞌ,
chbiayiꞌgakeꞌ yeḻꞌ wen dii mal c̱heꞌkaꞌ;
naꞌ beṉꞌkaꞌ chakziꞌ chakzbani beṉꞌkaꞌ nak beṉꞌ ḻi beṉꞌ shaoꞌ,
wc̱hogbiaꞌ Chiozaꞌ c̱hegakeꞌ tegakeꞌ lo yeḻꞌ zakꞌziꞌnaꞌ.
22 Per X̱ancho Chiozaꞌ chisleꞌ beṉꞌkaꞌ chon ka cheenileꞌ,
naꞌ wc̱hogbiꞌe bibi yeḻꞌ zakꞌziꞌ tegakeꞌ daa nx̱enilallꞌgakeꞌneꞌ.