Salmo 25
1 Choeꞌḻwillꞌ liꞌ,
Chios c̱haꞌ.
2 Chios c̱haꞌ,
linꞌ nx̱enilallaa.
Bi wiꞌo latj siꞌa yeḻꞌ ztoꞌ kwenc̱he
ki wxilli beṉꞌkaꞌ chakziꞌ chakzbani nadꞌ.
3 Dii ḻicha ni to beṉꞌkaꞌ nx̱enilallii liꞌ biga siꞌgakeꞌ yeḻꞌ ztoꞌ;
san beenaꞌ chec̱hjeꞌ goneꞌ mal c̱he bishꞌ ljwelleꞌnaꞌ ḻaꞌkzi bibi choneꞌ c̱heꞌ,
beenanꞌ siꞌe yeḻꞌ ztoꞌ.
4 Bliꞌgachi nadꞌ nez c̱hoꞌnaꞌ,
Chios c̱haꞌ,
wloogach nadꞌ lo nez c̱hoꞌnaꞌ.
5 Wloogach nadꞌ lo nez ḻi c̱hoꞌnaꞌ naꞌ bzajniꞌgachi nadꞌ,
ḻaꞌ linꞌ nakoꞌ Chios c̱haꞌ naꞌ chisloꞌ nadꞌ lao bittez dii nxoll.
¡Naꞌ linꞌ nonꞌ lez toshiizi!
6 Chios c̱haꞌ,
jadingachi yeḻꞌ chiyeshꞌlallii c̱hoꞌnaꞌ
naꞌ yeḻꞌ chaki c̱hoꞌnaꞌ daa ba bliiloꞌ netoꞌ toshiizi.
7 Wxiꞌxengach daa bi benꞌ ka cheeniloꞌ,
naꞌ c̱he saaxyakaꞌ benꞌ kanaꞌ nakꞌ beṉꞌ xkwidꞌ.
Biyeshꞌlallii nadꞌ,
Chios c̱haꞌ,
daa nakoꞌ beṉꞌ wen.
8 Beṉꞌ wen naꞌ beṉꞌ ḻi beṉꞌ shaoꞌ nak Chiozaꞌ,
naꞌ chliileꞌ beṉꞌ saaxyakaꞌ nez wen c̱heꞌnaꞌ.
9 Naꞌ chgwee beṉꞌ gax̱jlallꞌkaꞌ lo nez ḻi c̱heꞌnaꞌ,
naꞌ chliꞌ chsedileꞌ ḻegakeꞌ ka chiyaḻꞌ gongakeꞌ.
10 Toshiizi chakileꞌ beṉꞌkaꞌ chon diikaꞌ nllieꞌ biaꞌ;
naꞌ toshiizi choneꞌ ka chc̱hebeꞌ laweꞌkaꞌ.
11 Chios c̱haꞌ,
siꞌxengachoꞌ saaxyakaꞌ ba benꞌ ḻaꞌkzi nakgakan dii zan
kwenc̱he seyi c̱hoꞌ nakoꞌ beṉꞌ chiyeshꞌlallii.
12 Chiozaꞌ wliileꞌ beenaꞌ chall chllebeꞌneꞌ nezaꞌ daa chiyaḻꞌ shoꞌe.
13 Naꞌ gak wen c̱heꞌ,
naꞌ xiiṉ dia c̱heꞌkaꞌ yigaaṉlengakeꞌ yell-lioni dga beꞌ Chiozaꞌneꞌ.
14 Chiozaꞌ chleꞌshiileꞌ beṉꞌkaꞌ chall chlleb ḻeꞌ,
naꞌ chzajniileꞌ ḻegakeꞌ ka nak diikaꞌ cheenileꞌ gongakeꞌ.
15 Toshiizi nx̱enilallaa Chiozaꞌ,
ḻaꞌ ḻeꞌ chisleꞌ nadꞌ lao yogꞌḻoḻ dii nxoll.
16 Chios c̱haꞌ,
bwiagach ka chak c̱haꞌ,
naꞌ biyeshꞌlallꞌgachi nadꞌ
daa chllagloaꞌ yeḻꞌ zakꞌziꞌki naꞌ kono zoa gaklen nadꞌ.
17 Zizikli chan diiki chonyeshꞌgakin yic̱hjlallꞌdawaani.
Bisell biḻaꞌgach nadꞌ lao diiki chllagloaꞌ.
18 Bwiagach ka chllagloaꞌ diiki chak c̱haꞌ,
naꞌ wxiꞌxengach yogꞌḻoḻ saaxyakaꞌ ba benꞌ.
19 Bwiagach ka ba wyan beṉꞌkaꞌ chwiyi nadꞌ,
naꞌ ka chakziꞌ chakzbanlikzgakileꞌ nadꞌ.
20 ¡Wdap bwiagach nadꞌ naꞌ bislagach nadꞌ!
Bi wiꞌo latj wsiꞌgakeꞌ nadꞌ yeḻꞌ ztoꞌ,
ḻaꞌ linꞌ ba nx̱enilallaa.
21 Bkwashꞌ bkweejgach nadꞌ daa zoaꞌ do yic̱hj do lallaa naꞌ chonꞌ ka noꞌ,
ḻaꞌ linꞌ nx̱enilallaa.
22 Chios c̱haꞌ,
bislagach netoꞌ beṉꞌ Israel
lao yogꞌḻoḻ diikaꞌ chak c̱hentoꞌ.