Salmo 22
1 Chios c̱haꞌ,
Chios c̱haꞌ,
¿bic̱he ba wlej yic̱hjzoꞌ nadꞌ?
¿bic̱he bi chidoꞌ yisloꞌ nadꞌ,
ni bi chzenagoꞌ ka chonyeshaa?
2 Chios c̱haꞌ,
ka tella ka waḻ chṉabidꞌ liꞌ yeḻꞌ goklen c̱hoꞌnaꞌ,
per bikzə chonoꞌ daa chṉabidꞌ liꞌ,
naꞌ bibi yeḻꞌ wixiꞌlallꞌ c̱haꞌ de.
3 Linꞌ zeelo nakoꞌ dowalj beṉꞌ ḻi beṉꞌ shaoꞌ,
naꞌ chṉabiꞌo,
naꞌ linꞌ choeꞌlaꞌontoꞌ netoꞌ beṉꞌ Israel.
4 Dii x̱ozꞌxtoꞌntoꞌkaꞌ bengakeꞌ liꞌ lez,
naꞌ bisloꞌ ḻegakeꞌ daa bx̱enilallꞌgakeꞌ liꞌ.
5 Wṉabgakeꞌ yeḻꞌ goklen c̱hoꞌnaꞌ,
naꞌ bislagakoꞌneꞌ;
bx̱enilallꞌgakeꞌ liꞌ,
naꞌ bi bgaaṉgakeꞌ yeḻꞌ ztoꞌ.
6 Per yogꞌ beṉꞌ nagakeꞌ c̱haꞌ aga no nakꞌ ni bibi zakaa.
Chtitj chtangakileꞌ nadꞌ naꞌ chongakileꞌ nadꞌ nakzi.
7 Yogꞌte beṉꞌkaꞌ chleꞌgakileꞌ nadꞌ chṉeḻegakeꞌ c̱haꞌ,
naꞌ chṉegakeꞌ zibiaꞌlaz,
nagakeꞌ:
8 “Beenin nx̱enilallee Chiozaꞌ;
yislashki Chiozaꞌneꞌ ṉaa shi leileꞌ chakileꞌneꞌ.”
9 Liꞌkzan benoꞌ kwenc̱he wxan xṉaꞌnaꞌ nadꞌ;
naꞌ ba chap chwiakzoꞌ nadꞌ kanaꞌ ni chwallꞌ chx̱optieꞌ nadꞌ.
10 Kanaꞌ ziꞌ galjtiaꞌ,
ba nakꞌ lallꞌ noo;
kanaꞌ ni yootiaꞌ ḻoo ḻee xṉaꞌnaꞌ,
ba nakkzoꞌ Chios c̱haꞌ.
11 Bi wkwaaṉoꞌ nadꞌ tozꞌ,
ḻaꞌ ba zaꞌ daa idiḻ illagꞌ,
naꞌ kono zoa gaklen nadꞌ.
12 Beṉꞌkaꞌ chwiyi nadꞌ llagdiaꞌgakeꞌ nadꞌ
chongakeꞌ zṉia ka no gooṉ wilag,
bakaꞌ llaꞌ lo yell-lionaꞌ ganaꞌ mbani Basánnaꞌ.
13 Naꞌ chosyaagakeꞌ ka no bell zṉia wal,
cheengakileꞌ gasꞌ x̱ejgakeꞌ nadꞌ.
14 Ba chde c̱he yeḻꞌ mban c̱haꞌni,
chak c̱heyin ka nis dii chlalj.
Llitki yoꞌa bich ndiḻ nllaggakan,
naꞌ yic̱hjlallꞌdawaani ba chsisan.
15 Ba bidolallaa naꞌ ba bex̱j fuerz c̱haꞌni,
naꞌ ḻollaani daꞌbillan ḻoo choꞌani.
Ba choeꞌtekzoꞌ latj ileꞌidꞌ yeḻꞌ witaꞌ
naꞌ yiyakꞌ bishte yell-lio.
16 Beṉꞌ zbankaꞌ,
beṉꞌkaꞌ nak ka bekwꞌ zṉia,
ba nec̱hjgakeꞌ nadꞌ,
naꞌ bido weꞌzi ba nongakeꞌ ṉiꞌa naꞌki.
17 Ba biles yidxaꞌni ax̱t ba nḻaꞌ llitki yoꞌa.
Naꞌ beṉꞌkaꞌ chwiyi nadꞌ kon lleꞌgakeꞌ chwiagakeꞌ nadꞌ.
18 Bilaagakileꞌ xaꞌnaꞌ,
naꞌ bengakeꞌ to wyitj kwenc̱he bchej beṉꞌkaꞌ wkaan.
19 Naꞌ liꞌ,
Chios c̱haꞌ,
liꞌ nakoꞌ beṉꞌ chaklen nadꞌ,
¡bi wḻaalawoo nadꞌ!
¡Bi shagachiloꞌ yidyaklenoꞌ nadꞌ!
20 Bislagach nadꞌ kwenc̱he bi witgakeꞌ nadꞌ;
bi wiꞌo latj yikaa beṉꞌkaꞌ nak ka bekwꞌ zṉia yeḻꞌ mban c̱haꞌni.
21 Bisla nadꞌ lo ṉiꞌa naꞌ beṉꞌkaꞌ nak ka bell zṉia,
beṉꞌkaꞌ chon ka gooṉ wilag.
22 Naꞌ wiꞌa dillꞌ c̱hoꞌ lao bishꞌ ljwellꞌkaꞌ,
naꞌ goḻ iṉiaꞌ liꞌ ladj beṉꞌkaꞌ chdop chllag choeꞌlaꞌogakeꞌ liꞌ.
23 Ka leꞌ chall chlleble X̱ancho Chiozaꞌ,
¡ḻi goḻ iṉieꞌ!
¡Ḻi kwee balaaṉ,
ka leꞌ nakle xiiṉ dia c̱he dii Jacobaꞌ!
¡Ḻi weꞌlawee,
ka leꞌ nakle xiiṉ dia c̱he dii Israelaꞌ!
24 Ḻaꞌ ḻeꞌ bi chonileꞌ nakzi beenaꞌ chakyeshii,
ni bi chdegoneꞌ gakleneꞌneꞌ katꞌ chzakꞌziꞌe,
ni bi chbej yic̱hjeꞌneꞌ.
San chzenagueꞌ c̱heꞌ katꞌ chṉabileꞌneꞌ yeḻꞌ goklen.
25 Weꞌlawaa liꞌ lao lkweꞌ beṉꞌ be beṉꞌ zilkaꞌ chdop chllag choeꞌlaꞌogakeꞌ liꞌ.
Lao beṉꞌkaꞌ chall chlleb liꞌ goṉꞌ diikaꞌ ba nc̱hebꞌ.
26 Naꞌ yeej gao beṉꞌ yeshꞌdoꞌkaꞌ ax̱t ka yelj shaꞌgakileꞌ;
naꞌ beṉꞌkaꞌ chiyiljgakeꞌ X̱ancho Chiozaꞌ,
weꞌlaꞌogakeꞌneꞌ.
27 Ax̱t ganaꞌ zeelo chiyoll chido yell-lioni
lljadin lljazaꞌlallꞌgakileꞌ X̱ancho Chiozaꞌ,
naꞌ weꞌlaꞌogakeꞌneꞌ.
Beṉꞌkaꞌ lleꞌ to to yell doxen yell-lioni
wc̱hekꞌ yic̱hj wc̱hekꞌ laogakeꞌ laweꞌnaꞌ weꞌlaꞌogakeꞌneꞌ.
28 Doxen yeḻꞌ wṉabiaꞌnaꞌ naki c̱he X̱ancho Chiozaꞌ;
naꞌ chṉabiꞌe yogꞌḻoḻ beṉꞌ lleꞌ doxen yell-lioni.
29 Naꞌ beṉꞌkaꞌ chaj chde wen,
yeej gaogakeꞌ naꞌ weꞌlaꞌogakeꞌneꞌ.
Naꞌ beṉꞌkaꞌ bi naki c̱hegakeꞌ yeḻꞌ mbannaꞌ,
beṉꞌkaꞌ yiyak bishte yell-lio,
wc̱hekꞌ yic̱hj wc̱hekꞌ laogakeꞌ laweꞌnaꞌ.
30 Xiiṉ dia c̱haꞌkaꞌ weꞌlaꞌogakeꞌ X̱ancho Chiozaꞌ;
naꞌ shnon mbangakeꞌ weꞌgakeꞌ xtilleenaꞌ.
31 Ax̱t len lao beṉꞌkaꞌ ziꞌ galjə,
weꞌgakeꞌ xtilleenaꞌ nakeꞌ beṉꞌ ḻi beṉꞌ shaoꞌ daa bisleꞌ ḻegakeꞌ.