Salmo 15
1 Chios c̱haꞌ,
¿noran gak soa latj c̱hoꞌnaꞌ ganaꞌ chajlawoꞌ?
Naꞌ ¿non gak soa lo yaanaꞌ ganaꞌ zoa lill xḻatjoꞌnaꞌ?
2 Zeelo beenaꞌ nsaꞌ c̱heyin wen naꞌ choneꞌ daa nak shḻi,
naꞌ choꞌe dillꞌ ḻi do yic̱hj do lallee;
3 beenaꞌ bi chbell chṉe c̱he beṉꞌ,
ni bibi choneꞌ c̱he bishꞌ ljwelleꞌnaꞌ,
ni bibi chiyiljlallee c̱he beṉꞌ wlill c̱heꞌnaꞌ;
4 beenaꞌ chleꞌzbanileꞌ beṉꞌ malkaꞌ,
naꞌ chapeꞌ balaaṉ beṉꞌkaꞌ chall chlleb Chiozaꞌ;
naꞌ choneꞌ yogꞌte daa chc̱hebeꞌ,
ḻaꞌkzi chleꞌileꞌn lallj wal;
5 beenaꞌ choꞌe blej xmecheꞌnaꞌ naꞌ bibi yic̱hjin chṉabeꞌ;
ni bi chkee bi dii chshabi beṉꞌ ḻeꞌ kwenc̱he goneꞌ yoaꞌ yag c̱he beṉꞌ bibi doḻꞌ nap.
Beenanꞌ,
ṉezganzə ixopeꞌ goneꞌ dii malaꞌ.