Salmo 31
1 Chios c̱haꞌ,
linꞌ nx̱enilallaa;
biga wiꞌo latj siꞌa yeḻꞌ ztoꞌ.
Bislagach nadꞌ,
daa nakoꞌ beṉꞌ ḻi beṉꞌ shaoꞌ.
2 Bzenaggach c̱haꞌ,
naꞌ bi shailoꞌ yisloꞌ nadꞌ.
Bkwashꞌ bkweejgach nadꞌ naꞌ bisla nadꞌ
ḻaꞌ liꞌ nakoꞌ ka to yaj xen dii chkwashꞌ chkweejan beṉꞌ,
naꞌ ka to yoo dii nak c̱hec̱h ga kono gak shoꞌ bi goni ḻeꞌ.
3 Linꞌ zaklebiloꞌ to yaj xen dii chkwashꞌ chkweejan nadꞌ,
naꞌ ka to yoo dii nak c̱hec̱h ga kono gak shoꞌ bi goni nadꞌ.
Wloogach nadꞌ lo nez ḻi c̱hoꞌnaꞌ naꞌ wdap bwiagach nadꞌ
kwenc̱he shoo balaaṉ.
4 Bislagach nadꞌ lawi daa ba ngoo beṉꞌ malkaꞌ xṉezin gongakeꞌ c̱haꞌ,
ḻaꞌ linꞌ chap chwioꞌ nadꞌ.
5 Chonꞌ kwinꞌ lallꞌ noꞌ,
Chios c̱haꞌ.
Bislagach nadꞌ,
daa chonoꞌ kon ka ba bc̱heboꞌ.
6 Ḻe chakzbanidꞌ beṉꞌkaꞌ nx̱enilallꞌgakeꞌ diikaꞌ noni chios c̱hegakeꞌ,
diikaꞌ bibi chak gon,
san nadꞌ nx̱enilallaa liꞌ,
Chios c̱haꞌ.
7 Chiba chizakidꞌ daa chiyeshꞌlalliloꞌ nadꞌ,
ḻaꞌ ṉeziloꞌ bi chak wen c̱haꞌ
naꞌ chakbeꞌiloꞌ ka nyeshꞌ zoa yic̱hjlallꞌdawaani.
8 Bi biꞌo latj gakꞌ lallꞌ naꞌ beṉꞌkaꞌ chakziꞌ chakzbani nadꞌ,
san bisloꞌ nadꞌ lao dii nxollkaꞌ.
9 Biyeshꞌlallꞌgachi nadꞌ,
Chios c̱haꞌ,
ḻaꞌ ḻe chakshejlallaa ni c̱heyi diikaꞌ chen chleꞌidꞌ.
Ax̱t ba chde c̱he jalawꞌki daa ḻe chbellꞌ,
naꞌ do ka naktiaꞌ bi zoa wen.
10 Zejdozi chde c̱haꞌ daa toshiizi chibanidꞌ
ni c̱heyi diikaꞌ chen chleꞌidꞌ.
Naꞌ ba chsisꞌ daa ḻe chakyeshidꞌ,
naꞌ ax̱t llitki yoꞌa ba chde c̱hegakin.
11 Beṉꞌkaꞌ chakziꞌ chakzbani nadꞌ chleꞌgakileꞌ nadꞌ ka nozə,
naꞌ ax̱t ziꞌtechlə chleꞌi beṉꞌ wlill c̱haꞌkaꞌ nadꞌ.
Beṉꞌkaꞌ nombiaꞌ nadꞌ ax̱t chall chllebgakeꞌ chleꞌgakileꞌ nadꞌ.
Naꞌ yogꞌ beṉꞌ chze choꞌa chze laweꞌka chleꞌgakileꞌ nadꞌ tnezaꞌ.
12 Ba goḻ-lallꞌgakeꞌ nadꞌ ka chaḻ-lallꞌgakeꞌ to beṉꞌ ba wit;
naꞌ chleꞌgakileꞌ nadꞌ ka to xwag dii ba chiꞌbeb.
13 Naꞌ chiyenidꞌ daa chṉegakeꞌ c̱haꞌ,
naꞌ ngoosheban nadꞌ gattezə chec̱hj chdaꞌ.
Naꞌ nshagui ljwellgakeꞌ chgoogakeꞌ xṉezin wsi wc̱hoggakeꞌ yeḻꞌ mban c̱haꞌni.
14 Per nadꞌ nx̱enilallaa liꞌ,
Chios c̱haꞌ,
naꞌ niaꞌ:
“Linꞌ nakoꞌ Chios c̱haꞌ.”
15 Lo ṉiꞌa noonaꞌ zoa yeḻꞌ mban c̱haꞌni.
Bislagach nadꞌ lo ṉiꞌa naꞌ beṉꞌkaꞌ chakziꞌ chakzbangakileꞌ nadꞌ naꞌ chinogakeꞌ nadꞌ.
16 Bleꞌshiigachi nadꞌ,
naꞌ bislagach nadꞌ daa nakoꞌ beṉꞌ chiyeshꞌlallii.
17 Chios c̱haꞌ,
bi wiꞌo latj siꞌa yeḻꞌ ztoꞌ,
ḻaꞌ ba wṉabidꞌ liꞌ gaklenoꞌ nadꞌ.
San beṉꞌ malkanꞌ siꞌshgagakeꞌ yeḻꞌ ztoꞌ,
naꞌ yillingakeꞌ ganaꞌ lleꞌ beṉꞌ wetkaꞌ
ganaꞌ bich yida yiṉegakeꞌ.
18 Yidakwshga choꞌa ḻollꞌ beṉꞌ wxiyeꞌkaꞌ,
beṉꞌkaꞌ nak beṉꞌ chaꞌsib
naꞌ chbell chṉegakeꞌ zibiaꞌ c̱he beṉꞌ ḻi beṉꞌ shaoꞌkaꞌ.
19 Dii choo dii xen nak yeḻꞌ wen c̱hoꞌnaꞌ daa ngooshawoo c̱he beṉꞌkaꞌ chall chlleb liꞌ,
naꞌ chwiate beṉꞌ choon beṉꞌkaꞌ nx̱enilallꞌgakeꞌ liꞌ.
20 Daa zoalenoꞌ ḻegakeꞌ chkwashoo ḻegakeꞌ
kwenc̱he kono bi goni ḻegakeꞌ,
naꞌ chkweejoꞌ ḻegakeꞌ lao beṉꞌkaꞌ chbell chṉe c̱hegakeꞌ.
21 Choeꞌlawaa Chios c̱haꞌnaꞌ,
daa ḻe chakileꞌ nadꞌ naꞌ dii xen dii ba gokleneꞌ nadꞌ
llanaꞌ wllagdiaꞌ yeḻꞌ zakꞌziꞌkaꞌ nadꞌ.
22 Kanaꞌ gokshejlallaa wniaꞌ:
“Ba wlej yic̱hjoꞌ nadꞌ”;
Per liꞌ bzenagoꞌ ka wṉabidꞌ liꞌ gaklenoꞌ nadꞌ.
23 Ḻi gaki X̱ancho Chiozaꞌ,
yogꞌle leꞌ nakle lallꞌ nee.
Ḻeꞌ chap chwieꞌ beṉꞌkaꞌ nx̱enilallii ḻeꞌ do yic̱hj do lallꞌgakeꞌ,
san beṉꞌ chaꞌsibkaꞌ,
wsakꞌziꞌe ḻegakeꞌ kon ka chiyaḻꞌ gak c̱hegakeꞌ.
24 Ḻi gondiplallꞌ naꞌ ḻi gak wal
yogꞌle leꞌ nonle lez X̱ancho Chiozaꞌ.