Salmo 28
1 Chios c̱haꞌ,
chṉabidꞌ liꞌ gaklenoꞌ nadꞌ
daa nakoꞌ ka to yaj xen daa chkweej nadꞌ.
Bzenaggach dga niaꞌ liꞌ.
Ḻaꞌ shi bi wzenagoꞌ c̱haꞌ,
wdekz c̱haꞌ nadaan,
shi ṉaa,
naꞌ ba nakten yiyaa ladj beṉꞌ wetkaꞌ.
2 Bzenaggach c̱haꞌ katꞌ chatꞌyoidꞌ liꞌ gaklenoꞌ nadꞌ
naꞌ chḻis naꞌnaꞌ chwiaꞌ ka de ganaꞌ zoalə lill xḻatjoꞌnaꞌ choeꞌḻwillꞌ liꞌ.
3 Bi wsi wc̱hogoꞌ yeḻꞌ mban c̱haꞌni txen kon c̱he beṉꞌ saaxyakaꞌ,
beṉꞌkaꞌ chon dii malaꞌ.
Ḻegakeꞌ chonzgakeꞌ ka choeꞌlen beṉꞌ dillꞌ goll-lallꞌ,
per ḻoo yic̱hjlallꞌdoꞌekaꞌ chzaꞌlallꞌgakeꞌ gongakeꞌ mal c̱hegakeꞌ.
4 Bengach c̱hegakeꞌ kon ka nak daa bengakeꞌ;
beꞌgakeꞌ daa chidoḻꞌgakeꞌ kon ka nak dii malkaꞌ benlen ṉiꞌa neekaꞌ.
Bsakꞌziꞌgachgakeꞌ kwasḻoḻ kon ka chidoḻꞌgakeꞌ.
5 Daa bi ngoo yic̱hjgakeꞌ diikaꞌ chon X̱ancho Chiozaꞌ,
ni diikaꞌ bx̱e bsileꞌ kon ṉiꞌa neenaꞌ,
ḻekzeꞌ wlliayee ḻegakeꞌ naꞌ bichga yillia yilengakeꞌ.
6 ¡Choeꞌlawaa X̱ancho Chiozaꞌ,
daa bzenagueꞌ diikaꞌ wṉabidee!
7 X̱ancho Chiozaꞌ napeꞌ yeḻꞌ wak naꞌ chkweejeꞌ nadꞌ lao bittezə dii nxoll;
ḻenꞌ nx̱enilallaa do yic̱hj do lallaa naꞌ ḻekzenꞌ chakleneꞌ nadꞌ.
Naꞌ ni c̱heyinnanꞌ chibayi lallꞌdawaani,
naꞌ goḻ iṉiaꞌneꞌ.
8 X̱ancho Chiozaꞌ napeꞌ yeḻꞌ wak naꞌ chakleneꞌ beṉꞌkaꞌ nak yell c̱heꞌ;
naꞌ zaklebileꞌ to yoo dii nakc̱hec̱h ga chkwashꞌ beṉꞌ kwenc̱he kono bi goni ḻeꞌ,
naꞌ chkweejeꞌ beenaꞌ nzoeꞌ chṉabiaꞌ naꞌ chisleꞌneꞌ.
9 Bislagach beṉꞌkaꞌ nak yell c̱hoꞌ,
Chios c̱haꞌ,
naꞌ benḻeeygachgakeꞌ.
Wdap bwiagachgakeꞌ,
ka chon beenaꞌ chap chwia xilꞌkaꞌ,
naꞌ goklengachgakeꞌ toshiizi.