Salmo 20
1 X̱ancho Chiozaꞌ wzenagshgueꞌ c̱hoꞌ llanaꞌ bi chak wen c̱hoꞌ.
Chiozaꞌ beenaꞌ beꞌlaꞌo dii Jacobaꞌ,
gap wwiashgueꞌ liꞌ.
2 Lo Yaa Siónnaꞌ ganaꞌ zoate lill xḻatjeꞌnaꞌ
wzenagueꞌ naꞌ gakleneꞌ liꞌ.
3 Chiozaꞌ lljadin lljazaꞌlallꞌshgueꞌ ka nak yogꞌ diikaꞌ chzaniloꞌ chooneꞌ,
naꞌ c̱hazlallꞌshgueꞌ bayix̱ꞌkaꞌ chitoꞌ,
bakaꞌ chzeyoꞌ laweꞌnaꞌ.
4 Naꞌ gongshgueꞌ ka gak yogꞌ diikaꞌ chzelalloo,
naꞌ gak diikaꞌ ba ngoo xṉezin gonoꞌ.
5 Netoꞌ yiba yizakintoꞌ katꞌ ba benoꞌ gan lao beṉꞌkaꞌ chdiḻ-len liꞌ,
naꞌ weꞌlaꞌontoꞌ Chiozaꞌ wḻisntoꞌ banderkaꞌ kwenc̱he gakbeꞌi beṉꞌ ba benoꞌ gan lo wdiḻaꞌ.
X̱ancho Chiozaꞌ gonshgueꞌ yogꞌ diikaꞌ chṉabiloꞌneꞌ.
6 Naꞌ ṉaa ba ṉezidꞌ X̱ancho Chiozaꞌ chisleꞌ beenaꞌ nzoeꞌ chṉabiꞌe.
Chzenagueꞌ c̱heꞌ yabanaꞌ ganaꞌ zoatieꞌ
naꞌ chisleꞌneꞌ kon yeḻꞌ wak xen c̱heꞌnaꞌ.
7 Zoa beṉꞌ nx̱enlallꞌgakeꞌ karretkaꞌ chc̱hingakeꞌ lo wdiḻaꞌ,
naꞌ ḻekzkaꞌ zoa beṉꞌ nx̱enlallꞌgakeꞌ kabaykaꞌ,
san choꞌ,
X̱ancho Chiozanꞌ nx̱enilallꞌcho.
8 Naꞌ beṉꞌkaꞌ nx̱enlallꞌgakeꞌ diiki,
aga chzibiaꞌgakeꞌ,
san choꞌ,
chzo chzakichon naꞌ bikzbi chakicho.
9 Chios c̱haꞌ,
bislagach beenaꞌ nzoꞌ chṉabiꞌe,
naꞌ goklengach netoꞌ katꞌ chṉabntoꞌ yeḻꞌ goklen c̱hoꞌnaꞌ.