Salmo 33
1 Ḻi yibayi,
ḻi goḻ iṉe X̱ancho Chiozaꞌ,
ka leꞌ nakle beṉꞌ ḻi beṉꞌ shaoꞌ,
ḻaꞌ ḻennanꞌ chidoḻꞌle gonle,
leꞌ zoale do yic̱hj do lallꞌle.
2 Ḻi weꞌlaꞌo X̱ancho Chiozaꞌ,
ḻi goḻ iṉieꞌ,
naꞌ ḻi wc̱hin diikaꞌ llia kwerd c̱heyin.
3 Ḻi goḻ to dii kob katꞌ goḻ iṉeleneꞌ.
Ḻi wsill diikaꞌ xochi ax̱t ga zeelo chakle katꞌ goḻ iṉeleneꞌ.
4 Choꞌa xtillꞌ X̱ancho Chiozaꞌ nakan dii ḻicha,
naꞌ diikaꞌ choneꞌ chliꞌgakan choneꞌ ka nc̱hebeꞌ goneꞌ.
5 X̱ancho Chiozaꞌ chazlallee daa nak wen naꞌ daa nak dii ḻicha;
naꞌ doxen lo yell-lioni chliꞌlao yeḻꞌ chaki c̱heꞌnaꞌ.
6 To ka wṉezə X̱ancho Chiozaꞌ,
wyaꞌ wbiṉ yabanaꞌ,
naꞌ bishbe c̱heꞌnaꞌ benan ka wyaꞌ wbiṉ beljdoꞌkaꞌ.
7 Ḻeꞌ nllieꞌ nisdoꞌnaꞌ tozga,
ka beṉꞌ ngaashawaan.
8 Ḻi gall illeb X̱ancho Chiozaꞌ,
leꞌ lleꞌle doxen lo yell-lioni;
yogꞌḻoḻ-le lleꞌle lo yell-lioni,
ḻi kwee balaaṉ.
9 Ka wṉieꞌ,
naꞌ wxe wzil yogꞌḻoḻte.
Beneꞌ mandad gakgakan,
naꞌ wyaꞌ wbiṉgakan.
10 X̱ancho Chiozaꞌ bi choꞌe latj gak
ka ba yoo xṉezi gon beṉꞌkaꞌ bi nx̱enilallꞌ ḻeꞌ.
11 San yogꞌ diikaꞌ ngoo X̱ancho Chiozaꞌ xṉezin,
bi te bi gakgakan.
12 Chakomba beṉꞌkaꞌ lleꞌ yellaꞌ ganaꞌ nonḻilallꞌgakeꞌ X̱ancho Chiozaꞌ,
beṉꞌkaꞌ ba wlejeꞌ gakgakeꞌ lallꞌ nee.
13 X̱ancho Chiozaꞌ zoeꞌ yabanaꞌ
naꞌ chwieꞌ yogꞌḻoḻ beṉꞌ yell-lioki.
14 Naꞌ ganaꞌ llieꞌ chṉabiꞌe
chwieꞌ nak chon beṉꞌki lleꞌ lo yell-lioni.
15 Ḻenꞌ bx̱e bsileꞌ yic̱hjlallꞌdoꞌekaꞌ,
naꞌ ṉez nḻeꞌileꞌ yogꞌḻoḻ bin chongakeꞌ.
16 Beṉꞌ wṉabiaꞌnaꞌ,
aga daa napeꞌ beṉꞌ zan wen wdiḻkanꞌ goneꞌ gan lao beṉꞌkaꞌ chdiḻ-leneꞌ,
naꞌ ni beṉꞌ walkaꞌ,
aga wilagakeꞌ ni c̱he yeḻꞌ wal c̱heꞌkaꞌ.
17 Naꞌ aga ni c̱he daa lliagakeꞌ kollꞌ kabaykanꞌ yilagakeꞌ,
ḻaꞌ aga wzaki kabaykaꞌ yislagakb ḻegakeꞌ ḻaꞌkzi nakgakb ba wal.
18 Per X̱ancho Chiozaꞌ toshiizi chap chwieꞌ beṉꞌkaꞌ chall chlleb ḻeꞌ
naꞌ nongakeꞌ lez yeḻꞌ chaki c̱heꞌnaꞌ,
19 naꞌ chisleꞌ ḻegakeꞌ lao yeḻꞌ witaꞌ,
naꞌ weꞌcheꞌ yeḻꞌ mban c̱hegakeꞌ ḻaꞌkzi chiꞌ wbinnaꞌ.
20 Choꞌ nx̱enilallꞌcho X̱ancho Chiozaꞌ,
beenaꞌ chakleneꞌ choꞌ naꞌ chkwashꞌ chkweejeꞌ choꞌ lao bittez dii nxoll.
21 Do yic̱hj do lallꞌcho yiba yizakicho daa nombiaꞌcho X̱ancho Chiozaꞌ,
ḻaꞌ nx̱enilallꞌcho beenaꞌ nak dowalj beṉꞌ ḻi beṉꞌ shaoꞌ.
22 Yeḻꞌ chiyeshꞌlallii c̱hoꞌnaꞌ soalengachan netoꞌ,
Chios c̱haꞌ,
kon ka nonntoꞌ lez gonoꞌ.