Salmo 17
1 Bzenaggach dga chṉabidꞌ liꞌ,
Chios c̱haꞌ,
ḻaꞌ dga chatꞌyoidꞌ liꞌ gonoꞌ nakan dii wen.
Bzenaggach c̱haꞌ ṉaa choeꞌḻwillꞌ liꞌ,
ḻaꞌ dillꞌ ḻin choꞌa,
aga chziyaan.
2 Linꞌ nonꞌ lez wc̱hogbiꞌo bibi doḻꞌ c̱haꞌ de;
ḻaꞌ linꞌ ṉez nḻeꞌiloꞌ daa nak shḻi.
3 Linꞌ nombiꞌo yic̱hjlallꞌdawaani,
naꞌ waḻkaꞌ chiya chiyiljoꞌn.
Ba biya biyiljoꞌ nadꞌ
naꞌ ni to dii mal biṉꞌ yilleliloꞌ ḻoo yic̱hjlallꞌdawaani.
Naꞌ ni to dii mal bi chchej choꞌa ḻollaani.
4 Daa chzenagꞌ choꞌa xtilloonaꞌ,
bi chonꞌ txen dii malkaꞌ chon beṉꞌkaꞌ nak beṉꞌ zeshꞌ beṉꞌ zban.
5 Toshiizi ba wzoac̱hec̱hꞌ lo xṉezoꞌnaꞌ,
naꞌ ni shlin bigaṉꞌ yiḻaalawaan.
6 Choeꞌḻwillꞌ liꞌ,
Chios c̱haꞌ,
ḻaꞌ ṉezidꞌ chilliꞌo choꞌa xtillaanaꞌ.
Bzenaggach dga niaꞌ liꞌ.
7 Bliꞌgachi nadꞌ ka nak yeḻꞌ chaki c̱hoꞌnaꞌ daa nak dii xen wal,
ḻaꞌ linꞌ,
chisloꞌ beṉꞌkaꞌ non lez gaklenoꞌ ḻegakeꞌ kon yeḻꞌ wak c̱hoꞌnaꞌ.
Chisloꞌ ḻegakeꞌ lo naꞌ beṉꞌkaꞌ chaklallii wlliayiꞌ ḻegakeꞌ.
8 Wdapshiigach nadꞌ ka chon beṉꞌ chapshiꞌe beṉꞌ jalaweꞌnaꞌ.
Bkwashꞌ bkweej nadꞌ,
ka chon jedaꞌ chkwashꞌ chkweejb xiiṉdoꞌbkaꞌ xan x̱ilbaꞌ.
9 Bkwashꞌ bkweej nadꞌ lao beṉꞌ malkaꞌ chdiḻ-len nadꞌ,
beṉꞌkaꞌ cheeni witgakeꞌ nadꞌ.
10 Bikzə chiyeshꞌgakileꞌ beṉꞌ,
naꞌ ḻe chaꞌsibə chṉegakeꞌ.
11 Chinogakeꞌ nadꞌ gattezə chdaꞌ,
zekwasgakeꞌ kwenc̱he wlliayiꞌgakeꞌ nadꞌ.
12 Chongakeꞌ ka chon to bell zṉia
chbeꞌnob kwenc̱he sem banaꞌ gaob.
13 ¡Bliꞌgach yeḻꞌ wak c̱hoꞌnaꞌ,
Chios c̱haꞌ!
Wdiḻ-lengach beṉꞌ malkaꞌ naꞌ blliayiꞌtegagakeꞌ.
Bisla nadꞌ lo ṉiꞌa neekaꞌ kon yeḻꞌ wak c̱hoꞌnaꞌ.
14 Bisla nadꞌ lo ṉiꞌa neekaꞌ kon yeḻꞌ wak c̱hoꞌnaꞌ,
lo ṉiꞌa naꞌ beṉꞌ yell-lioki,
beṉꞌki non lez zeelo yeḻꞌ shawaa de yell-lioni;
beṉꞌki ḻe chatꞌ chbeꞌyi daa siꞌgakeꞌ banez,
naꞌ nelj nllaꞌyi xiiṉ c̱heꞌkaꞌ naꞌ ax̱t xsoeꞌkaꞌ.
15 San ka nak nadꞌ,
ṉezidꞌ wiyedꞌ lawoꞌnaꞌ daa chonꞌ daa zej shḻi.
Naꞌ mbalaz soaꞌ ganaꞌ zoꞌ katꞌ yisbanoꞌ nadꞌ.