Salmo 16
1 Chios c̱haꞌ,
wdap bwiagach nadꞌ,
ḻaꞌ linꞌ nx̱enilallaa gap wwioꞌ nadꞌ.
2 Nadꞌ ba wniaꞌ liꞌ:
“Linꞌ nakoꞌ X̱anꞌ.
Bibi de c̱haꞌ dii zakꞌchi ka liꞌ.”
3 Beṉꞌkaꞌ chibayi choeꞌlaꞌo diikaꞌ bi nak dowalj chios,
chakgakileꞌ napgakan yeḻꞌ wak.
4 Dii zan dii yen ileꞌi beṉꞌkaꞌ chibayi choeꞌlaꞌogakeꞌ diikaꞌ nak yaj yag.
Bi ḻenꞌ wlaljꞌ xc̱hen bayix̱ꞌkaꞌ lawinkaꞌ,
ni bi wzetjꞌ leinkaꞌ.
5 Chios c̱haꞌ,
linꞌ nakoꞌ beṉꞌ llialote lo yeḻꞌ mban c̱haꞌni,
liꞌ choṉoꞌ yogꞌ dii chyallj chc̱hinidꞌ,
naꞌ ṉezidꞌ linꞌ gonoꞌ ka gak wen c̱haꞌ.
6 Ka mbalaz chak c̱he beenaꞌ chdoḻꞌ to yell-lio wen,
kaꞌkzan chak c̱haꞌ daa chonoꞌ wen c̱haꞌ.
7 Weꞌlawaa X̱ancho Chiozaꞌ,
beenaꞌ chzajnii nadꞌ ka chiyaḻꞌ gonꞌ.
Naꞌ waḻkaꞌ,
chzajnii yic̱hjlallꞌdawaani nadꞌ.
8 Toshiizi yoo yic̱hjꞌ X̱ancho Chiozaꞌ.
Naꞌ daa zoaleneꞌ nadꞌ naꞌ chakleneꞌ nadꞌ,
bibi de dii wchix̱an nadꞌ gonꞌ dii malaꞌ.
9 Naꞌ daan chiba chizaki ḻoo yic̱hjlallꞌdawaani.
Naꞌ ṉezidꞌ bibi dii nxoll zoaꞌ.
10 Ḻaꞌ aga wsanlalloo nadꞌ toshiizi ladj beṉꞌ wetkaꞌ.
Aga wiꞌo latj goollꞌ iteb beli chen c̱haꞌni,
daa nakꞌ lallꞌ noꞌ.
11 Ba bliiloꞌ nadꞌ nez daa nsaꞌ yeḻꞌ mbannaꞌ.
Ganaꞌ zoꞌ de to yeḻꞌ xaba xen,
naꞌ toshiizi soaꞌ mbalaz kwitoꞌnaꞌ.