Salmo 32
1 Chakomba beenaꞌ ba biyakxen xtoḻeenaꞌ,
naꞌ ba biyol binit saaxya c̱heꞌnaꞌ.
2 Chakomba beenaꞌ iṉa X̱ancho Chiozaꞌ bichbi xtoḻee de,
beenaꞌ bibi yeḻꞌ wxiyeꞌ yoo ḻoo yic̱hjlallꞌdoꞌenaꞌ.
3 Shlak bi bix̱oadoḻaa saaxyakaꞌ benꞌ,
beli chen c̱haꞌni zejch bsisan
daa wchellyeshaa toshiizi.
4 Ḻaꞌ ka waḻ ka tella bdioꞌ nadꞌ lo yeḻꞌ zakꞌziꞌnaꞌ.
Naꞌ zejch bsisꞌ,
gok c̱haꞌ ka chak c̱he yejdoꞌnaꞌ chkwedan lo banaꞌ.
5 Naꞌch bix̱oadoḻaa lawoꞌnaꞌ saaxyakaꞌ benꞌ,
naꞌ ni ton bi bkwashidꞌ liꞌ.
Ḻaꞌ wniaꞌ:
“Yix̱oadolaa lao Chiozaꞌ saaxyakaꞌ benꞌ.”
Naꞌ liꞌ,
biziꞌxenoꞌ saaxya c̱haꞌkaꞌ.
6 Daan,
beṉꞌkaꞌ nonḻilallꞌgakeꞌ liꞌ,
weꞌḻwillgakeꞌ liꞌ shlak ni de latj yiyiljgakeꞌ liꞌ;
naꞌ ḻaꞌkzi ka to yao xen iyalj diikaꞌ wtiḻgakeꞌ
aga bi gonin ḻegakeꞌ.
7 Linꞌ nakoꞌ ka to latj ga shoꞌa kwenc̱he kono bi goni nadꞌ;
naꞌ chkwashꞌ chkweejoꞌ nadꞌ lao bittezə dii nxoll,
naꞌ goḻ iṉiaꞌ liꞌ daa chisloꞌ nadꞌ.
8 X̱ancho Chiozaꞌ neꞌ:
“Nadꞌ wzajniidꞌ liꞌ,
naꞌ wliidꞌ liꞌ nezaꞌ daa chiyaḻꞌ shoꞌ;
naꞌ weꞌlenꞌ liꞌ dillꞌ daa chiyaḻꞌ gonoꞌ,
naꞌ gap wwiaꞌ liꞌ.
9 Bi gonoꞌ ka chon kabayaꞌ wa bllinꞌnaꞌ,
bakaꞌ bi nteyi;
bakaꞌ chonan byen kwee dochoꞌab
kwenc̱he gak koyoeꞌb.”
10 Beṉꞌ malkaꞌ dii zan yeḻꞌ ziꞌ yen ileꞌgakileꞌ,
san yeḻꞌ chiyeshꞌlallii c̱he X̱ancho Chiozaꞌ
zoalenan beṉꞌkaꞌ nx̱enilallꞌ ḻeꞌ.
11 Ḻi yiba yizaki lao X̱ancho Chiozaꞌ
ka leꞌ nakle beṉꞌ ḻi beṉꞌ shaoꞌ.
Naꞌ leꞌ ngooshḻilallꞌle,
ḻi goḻ iṉe daa chiba chizakile.