19
Yabanaꞌ chliꞌn yeḻꞌ wak choo yeḻꞌ wak xen c̱he Chiozaꞌ,
naꞌ choꞌen dillꞌ c̱heyi diikaꞌ beneꞌ.
2 Lla kon lla chyix̱jeꞌin choꞌ ka nak yeḻꞌ wak xen c̱heꞌnaꞌ,
naꞌ waḻkaꞌ chliꞌn ka nak yeḻꞌ sinꞌ c̱heꞌnaꞌ.
3 Ḻaꞌkzi bi yoo xtilliin,
ni bi de bishbe c̱heyin,
4 daa chyix̱jeꞌn chllinan doxen yell-lioni
ax̱t ganaꞌ zeelo chiyoll chidon.
Naꞌ xan yabanaꞌ beneꞌ lill xḻatj wbillaꞌ,
5 naꞌ mbalaz chchejan ka mbalaz chchej beenaꞌ ziꞌ bshagnaꞌ
ganaꞌ ches chnaleneꞌ nool c̱heꞌnaꞌ.
Naꞌ chibain ngoon nez
ka chibayi to beṉꞌ chxoṉj kwenc̱he idoḻee daa llialallee.
6 Wbilldoꞌnaꞌ chlaꞌn shḻaa xan yabanaꞌ,
naꞌ chillinten daa zi shḻaa ganaꞌ chxoan,
naꞌ aga bi de lo yell-lioni dii bi chen chleꞌi wba c̱heyinnaꞌ.
7 Daa chzajnii choꞌa xtillꞌ Chiozaꞌ choꞌ nakan dowalj dii wen,
naꞌ chonan ka chiyakshaoꞌ yic̱hjlallꞌdoꞌ beṉꞌ.
Naꞌ daa nllia Chiozaꞌ biaꞌ goncho nakan dii wx̱enlallꞌcho,
naꞌ chonan beṉꞌ sinꞌ beenaꞌ bi chajnii.
8 Diikaꞌ nllia Chiozaꞌ biaꞌ goncho nakgakan dii ḻi dii shaoꞌ,
naꞌ chongakan ka chiba chizaki yic̱hjlallꞌdoꞌ beṉꞌ.
Diikaꞌ non Chiozaꞌ mandad goncho nakgakan dowalj dii ḻi,
naꞌ nakgakan to beeniꞌ xen c̱hecho.
9 Daa gall illebcho Chiozaꞌ nakan wen,
naꞌ toshiizi gall illebchoneꞌ.
Naꞌ daa na Chiozaꞌ chiyaḻꞌ goncho,
nakan dii ḻi,
naꞌ nakan ka chiyaḻꞌ.
10 Zakꞌchan aga ka zan or daa nak dowalj,
naꞌ zix̱ siachan aga ka shinꞌ baseraꞌ daa nak dowalj.
11 Ḻekzkaꞌ nakan dii chzajnii nadꞌ;
naꞌ daa chonꞌ ka nan,
siaꞌ banez c̱heyin.
12 ¿Gatg zoa beṉꞌ chiyakbeꞌi katꞌ nx̱iṉj nḻeneꞌ?
Chios c̱haꞌ,
wxiꞌxengach dii malkaꞌ biṉꞌ yiyakbeꞌidꞌ ba benꞌ.
13 Bkwasgach yeḻꞌ chaꞌsib c̱haꞌni,
bi weꞌgachoꞌ latj iṉabiaꞌn nadꞌ.
Naꞌ gakꞌ beṉꞌ bibi ndaꞌ nchen,
naꞌ biga wḻaalawaa liꞌ.
14 Ixiꞌ ilebgach xtillaani lawoꞌnaꞌ
len daa chzaꞌlallaa ḻoo yic̱hjlallꞌdawaani,
Chios c̱haꞌ.
Liꞌ nakoꞌ ka to yaj xen dii chkwashꞌ chkweejan nadꞌ naꞌ chisloꞌ nadꞌ.