Salmo 27
1 X̱ancho Chiozaꞌ nakeꞌ beeniꞌ c̱haꞌ,
naꞌ chisleꞌ nadꞌ lao bittez dii nxoll,
daan,
kono gall illebꞌ.
X̱ancho Chiozaꞌ chkwashꞌ chkweejeꞌ yeḻꞌ mban c̱haꞌni,
daan,
kono gak wwall wsheb nadꞌ.
2 Katꞌ chbiadiꞌa beṉꞌkaꞌ chakziꞌ chakzbani nadꞌ
ax̱t sheḻꞌ dii wxegakileꞌ guetꞌ,
ḻelgakeꞌ chidobgakileꞌn.
3 Ḻaꞌkzi beṉꞌ zan wal gaḻꞌ kweꞌnogakeꞌ nadꞌ,
bi gall illebkzꞌ.
Ḻaꞌkzi zaakgakeꞌ tiḻ-lengakeꞌ nadꞌ,
bibi dii nxoll koo yic̱hjꞌ.
4 Stozə dii chṉabidꞌ Chiozaꞌ,
naꞌ ḻennanꞌ llialallaa:
soaꞌ ḻoo lill xḻatjeꞌnaꞌ shnon mbanꞌ,
kwenc̱he weꞌlawaaneꞌ
naꞌ wwiaꞌ ka mbalaz nakeꞌ.
5 Llanaꞌ zaak diikaꞌ wtiḻꞌ,
Chios c̱haꞌnaꞌ wkwashꞌ wkweejeꞌ nadꞌ ḻoo lill xḻatjeꞌnaꞌ,
ganaꞌ zoeꞌ.
Naꞌ wzoeꞌ nadꞌ ka to lo yaj sib wal ganaꞌ kono gak bi goni nadꞌ.
6 Naꞌ gontip gonc̱hec̱heꞌ nadꞌ lao beṉꞌkaꞌ chinaḻꞌ chino nadꞌ.
Naꞌ leshꞌ lill xḻatjeꞌnaꞌ witꞌ bayix̱ꞌkaꞌ weꞌlawaaneꞌ,
naꞌ ax̱t gosyaꞌidꞌ daa ḻe chibaidꞌ naꞌ goḻ iṉiaꞌneꞌ.
7 Bzenaggach,
Chios c̱haꞌ,
dga niaꞌ liꞌ.
¡Biyeshꞌlallii nadꞌ naꞌ bengach daa chṉabidꞌ liꞌ!
8 Lallꞌdawaani nan:
“Biyilj Chiozaꞌ.”
Naꞌ linꞌ yiyiljꞌ,
Chios c̱haꞌ.
9 Bi wlloniloꞌ nadꞌ yeḻꞌ goklen c̱hoꞌnaꞌ.
Bi c̱hooṉlalloo nadꞌ daa chshaa liꞌ,
ḻaꞌ liꞌchgan chaklenoꞌ nadꞌ.
Bi wsanlalloo nadꞌ ni bi kwej yic̱hjoꞌ nadꞌ,
Chios c̱haꞌ,
ḻaꞌ linꞌ yisloꞌ nadꞌ.
10 Ḻaꞌkzi x̱axṉaꞌnaꞌ c̱hooṉlallꞌgakeꞌ nadꞌ,
linꞌ gak lallꞌ noo nadꞌ,
Chios c̱haꞌ.
11 Bliꞌgachi nadꞌ nez c̱hoꞌnaꞌ,
Chios c̱haꞌ.
Wloogach nadꞌ lo nez ḻi c̱hoꞌnaꞌ,
daa lleꞌ llaꞌ beṉꞌ chakziꞌ chakzbani nadꞌ.
12 Bi weꞌgachoꞌ latj gongakileꞌ nadꞌ daa nazan c̱hegakeꞌ;
ḻaꞌ ba bshag ljwellgakeꞌ chyiljlallꞌgakeꞌ bizə chon chnagakeꞌ c̱haꞌ,
naꞌ cheengakileꞌ gongakileꞌ nadꞌ zibiaꞌ.
13 Nakla ba gok c̱haꞌ sheḻꞌ ki nx̱enlallaa gaklenoꞌ nadꞌ shnon mbanꞌ.
14 ¡Bx̱enilalloo X̱ancho Chiozaꞌ!
¡Gok wal naꞌ btip lalloo!
¡Bx̱enilalloo X̱ancho Chiozaꞌ!