Salmo 21
1 Chios c̱haꞌ,
beenaꞌ nzoꞌ chṉabiꞌe chibachgaileꞌ daa benoꞌneꞌ beṉꞌ wal;
naꞌ daa goklenoꞌneꞌ beneꞌ gan lo wdiḻaꞌ ḻe chiba chizakileꞌ.
2 Ba benoꞌ ka gok diikaꞌ llialallee,
naꞌ bi bsej blloniloꞌneꞌ diikaꞌ wṉabileꞌ liꞌ.
3 Ba bleboꞌneꞌ naꞌ benḻeeyoꞌneꞌ dii xen;
naꞌ bllinoꞌ yic̱hjeꞌnaꞌ to corona de or.
4 Wṉabileꞌ liꞌ wiꞌoneꞌ yeḻꞌ gaꞌ yeḻꞌ mban,
naꞌ biꞌoneꞌ to yeḻꞌ mban xen.
5 Ḻe zeyi c̱heꞌ daa chaklenoꞌneꞌ,
naꞌ ba benoꞌ kwenc̱he koo beṉꞌ ḻeꞌ balaaṉ naꞌ nonoꞌneꞌ to beṉꞌ wṉabiaꞌ xen.
6 Ba benḻeeyoꞌneꞌ toshiizi,
naꞌ daa zoalenoꞌneꞌ ḻe chiba chizakileꞌ.
7 Daa nx̱enilallꞌ beṉꞌ wṉabiaꞌnaꞌ X̱ancho Chiozaꞌ,
beenaꞌ ḻiizelozi nak beṉꞌ choo beṉꞌ xen,
daan chiyeshꞌlallileꞌneꞌ,
naꞌ aga no so saki yikwas yeḻꞌ wṉabiaꞌ c̱heꞌnaꞌ.
8 Naꞌ daa napoꞌ yeḻꞌ wakanꞌ,
wzapoꞌ yogꞌ beṉꞌkaꞌ chakziꞌ chakzbani liꞌ,
naꞌ wsakꞌziꞌo beṉꞌkaꞌ chwiyi liꞌ.
9 Naꞌ wlliayoo ḻegakeꞌ lo yiꞌnaꞌ
llanaꞌ wc̱hogloꞌ c̱hegakeꞌ.
X̱ancho Chiozaꞌ wlliayee ḻegakeꞌ daa chllee ḻegakeꞌ,
naꞌ kwiayiꞌgakeꞌ lo yiꞌnaꞌ.
10 Naꞌ yisol yiṉitoꞌ xiiṉ c̱heꞌkaꞌ lo yell-lioni,
naꞌ yisya yisḻenoꞌ dia c̱heꞌkaꞌ.
11 Ḻaꞌkzi chiyiljlallꞌgakeꞌ bi gongakileꞌ liꞌ
naꞌ chgoogakeꞌ xṉezin bi gongakeꞌ c̱hoꞌ,
aga waklatꞌ ka cheengakileꞌ.
12 Ḻaꞌ gonoꞌ ka yixoṉjdogakeꞌ
ka wzioꞌ xis wix̱itꞌ c̱hoꞌnaꞌ laweꞌkaꞌ.
13 Shajlaꞌoshgoꞌ daa nakoꞌ beṉꞌ yeḻꞌ wak xen,
Chios c̱haꞌ.
Naꞌ goḻ iṉentoꞌ liꞌ,
weꞌntoꞌ dillꞌ c̱he diikaꞌ chonlenoꞌ yeḻꞌ wak xen c̱hoꞌnaꞌ.