Salmo 30
1 Choeꞌlawaa liꞌ,
Chios c̱haꞌ,
ḻaꞌ linꞌ ba bisloꞌ nadꞌ,
naꞌ bi biꞌo choꞌa xba beṉꞌkaꞌ chakziꞌ chakzbani nadꞌ.
2 Chios c̱haꞌ,
wṉabidꞌ liꞌ gaklenoꞌ nadꞌ
naꞌ bizoꞌ nadꞌ shiꞌa shaoꞌ.
3 Chios c̱haꞌ,
bisloꞌ nadꞌ lao yeḻꞌ witaꞌ,
naꞌ biyoṉoꞌ yeḻꞌ mban c̱haꞌ sto shii kwenc̱he bi billinꞌ ganaꞌ lleꞌ beṉꞌ wetkaꞌ.
4 Ḻi goḻ iṉe X̱ancho Chiozaꞌ,
leꞌ nakle lallꞌ nee.
Ḻi weꞌlaꞌo beenaꞌ nak dowalj beṉꞌ ḻi beṉꞌ shaoꞌ.
5 Ḻaꞌ toldezə te yeḻꞌ chllaa c̱heꞌnaꞌ,
san yeḻꞌ goklen c̱heꞌnaꞌ zoalenan choꞌ shnon mbancho.
Ḻaꞌkzi do yel kwiꞌa kwellꞌ,
ka sheeniꞌ llanaꞌ sto yiba yizakidꞌ.
6 Ka wzoaꞌ mbalaz,
naꞌ wniaꞌ:
“Bibi de dii wwall wsheban nadꞌ.”
7 Ḻaꞌ liꞌ,
Chios c̱haꞌ,
kon yeḻꞌ goklen c̱hoꞌnaꞌ
bzoac̱hec̱hoꞌ nadꞌ ka to yaa xen daa kono gak wx̱iz wta.
Per ka gokidꞌ ba wlej yic̱hjoꞌ nadꞌ,
gokshejlallaa.
8 Chṉabidꞌ liꞌ gaklenoꞌ nadꞌ,
Chios c̱haꞌ,
naꞌ chatꞌyoidꞌ liꞌ yiyeshꞌlalliloꞌ nadꞌ.
9 ¿Bitgui de gonoꞌ gan shi guetꞌ
naꞌ wḻetjgakeꞌ nadꞌ ḻoo banaꞌ?
¿Awak weꞌlawaa liꞌ katꞌ ba biyakꞌ bishte yell-lio?
¿Awak weꞌ bishtenaꞌ dillꞌ daa chontioꞌ diikaꞌ chc̱heboꞌ?
10 Bzenaggach c̱haꞌ,
Chios c̱haꞌ,
naꞌ biyeshꞌlallii nadꞌ.
Goklengach nadꞌ,
Chios c̱haꞌ.
11 Ba bishoo yeḻꞌ chakyeshii c̱haꞌnaꞌ
naꞌ ba biyonoꞌn to yeḻꞌ chiba chizaki.
Ba bikwasoꞌ lechꞌ zeshaa gokwꞌ llakaꞌ gokyeshidꞌ,
naꞌ ba biwakoꞌ nadꞌ lechꞌ wennaꞌ daa chliꞌn zoa mbalaz.
12 Daan,
goḻ iṉiaꞌ liꞌ,
Chios c̱haꞌ,
naꞌ biga zoa to lla ki goḻ iṉiaꞌ liꞌ.
Chios c̱haꞌ,
toshiizi weꞌlawaa liꞌ.