Salmo 24
1 C̱he X̱ancho Chiozaꞌ nak doxen yell-lioni
naꞌ yogꞌḻoḻ dii de lawinni,
len yogꞌḻoḻ beṉꞌ lleꞌ llaꞌ lawinni.
2 Ḻaꞌ ḻenꞌ bx̱e bsileꞌn naꞌ bzoac̱hec̱heꞌn ḻoo nisaꞌ.
3 ¿Noran gak shaj lo yaa c̱he X̱anchonaꞌ?
¿Noran gak soa lill xḻatjeꞌnaꞌ?
4 Beenaꞌ bibi dii mal choneꞌ,
naꞌ nxi nyech yic̱hjlallꞌdoꞌenaꞌ;
beenaꞌ bi choeꞌlaꞌo lwaa lsakꞌ diikaꞌ bi nak dowalj chios,
ni bi chziyee katꞌ chc̱hebeꞌ bi goneꞌ.
5 Beenaꞌ chon kaꞌ,
X̱ancho Chiozaꞌ chisleꞌneꞌ
naꞌ goneꞌ ka gak wen c̱heꞌ,
naꞌ ka wc̱hogbiꞌe c̱heꞌ,
iṉeꞌ bibi xtoḻee de.
6 Kanꞌ nak beṉꞌkaꞌ nx̱enilallꞌ X̱ancho Chiozaꞌ,
beṉꞌkaꞌ choeꞌlaꞌo beenaꞌ beꞌlaꞌo dii Jacobaꞌ.
7 ¡Ḻi wsalj puertkaꞌ zoa kaniꞌteyi!
¡Ḻi wsalj c̱hop ḻaategakan
kwenc̱he shoꞌ beenaꞌ zeelo chṉabiaꞌ!
8 ¿Nora beenaꞌ zeelo chṉabiaꞌ?
Ḻenꞌ X̱ancho Chiozaꞌ,
beenaꞌ zeelo nak beṉꞌ wal naꞌ beṉꞌ yeḻꞌ wak choo yeḻꞌ wak xen.
Ḻenꞌ X̱anchonaꞌ,
beenaꞌ choneꞌ gan lao yogꞌḻoḻ beṉꞌkaꞌ chdiḻ-lengakeꞌneꞌ.
9 ¡Ḻi wsalj puertkaꞌ zoa kaniꞌteyi!
¡Ḻi wsalj c̱hop ḻaategakan
kwenc̱he shoꞌ beenaꞌ zeelo chṉabiaꞌ!
10 ¿Nora beenaꞌ zeelo chṉabiaꞌ?
Ḻenꞌ X̱ancho Chiozaꞌ,
beenaꞌ zeelo nak beṉꞌ yeḻꞌ wak choo yeḻꞌ wak xen.
Ḻenꞌ nakeꞌ beenaꞌ zeelo chṉabiaꞌ.