Salmo 26
1 Chios c̱haꞌ,
wc̱hogbiaꞌgachoꞌ c̱haꞌ kon ka chidoḻaa,
ḻaꞌ do yic̱hj do lallaa chonꞌ ka cheeniloꞌ,
naꞌ bi chakc̱hoplallaa nx̱enilallaa liꞌ,
Chios c̱haꞌ.
2 Biya biyilj yeḻꞌ mban c̱haꞌni,
Chios c̱haꞌ,
naꞌ bembiaꞌgach yogꞌḻoḻ daa yoo ḻoo yic̱hjlallꞌdawaani.
3 Ḻaꞌ toshiizi yoo yic̱hjꞌ ḻe chakiloꞌ nadꞌ
naꞌ toshiizi chonꞌ daa chazlalloo.
4 Bi chonꞌ txen beṉꞌ wxiyeꞌkaꞌ,
ni beṉꞌkaꞌ chonz ka beṉꞌ wen.
5 Chakzbanidꞌ gonꞌ txen beṉꞌkaꞌ nshagui ljwellin chongakeꞌ mal;
naꞌ bigaṉꞌ yillaguidꞌ beṉꞌ saaxyakaꞌ.
6 Ba bix̱is biyib naꞌki lawoꞌnaꞌ daa ṉezidꞌ bibi saaxya ndaꞌ nchen yic̱hjlallꞌdawaani.
Naꞌ ṉaa,
Chios c̱haꞌ,
wak shec̱hj taꞌ ganaꞌ chzeyntoꞌ bayix̱ꞌkaꞌ lawoꞌnaꞌ,
7 naꞌ goḻ iṉiaꞌ liꞌ ka yeni beṉꞌ,
naꞌ wiꞌa dillꞌ c̱he yogꞌ diikaꞌ chonlenoꞌ yeḻꞌ wak choo yeḻꞌ wak xen c̱hoꞌnaꞌ.
8 Chios c̱haꞌ,
ḻe chakidꞌ lill xḻatjoꞌnaꞌ ganaꞌ zoꞌ,
latjaꞌ ganaꞌ chleꞌi beṉꞌkaꞌ ka nak balaaṉ xen c̱hoꞌnaꞌ.
9 Bi wsi wc̱hogoꞌ yeḻꞌ mban c̱haꞌni txen kon c̱he beṉꞌ saaxyakaꞌ,
naꞌ bi wiꞌo latj guetꞌ ka chet beṉꞌ wen xyakaꞌ,
10 beṉꞌkaꞌ shinchizozi chonlen ṉiꞌa neekaꞌ dii malaꞌ,
naꞌ chkaagakeꞌ bi dii chshabi beṉꞌ ḻegakeꞌ kwenc̱he gongakeꞌ daa bi chiyaḻꞌ gongakeꞌ.
11 San nadꞌ do yic̱hj do lallaa nsaꞌ c̱haꞌ wen lawoꞌnaꞌ;
bisla nadꞌ naꞌ biyeshꞌlallii nadꞌ.
12 Toshiizi zoac̱hec̱hꞌ chonꞌ daa nak wen.
Weꞌlawaa Chiozaꞌ ladj beṉꞌkaꞌ chdop chllag choeꞌlaꞌogakeꞌneꞌ.