18
Ḻe chakidꞌ liꞌ,
Chios c̱haꞌ.
Liꞌ chonoꞌ nadꞌ beṉꞌ wal.
2 Chios c̱haꞌ,
liꞌ nakoꞌ ka to yaj xen dii chkwashꞌ chkweejan nadꞌ,
naꞌ nakoꞌ ka to yoo dii nakc̱hec̱h ga shoꞌa kwenc̱he kono bi goni nadꞌ.
Chios c̱haꞌ,
linꞌ chisloꞌ nadꞌ,
naꞌ linꞌ nx̱enilallaa.
Linꞌ chkweejoꞌ nadꞌ,
naꞌ kon yeḻꞌ wak c̱hoꞌnaꞌ chisloꞌ nadꞌ.
Naꞌ linꞌ nakoꞌ ka to latj ganaꞌ zeelo nak sibə ganaꞌ gak wkwashaa kwenc̱he kono bi goni nadꞌ.
3 Weꞌḻwillꞌ Chiozaꞌ,
beenaꞌ chidoḻꞌ weꞌlaꞌocho,
naꞌ yisleꞌ nadꞌ lao beṉꞌkaꞌ chakziꞌ chakzbani nadꞌ.
4 Yeḻꞌ witaꞌ bzapan nadꞌ kwenc̱he nan wsi wc̱hogan nadꞌ;
naꞌ gokan ka to yao xen dii chc̱hiṉj chsell naꞌ nan wchix̱ wḻoḻan nadꞌ.
5 Yeḻꞌ witaꞌ bzapan nadꞌ kwenc̱he nan wsi wc̱hogan nadꞌ,
naꞌ gokan ka to yalj dii bzap nadꞌ kwenc̱he nan kwiayaa.
6 Lo yeḻꞌ zakꞌziꞌnaꞌ ben bleꞌidꞌ,
beꞌḻwillꞌ Chios c̱haꞌnaꞌ,
wṉabidee gakleneꞌ nadꞌ.
7 Naꞌch yeḻꞌ chllaa c̱heꞌnaꞌ benan ka wxoꞌ wṉib yell-lioni dii wal inlleb,
ax̱t do leni yaa yaokaꞌ wxoꞌ wṉibgakan.
8 Bshoꞌ bc̱hezee yaa yeḻkaꞌ naꞌ wzoagakan llen
naꞌ bchejgakan yiꞌ daa chlliayiꞌ chlliade,
naꞌ bzaḻꞌgakan yiꞌ galj.
9 Bsaljeꞌ xan yabanaꞌ betjeꞌ,
naꞌ xṉiꞌenaꞌ wze bej bzakaꞌ.
10 Naꞌ wllieꞌ to anjl zoa x̱ilin:a
naꞌ wzoleneꞌneꞌ lo llazə.
11 Naꞌ yel c̱hoḻaꞌ bkwashaan ḻeꞌ,
naꞌ bej bzakaꞌ yoll nis yejaꞌ wyec̱hjyoban ḻeꞌ.
12 Naꞌ yeḻꞌ chey cheeniꞌ c̱heꞌnaꞌ gokan ka yiꞌ wziwꞌ
naꞌ bchej lo bejkaꞌ yaj yaba naꞌ yiꞌ galj.
13 Naꞌ goshj wtin yabanaꞌ ka wṉe X̱ancho Chiozaꞌ,
beenaꞌ nak ḻizeelozi beṉꞌ choo beṉꞌ xen,
naꞌ bxop yaj yaba naꞌ yiꞌ galj.
14 Naꞌ yiꞌ wziwaa bzaḻee,
gokan ka daa chzaḻꞌ xis wix̱itaa,
naꞌ bisheshleseꞌ beṉꞌkaꞌ chakziꞌ chakzbani nadꞌ,
bilagueꞌ ḻegakeꞌ.
15 Ka wṉe X̱ancho Chiozaꞌ,
naꞌ gok nisdoꞌnaꞌ c̱hoplə bliꞌlao yell-lionaꞌ daa de xaninnaꞌ,
ax̱t ganaꞌ chiꞌ len yell-lioni bliꞌlawin ka bchej bishbe c̱heꞌnaꞌ.
16 Chiozaꞌ gokleneꞌ nadꞌ ganaꞌ lliatieꞌ
naꞌ bisleꞌ nadꞌ kanaꞌ gok c̱haꞌ ka chak c̱he to beṉꞌ chbeꞌ yel ḻoo nisdoꞌnaꞌ ganaꞌ nak zitj.
17 Bisleꞌ nadꞌ lo ṉiꞌa naꞌ beṉꞌ walkaꞌ bi chleꞌshii nadꞌ,
ḻaꞌ bi wzo wzakidꞌ beṉꞌkaꞌ chakziꞌ chakzbani nadꞌ daa nakgakeꞌ beṉꞌ zan.
18 Bidtiḻ-lengakeꞌ nadꞌ llanaꞌ bi chak wen c̱haꞌ,
per X̱ancho Chiozaꞌ gokleneꞌ nadꞌ.
19 Bibejeꞌ nadꞌ ladj beṉꞌkaꞌ wllagdia nadꞌ.
Naꞌ bisleꞌ nadꞌ daa chazlallee ka nsaꞌ c̱haꞌ.
20 X̱ancho Chiozaꞌ ba beneꞌ to dii wen c̱haꞌ
daa chonꞌ ka chazlallee,
naꞌ daa ṉezileꞌ bibi doḻꞌ c̱haꞌ de.
21 Ḻaꞌ toshiizi zoatipꞌ lo xṉez Chiozaꞌ;
naꞌ bigaṉꞌ wḻaalawaa Chios c̱haꞌnaꞌ.
22 Nadꞌ ngoo yic̱hjꞌ yogꞌ diikaꞌ nllieꞌ biaꞌ gonꞌ,
naꞌ ni shlin bigaṉꞌ kwejyic̱hjgakaꞌn.
23 Ni to doḻꞌ c̱haꞌ bi de laweꞌnaꞌ,
naꞌ chapshiꞌa kwinꞌ kwenc̱he bi gonꞌ dii malaꞌ.
24 Naꞌ X̱ancho Chiozaꞌ ba beneꞌ to dii wen c̱haꞌ
daa chonꞌ ka chazlallee,
naꞌ daa bibi doḻꞌ c̱haꞌ de laweꞌnaꞌ.
25 Chios c̱haꞌ,
toshiizi chaklenoꞌ beenaꞌ chon ka cheeniloꞌ,
naꞌ chonoꞌ wen c̱he beenaꞌ chon wen.
26 Mbalaz choniloꞌ beenaꞌ zoa do yic̱hj do lallee,
san zibiaꞌ choniloꞌ beṉꞌ wxiyeꞌnaꞌ.
27 Linꞌ,
chisloꞌ beṉꞌkaꞌ chc̱hiꞌ chsakꞌ beṉꞌ ḻegakeꞌ,
naꞌ chsiꞌo yeḻꞌ ztoꞌ beṉꞌkaꞌ nak beṉꞌ chaꞌsib.
28 Chios c̱haꞌ,
linꞌ nakoꞌ ka beeniꞌ
daa chzeeniꞌ lo yel c̱hoḻaꞌ ganaꞌ chdaꞌ.
29 Daa chaklenoꞌ nadꞌ wak wlliayaa beṉꞌkaꞌ chdiḻ-len nadꞌ,
naꞌ shep c̱hazꞌ lo zeekaꞌ nec̱hj yell c̱heꞌkaꞌ.
30 Chiozaꞌ nakeꞌ beṉꞌ ḻi beṉꞌ shaoꞌ;
naꞌ choꞌa xtilleenaꞌ nakan dowalj dii ḻi.
Naꞌ chkwashꞌ chkweejeꞌ beṉꞌkaꞌ nx̱enilallꞌ ḻeꞌ.
31 Kochno zoa sto ka X̱ancho Chiozaꞌ.
Kochno nak ka Chios c̱hechonaꞌ beenaꞌ nak ka to yaj xen dii chkweejan choꞌ.
32 Ḻenꞌ choneꞌ nadꞌ beṉꞌ wal,
naꞌ chakleneꞌ nadꞌ nsaꞌ c̱haꞌ wen.
33 Ka chzoac̱hec̱h ṉiꞌa bllinꞌyix̱aa katꞌ chep chazb,
kanꞌ chzoac̱hec̱heꞌ nadꞌ katꞌ chtiḻꞌ dii lalljkaꞌ.
34 Naꞌ chliꞌ chsedileꞌ nadꞌ kwenc̱he gak shaꞌ lo wdiḻaꞌ
naꞌ choneꞌ nadꞌ wal kwenc̱he gak wkaadeejꞌ xis wix̱itꞌ de yanaꞌ.
35 Linꞌ chkwashꞌ chkweejoꞌ nadꞌ naꞌ chisloꞌ nadꞌ,
naꞌ yeḻꞌ wak c̱hoꞌnaꞌ chaklenan nadꞌ.
Naꞌ yeḻꞌ chiyeshꞌlallii c̱hoꞌnaꞌ chonan ka chak wen c̱haꞌ.
36 Ba bsaljoꞌ to nez xen c̱haꞌ ganaꞌ chec̱hj chdaꞌ,
naꞌ ṉiꞌaki bi chbilgakan.
37 Jalagꞌ beṉꞌkaꞌ wdiḻ-len nadꞌ,
naꞌ bi bibiꞌa ax̱t ki blliayaagakeꞌ.
38 Blej bshoshjgakee ga zeelo
kwenc̱he bich biyasgakeꞌ.
39 Liꞌ benoꞌ nadꞌ beṉꞌ wal kwenc̱he wyaa lo wdiḻaꞌ,
naꞌ goklenoꞌ nadꞌ benꞌ gan lao beṉꞌkaꞌ chdiḻ-len nadꞌ.
40 Benoꞌ kwenc̱he beṉꞌkaꞌ chdiḻ-lenꞌ bixoṉjgakeꞌ,
naꞌ gotꞌ latj blliayaa ḻegakeꞌ.
41 Wṉabgakeꞌ yeḻꞌ goklen naꞌ kono goklen ḻegakeꞌ;
wṉegakeꞌ X̱ancho Chiozaꞌ,
naꞌ bi gokleneꞌ ḻegakeꞌ.
42 Naꞌ biyongakee ka bishte yo daa choaꞌ beꞌnaꞌ,
naꞌ blej bshoshjgakee ka beṉjaꞌ daa chiꞌ yawi nez.
43 Ba bisloꞌ nadꞌ lo wdiḻ wishesh c̱he beṉꞌ yell c̱haꞌki;
naꞌ ba bzoꞌ nadꞌ iṉabiꞌa beṉꞌ yellkaꞌ bi nombiaꞌ liꞌ;
naꞌ beṉꞌ zitꞌkaꞌ beṉꞌkaꞌ bi nombiꞌa,
chzoagakeꞌ xtillaa.
44 Kate bi chepgakee gongakeꞌ,
ḻi chontegakeꞌn,
naꞌ chzex̱j yic̱hjgakeꞌ lawaꞌni.
45 Naꞌ daa chiyakbḻanꞌgakeꞌ,
do chall chllebzgakeꞌ chilleshgakeꞌ ganaꞌ nkwashꞌgakeꞌ.
46 ¡X̱ancho Chiozaꞌ nakeꞌ beṉꞌ yaa beṉꞌ ban!
¡Choeꞌlawaa beenaꞌ nak ka to yaj xen dii chkwashꞌ chkweejan nadꞌ!
¡Shajlaoshga Chios c̱haꞌnaꞌ beenaꞌ chisleꞌ nadꞌ!
47 Chiozaꞌ chakleneꞌ nadꞌ chiziꞌa wzonnaꞌ lao beṉꞌkaꞌ chakziꞌ chakzbani nadꞌ,
naꞌ choneꞌ kwenc̱he beṉꞌkaꞌ lleꞌ yellkaꞌ chzex̱j yic̱hjeꞌkaꞌ lawaꞌni.
48 Ḻenꞌ chisleꞌ nadꞌ lo ṉiꞌa naꞌ beṉꞌkaꞌ chakziꞌ chakzbani nadꞌ,
beṉꞌkaꞌ chzoshyiꞌ nadꞌ.
Chios c̱haꞌ,
linꞌ ba bisloꞌ nadꞌ lo ṉiꞌa naꞌ beṉꞌ zeshꞌ beṉꞌ zbankaꞌ.
49 Naꞌ ni c̱heyi daan weꞌlawaa liꞌ ladj beṉꞌkaꞌ lleꞌ yogꞌte yell,
naꞌ goḻ iṉiaꞌ weꞌlawaa liꞌ.
50 Daa nzoꞌ nadꞌ chṉabiꞌa,
chaklenoꞌ nadꞌ kwenc̱he chonꞌ gan lao beṉꞌkaꞌ chdiḻ-lenꞌ.
Naꞌ toshiizi chiyeshꞌlalliloꞌ nadꞌ len yogꞌ xiiṉ dia c̱haꞌkaꞌ.